एजेन्सी । भारतीय टोलीले डिसेम्बरमा दक्षिण अफ्रिकाको भ्रमण गर्नेछ । यहाँ उसले एकदिवसीय, टी–२० र टेस्ट सिरिजमा भाग लिनेछ । बीसीसीआईले बिहीबार टोलीको घोषणा गरेको हो ।
अचम्मको कुरा के छ भने एकदिवसीय टोलीमा युवा खेलाडीलाई मौका दिइएको छ । रोहित शर्मा, विराट कोहली र शुभमन गिललाई विश्राम दिइएको छ । टिममा रिंकु सिंह, रजत पाटीदार र साई सुदर्शन परेका छन् ।
दक्षिण अफ्रिकाविरुद्धको तीन खेलको एकदिवसीय शृंखलाका लागि केएल राहुललाई भारतीय टोलीको कप्तान दिइएको छ । आईपीएलमा आरसीबीबाट खेल्ने रजत पाटीदार र गुजरात टाइटन्सबाट खेल्ने साई सुदर्शनलाई पनि टोलीमा समावेश गरिएको छ ।
दक्षिण अफ्रिका भ्रमण यी दुई अनक्याप्ड खेलाडीहरूको लागि सिजन ओपनर हुन सक्छ । यसबाहेक टी–२० मा उत्कृष्ट प्रदर्शन गर्ने रिंकु सिंहले पनि एकदिवसीय टोलीमा स्थान पाएका छन् ।
चोटबाट निको भएपछि रजत पाटीदार विजय हजारे ट्रफीमा तरंग मच्चाइरहेका छन् । मध्य प्रदेशका लागि खेल्दै उनले आफ्नो पहिलो खेलमा ५२ बलमा ६४ रनको द्रुत इनिङ खेले । यससँगै उनले नागाल्याण्डविरुद्ध २७ बलमा ७० रनको तुफानी पारी खेलेका थिए ।
