काठमाडौँ । प्रधानमन्त्री कप महिला टि२० राष्ट्रिय क्रिकेट प्रतियोगितामा गण्डकी प्रदेशले कर्णाली प्रदेशलाई ४४ रनले हराएको छ ।
जितको लागि १ सय ४२ रनको विशाल विजयी लक्ष्य पाएको कर्णालीले २० ओभरमा ६ विकेट गुमाउँदै मात्र ९७ रन बनायो ।
कर्णालीको लागि गौरी बोहराले सर्वाधिक २६ रन बनाइन् । ओपनर यमुना थारुले २१ र तृर्सना विश्वकर्माले १९ रन बनाउदा अन्य कुनैपनि ब्याटरले दोहोरो अंकमा रन बनाउन सकेनन् ।
गण्डकीको लागि रचना चौधरीले २ विकेट लिइन् । सुमन खतिवडा र ज्योत्स्निका मरासिनीले समान एक एक विकेट लिइन् ।
त्यसअघि माथिल्लो मुलपानी क्रिकेट मैदानमा टस जितेर पहिला ब्याटिङ गरेको गण्डकी प्रदेशले निर्धारित २० ओभरमा ६ विकेट गुमाउँदै १ सय ४१ रन बनाएको थियो । गण्डकीका दुई ब्याटरले अर्धसतक बनाएका थिए । ओपरन अञ्जली विश्वकर्माले ४८ बलमा आठ चौका प्रहार गर्दै ५१ रनको योगदान दिईन्। यस्तै, ज्योत्सनिका मरासिनीले ४० बलमा एक छक्का र पाँच चौकाको सहयोगमा ५० बनाईन् । सुमन खतिवडाले २२ रन बनाइन् ।
कर्णाली प्रदेशले अतिरिक्त १५ रन दिएको थियो । कर्णालीका बलर यमुना थारु र अञ्जु गुरुङले समान दुई–दुई विकेट लिँदा रश्मी खड्काले एक विकेट लिईन् ।
कर्णाली पहिलो खेलमा कोशीसँग १० विकेटले पराजित भएको थियो । त्यस्तै गण्डकी पहिलो खेलमा लुम्बिनीसँग ४ विकेटले पराजित भएको थियो । अब आइतबार कर्णालीले मधेशसँग टियुमा र गण्डकीले बागमतीसँग मुलपानीमा खेल्नेछ ।
