काठमाडौं। सरकारले एसिड (तेजाब) आक्रमण गर्नेहरुलाई कडा सजाय हुने गरी अध्यादेशमार्फत नयाँ कानून निर्माण गरेकोमा अभियन्ता उज्वल थापा सहित पीडितहले सरकारलाई धन्यवाद दिएका छन् । थापाले सामाजिक संञ्जालमा प्रधानमन्त्री सहित सरोकारवालहरु संग भएको छलफल पछिको पीडितहरु संगको फोटो राख्दै मेरो अभियान वहाँहरुको लागि थियो छ र रहन्छ भन्दै धन्यवाद ब्यक्त गरेका छन् ।
नयाँ कानून मार्फत नेपाल सरकारले मल्हम लगाउने काम भन्दै थापाले हामी सम्पुर्णको तर्फबाट नयाँ कानुन र पुनःस्थापन प्याकेज को लागि आभार र कृतज्ञता प्रकट गरेका छन्। सरकारले तेजाब (एसिड) तथा ज्वलनशील पदार्थ प्रयोग गरी कसैको शरीर अंगभङ्ग गर्ने र अपराध गर्न लगाउने व्यक्तिमाथि २० वर्ष कैदसम्म र १० लाख रुपैयाँसम्म जरिवाना हुने नयाँ कानून बनाएको छ ।
यसै गरी मुलुकी अपराध संहिता २०७४ मा भएको एसिडजन्य अपराधमा संलग्नलाई अधिकतम ८ वर्ष कैद र ५ लाखसम्म जरिवाना हुने व्यवस्था पनि गरेको छ । मन्त्रिपरिषद्ले ‘फौजदारी कसुर तथा फौजदारी कार्यविधिसम्बन्धी केही ऐन संशोधन गर्ने अध्यादेश– २०७७’ ले ६ वटा ऐनका एसिड अपराधसम्बन्धी कसुर र सजायका प्रावधान हेरफेर गरी नयाँ कानूनको निर्माण गरेको हो ।
