काठमाडौं । आगामी असोज १ गतेदेखि सार्वजनिक सवारी साधन सञ्चालन हुने भएका छन् । सरकारले कोरोना नियन्त्रणका नाममा सार्वजनिक यातायात संचालनलाई निषेध गरेका बेला यातायात व्यवसायीहरुले यस्तो घोषणा गरेका हुन्।
बुधबार यातायात व्यवसायी, यातायात व्यवस्था विभाग र तीन वटा मजदुर संगठनको संयूक्त बैठकले असोज १ देखि लामो तथा छोटो दुरीका यातायात चलाउने घोषणा गरेका हुन्। सरकारले यातायात संचालनका लागि सहजीकरण नगरे आफूहरुले यातायात चलाउन लागेको नेपाल यातायात स्वतन्त्र मजदुर संगठनका भिमज्वाला राईले बताए।
यातायात व्यवस्था विभागका महानिर्देशक गोगनबहादुर हमालले यो निर्णय आफूहरुले गरेर नभई मन्त्रिपरिषदबाटै हुनुपर्ने बताए। कोरोना संक्रमण कम भएका ठाउँमा यातायात चलाउन सकिने सुझाव आफूहरुले दिएको उनले बताए।
