मगरगाउँ (ललितपुर): सैंबु ब्याडमिन्टन सर्कलको आयोजना तथा ललितपुर महानगरपालिका वडा नं १८ को सहयोगमा संचालित दोस्रो सैंबु खुल्ला ब्याडमिन्टन कप २०८० को उपाधि ओमकार गुरूङ र शिव ठकुरीको जोडीले जितेको छ ।
आज पिपलबोट, मगरगाउँको खुला मैदानमा भएको फाइनलमा कालीका ब्याडमिन्टन क्लबका ओमकार गुरूङ र श्याम ठकुरीको जोडीले सोही क्लबका उत्तम सत्याल र भीम थापाको जोडीलाई २-१ सेटले पराजित गरेका थिए । सत्याल र थापाको जोडी २४-२२, २१-१३ र २१-१० को सेटले पराजित भएको थियो ।
विजयी खेलाडीमध्ये प्रथम हुने टिमले रू २५,०००, दोस्रो हुनेले २०,००० र तेस्रो हुनेले १५,००० नगद सहित कप, प्रमाणपत्र र पदक प्राप्त गरेका थिए ।
उक्त प्रतियोगिता यही मंसिर १६ गतेदेखि खेल सुरू भएको थियो ।
क्लबका सदस्य गोपालराम पौडेलले स्वागत गर्दै खेल आयोजनाका लागि सहयोग गर्नेहरूप्रति आभार व्यक्त गर्नु भएको थियो ।
सिटीजन्स बैंक इन्टरन्यासनलका प्रमुख कार्यकारी गणेशराज पोखरेल, ललितपुर ब्याडमिन्टन संघका उपाध्यक्ष पूर्ण चित्रकार, नेपाल ब्याडमिन्टन संघका केन्द्रीय अध्यक्ष रामजी श्रेष्ठ लगायतले ब्याडमिन्टन खेलप्रति युवालाई आकर्षित गरी व्यवसायिक खेलाडी उत्पादनमा जोड दिनुपर्ने समय आएको बताउनुभयो ।
प्रतियोगिता सुरू हुनुअघि भेट्रान खेलाडी बीच मैत्रीपूर्ण खेल आयोजना गरिएको थियो ।
विजयी खेलाडीहरुलाई कप प्रदान गर्दै ललितपुर महानगरपालिका वडा नं. १८ का वडा अध्यक्ष दामोदर खड्काले स्थानीय स्तरमा हुने खेलकुदका गतिविधिलाई प्रोत्साहित गर्न वडा कार्यालय सदैब तत्पर रहेको बताउनुभयो ।
