काठमाडौँ । प्रतिनिधिसभा सदस्यका लागि उम्मेदवारी दिने तयारीमा रहेका तीन जना राष्ट्रियसभा सदस्यले पदबाट राजीनामा दिएका छन् । राजीनामा दिनेमा नारायणकाजी श्रेष्ठ, वामदेव गौतम र भगवती न्यौपाने रहेका छन् ।
उनीहरूले राष्ट्रियसभाका अध्यक्ष नारायणप्रसाद दाहालसमक्ष लिखित राजीनामा बुझाएका हुन् । प्रतिनिधिसभा निर्वाचनमा प्रत्यक्षतर्फ उम्मेदवारी दिन कानुनी व्यवस्था अनुसार उनीहरूले राष्ट्रियसभा सदस्यको पद त्यागेका हुन् ।
नेकपाका नेता नारायणकाजी श्रेष्ठ सर्लाही क्षेत्र नम्बर ३ बाट प्रतिनिधिसभा सदस्यका लागि उम्मेदवार बन्ने तयारीमा छन् । यस्तै वामदेव गौतम बर्दिया क्षेत्र नम्बर १ बाट चुनावी प्रतिस्पर्धामा उत्रँदै छन् भने एमालेकी राष्ट्रियसभा सदस्य भगवती न्यौपाने तनहुँ क्षेत्र नम्बर १ बाट उम्मेदवारी दिँदै छन् ।
