काठमाडौं: नेपाल, हङकङ र युएईबीचको त्रिकोणात्मक शृंखलाको उपाधि युएईले जितेको छ । नेपालले प्रस्तुत गरेको १६३ रनको लक्ष युएईले छ विकेट गुमाएर पूरा गरेको थियो ।
त्रिवि क्रिकेट मैदान, कीर्तिपुरमा टस हारेर ब्याटिङको निम्तो पाएको नेपालले कुशल भुर्तेलको अर्ध शतकको मद्दतमा निर्धारित २० ओभरमा ८ विकेट गुमाएर १६२ रन बनाएको थियो ।
नेपालका लागि आसिफ सेखले ७, कुशल मल्लले १, रोहित पौडेलले १८, दीपेन्द्र सिंह ऐरीले २०, सन्दीप जोराले १०, गुल्सन झाले ५, सोमपाल कामीले १३ र करन केसीले २३ रन बनाएका थिए ।
युएईका लागि आयन अफजल खानले ३, अलि नासेर र जहूर खानले समान २,२ तथा जुनेद सिद्धिकीले १ विकेट लिएका थिए ।
जवाफमा युएईको टिमले सुरुदेखि नै नेपालमाथि दबाब बनाएको थियो । युएईका कप्तान मोहम्मद वासिमले गुल्सन झाको बलमा आउट हुनुअघि ४५ रन बनाएका थिए । त्यस्तै, आर्यन्स शर्माले २५, भित्र्या अरबिन्दले २६ रन बनाएका थिए ।
नेपालका लागि गुल्सन झा र अविनाश बोहराले समान दुई दुई विकेट लिएका थिए भने कुशल मल्लले १ विकेट लिएका थिए ।
