काठमाडौं । आज बिहीबार हिन्दू नरनारीहरुले आजका दिन बगलामुखी देवीको ब्रत तथा उपासना र पूजाआजा गर्ने गर्दछन् । तर देवीको पूजा के कसरी गर्ने ? कसरी आज बिहीबारका दिन देवीको उपासना या ब्रत गर्दा फल प्राप्त हुन्छ भन्ने विषयमा सबैलाई जानकारी नहुन पनि सक्छ । यहाँ पूजा तथा उपासनाका केही विधिहरु दिइएको छ ।
मन्त्रोच्चारण गर्ने विधि
उहाँको स्तुती गर्दा बिजमन्त्रको उच्चारण गर्ने, बगलामुखी माताको स्तोत्र पाठ गर्ने, श्री बगलामुखी स्तोत्रं– १, २, बगलामुखी हृदयं, बगलामुखी अष्टोत्तरशतनाम स्तोत्रं र बगलामुखी अष्टोत्तर शतनामावलीको जप गर्ने गर्नाले मातालाई प्रसन्न पार्न सकिन्छ ।
साधाना गर्ने
साधना बिहान सबैभन्दा पहिला स्नानबाट शुरु हुन्छ । स्नान गरिसकेपछि चित्तशुद्धिका साथ उहाँको उपासना शुरु हुन्छ । उहाँको स्मरण गर्दै केही समय ध्यान गर्नुपर्छ र ध्यानपछि मन्त्रोच्चारण गर्नुपर्छ ।
बगलामुखी माताको साधनाले उहाँलाई खुशी पार्न सकिन्छ । यसमा खासगरी आफ्ना गुरुबाट प्राप्त भएको साधनाको ज्ञान र मन्त्रलाई सही तरिकाले जप गरियो भने यसबाट मनको शान्ति प्राप्त हुनुका साथै माताको कृपा पाउन सकिन्छ । यसरी साधना गर्दा साधकले उहाँलाई मनपर्ने पहेँलो रंगको वस्त्र लगाउनुपर्छ ।
पूजा कसरी गर्ने ?
माताको पूजा गर्दा उहाँको मनपर्ने पहेँलो संगको वस्त्र लगाउनुपर्छ र मातालाई पनि पहेँलो वस्त्र चढाउनुपर्छ । त्यसैगरी पहेँलो केशरी, चन्दन, पहेँला धजा, पहेँला अक्षता र पहेँला फलफूलहरु चढाउनुपर्छ । यसरी आराधना गर्दा माताको आशिर्वाद प्राप्त हुनेछ । यसरी बगलामुखी माताको साधना गर्ने हरेक वर्तालूले नारीको सम्मान गर्नुपर्छ । शास्त्रमा हरेक नारीमा देवीको बास हुने भएकोले नारीको सम्मानबाट बगलामुखी माता पनि खुशी हुने बताइएको छ ।
