काठमाडौँ । फुटबलका महान् खेलाडीमध्येका एक जर्मन लिजेण्ड फ्रान्ज बेकनबाउरको ७८ वर्षको उमेरमा निधन भएको छ । उनी १९७४ मा पश्चिम जर्मनीको कप्तान भएर विश्वकप जितेका थिए भने १९९० मा प्रशिक्षकको रुपमा फेरि ट्रफी उचालेका थिए ।
डिफेन्डर बेकनबाउरले जर्मन क्लब बायर्न म्युनिखको लागि ५८२ खेल खेलेका थिए । उनले बार्यनबाट पनि खेलाडी र प्रशिक्षकको रुपमा लिगको उपाधि जित्न सफल भएका थिए ।
१९७२ मा युरोपियन च्याम्पियनसिप जितेका उनी दुई पटक बालोन डि’ओर ट्रफी उचाल्न समेत सफल भए ।
उनको परिवारले जनाएका छन्, ‘यो गहिरो दुःखका साथ हामी घोषणा गर्दछौं कि मेरा श्रीमान् र हाम्रा बुबा, फ्रान्ज बेकनबाउरको हिजो, आइतबार, शान्तपूर्वक निधन भएको छ ।’
पश्चिम जर्मनीका लागि १०३ खेल खेलेका उनले सन् १९६६ को विश्वकपमा २० वर्षको उमेरमा चार गोल गरेका थिए र प्रतियोगिताको उत्कृष्ट युवा खेलाडीको अवार्ड जितेका थिए ।
बायर्नबाट चार लिग उपाधि जितेका उनी १९८२ मा ह्याम्बर्गबाट समेत बुन्डेसलिगा जितेका थिए ।
