काठमाडौँ । आइसिसी यु–१९ एक दिवसीय विश्वकप क्रिकेट प्रतियोगिताअन्तर्गत न्युजिल्याण्डले नेपाललाई ३०३ रनको विजयी लक्ष्य दिएको छ ।
दक्षिण अफ्रिकाको इस्ट लन्डनस्थित बफेलोपार्क क्रिकेट मैदानमा टस जितेर ब्याटिङ थालेको न्युजिल्याण्डले निर्धारित ५० ओभरमा ८ विकेटको क्षतिमा ३०२ रन जोड्यो ।
उसका लागि स्नेहिथ रेड्डीले विष्फोटक शतकीय पारी खेले । उनी १४७ रनमा अविजित रहे । १२५ बल खेलेका उनले ११ चौका र ६ छक्का प्रहार गरे ।
यस्तै, ओस्कार ज्याक्सनले ७५ रन जोड्दा टम जोन्सले ३३ रनको योगदान दिए । नेपालका लागि सुवास भण्डारीले ३, गुलशन झाले २ तथा दिपेश कँडेल, तिलक भण्डारी र आकाश त्रिपाठीले १-१ विकेट लिए ।
यु–१९ विश्वकपमा यसअघि नेपालले दुई पटक न्युजिल्यान्डको सामना गरेको छ । दुवै खेलमा नेपालले जित हासिल गरेको थियो ।
सन् २००६ मा भएको खेलमा नेपालले न्युजिल्यान्डलाई एक विकेटले पराजित गरेको थियो भने सन् २०१६ मा भएको खेलमा नेपालले ३२ रनले हराएको थियो ।
नेपाली टोलीमा कप्तान देव खनालसहित अर्जुन कुमाल, आकाश त्रिपाठी, दीपकप्रसाद डुम्रे, दुर्गेश गुप्ता, गुलसन झा, दिपेशप्रसाद कँडेल, विशालविक्रम केसी, सुवास भण्डारी, दीपक बोहोरा, उत्तम थापामगर, विपीन रावल, तिलकराज भण्डारी, दीपक बोहोरा र आकाश चन्द रहेका छन् ।
