काठमाडौँ । नेपाली कांग्रेसका सभापति शेरबहादुर देउवासहित कांग्रेस पदाधिकारीहरु राष्ट्रपति भवन शीतल निवास पुग्नुभएको छ ।
प्रधानमन्त्रीसमेत रहनुभएका देउवासँगै कांग्रेस उपसभापति धनराज गुरुङ, महामन्त्री गगन थापा र सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर थापा सोमबार दिउँसो शीतल निवास पुग्नुभएको हो ।
राष्ट्रपति विद्यादेवी भण्डारीले भेट्न बोलाएपछि उहाँहरु शीतल निवास पुग्नुभएको बताइएको छ ।
नागरिकता विधेयक विषयमा राष्ट्रपति भण्डारी र सत्तारुढ दलबीच पछिल्लो समय दूरी बढेको छ । संसद्को दुवै सदनबाट पारित भई प्रमाणीकरणका लागि राष्ट्रपतिकहाँ पुगेको नागरिकता विधेयक राष्ट्रपतिले पुनर्विचारका लागि सन्देशसहित संसद्मै फिर्ता पठाउनुभएको थियो । प्रतिनिधिसभाले सो विधेयकमाथि कुनै पुनर्विचार नगरी हुबहु पारित गरेपछि राष्ट्रपति भण्डारी र सत्तारुढ दलबीच दूरी बढेको हो ।
