काठमाडौं । नेकपा एमालेका अध्यक्ष केपी शर्मा ओलीले भ्रष्टाचारका दोषीलाई कारबाही गर्नेभन्दा तेजोबध गर्न चाल चल्ने काम भइरहेको आरोप लगाएका छन् ।
विहीबार पार्टीको पाँचौं केन्द्रीय समितिको बैठकलाई सम्बोधन गर्दै ओलीले यस्तो बताएक हुन् । ‘भ्रष्टाचारलाई निष्पक्ष ढंगले छानबिन गरेर दृढतापूर्वक दोषीमाथि कारबाही गर्न छाडेर कसरी कसलाई तेजोबध गर्न सकिन्छ भन्ने कुरा पनि चालेका छन्’, उनले भने ।
ओलीले नक्कली भुटानी शरणार्थी प्रकरणमा पूर्वाग्रही ढंगले कसैलाई फसाउन खोजेको आशंका गरेका छन् । ‘भ्रष्टाचार प्रकरणमा हाम्रै पार्टीका साथीहरूको नाम आएको छ । हाम्रै सरकारमा रहेका साथीहरूको नाम आएको छ । जोसुकैको नाम आवस् यदि दोषी छ भने कारबाही हुनुपर्छ ।’, ओलीले भने, ,जबसम्म मान्छे दोषी ठहरिँदैन दोषी रहन्छ कि भन्ने आशंका गर्न सकिन्छ । तर, हामी अपराधी हो भनेर करार गर्न वा दोषी नै छ भनेर करार गर्न सक्दैनौँ । त्यसको अदालति प्रक्रिया बाँकी हुन्छ । त्यसमा हामीले ढुक्क धारणा बनाउन सक्दैनौं ।’
ओलीले भ्रष्ट क्रियाकलापलाई नियन्त्रण गर्नुपर्ने बताए ।उनले भने, ‘भ्रष्ट क्रियाकलापलाई नियन्त्रण गर्नुपर्छ । हामीले सरकारलाई लगातार यही कुरा भनेका छौं ।’
