काठमाण्डाै I शहरी विकास राज्यमन्त्री रामवीर मानन्धरले कोराेना भाइरस रोकथाम तथा नियन्त्रणका लागि सबै नागरिकले सरकारलाई सहयोग गर्नुपर्ने बताउनुभएको छ ।
शनिबार साधना कलाकेन्द्रले काठमाण्डाैमा आयोजना गरेको कार्यक्रमलाई सम्बोधन गर्दै राज्यमन्त्री मानन्धरले सबै जनताको सहयोग भए मात्रै सरकारले कोराेना भाइरस रोकथाम तथा नियन्त्रणका लागि प्रभावकारी काम गर्न सक्ने बताउनुभएको हो ।
उहाँले अहिले सरकारले गरेका कामहरुप्रति सबैले आलोचना मात्रै गरिरहेकाले पनि समस्या देखिएको बताउनुभयो । करिब १० लाख मानिसहरुको पीसीआर परीक्षण गर्दा नै अर्बौं रुपैयाँ सकिएको तर नियन्त्रणमा आउन नसकेकाले सबैको सहयोगको आवस्यकता रहेको उहाँको भनाइ छ ।
कार्यक्रममा राज्यमन्त्री मानन्धरले कलाकारिता क्षेत्रको विकासकोे पहिलो आधार एक श्रष्टाले अर्को श्रष्टालाई सम्मान गर्नु नै रहेको बताउनुभयो । श्रष्टाप्रतिको सम्मान नै कलाकारिताको पहिलो साधना भएको पनि उहाँले बताउनुभयो ।
कार्यक्रममा राज्यमन्त्री मानन्धरले साधना कला केन्द्रले अनलाइनमार्फत आयोजना गरेको गायन प्रतियोगिताका विजेताहरुलाई पुरस्कृत गर्नुभएको छ । जसमध्ये प्रथम पुरस्कार ललितपुरकी कलाकार रुपा सापकोटाले प्राप्त गर्नुभएको छ ।
दोस्रो पुरस्कार दोलखाकी ममता तामाङ, तेस्रो पुरस्कार विराटनगरका डा. मन्जिल श्रेष्ठ र सान्त्वना पुरस्कार काठमाण्डौका विमल रुचाल र निषादरत्न तुलाधरले प्राप्त गर्नुभएको छ । साधना कलाकेन्द्रले आयोजना गरेको साधना कलाकेन्द्रमा अनलाइन माध्यमबाट विभिन्न १३ देशमा रहेका कलाकारहरुले सहभागिता जनाएका थिए ।
