एजेन्सी । पाकिस्तानी क्रिकेट टोलीको बिरयानीको प्रेमले २०२३ को विश्वकपमा निकै चर्चा पाइरहेको छ । प्रतियोगिताबाट बाहिरिने संघारमा रहेको टोलीले चर्को आलोचना खेप्दै आए पनि खेलाडीको बिरयानीप्रतिको माया भने घटेको देखिँदैन ।
यसैबीच, पाकिस्तानी टोलीले होटलमा डिनर गर्न अस्वीकार गर्यो किनभने बिरयानी मेनुमा समावेश थिएन । पाकिस्तानी क्रिकेट टोलीले खाना वितरण एप मार्फत चाप, फिरनी, कबाब, शाही टुकडा र बिरयानी अर्डर गरेको थियो ।
यस विषयमा टोलीबाट भने कुनै प्रतिक्रिया आएको छैन । क्रिकेट टिम २ दिनअघि कोलकाता पुगेको थियो, जहाँ उसले आज बंगलादेशसँग खेल खेल्ने छ ।
यसअघि टोलीले हैदराबादी बिरयानीको मजा लिएको थियो । टोलीले त्यहाँ अभ्यास खेल खेलेको थियो र नेदरल्यान्ड्स र श्रीलंकामाथि दुई खेल जितेको थियो ।
विश्वकप सुरु हुनुअघि पाकिस्तानी टोलीका अलराउन्डर शादाब खानले खराब फिल्डिङको एउटा कारण बिरयानी रहेको बताएका थिए । अभ्यास खेलमा अस्ट्रेलियासँग हारेपछि कमेन्टेटर हर्षा भोगलेले शादाबलाई हैदरावादी बिरयानीबारे सोध्दा उनले भने, ‘हामी दैनिक हैदरावादी बिरयानी खाइरहेका छौं, त्यसैले मैदानमा अलि ढिलो हुँदैछौं ।’
