एजेन्सी। दक्षिण अफ्रिका च्याम्पियन्स ट्रफीको सेमिफाइनलमा पुगेको छ।
शनिबार भएको खेलमा दक्षिण अफ्रिकाले इंग्ल्यान्डलाई सात विकेटले पराजित गरेको छ। पाकिस्तानको कराचीमा भएको खेलमा दक्षिण अफ्रिकाले इंग्ल्यान्डलाई पराजित गरेको हो।
पहिले ब्याटिङ गरेको इंग्ल्यान्डले निर्धारित ५० ओभर पनि खेल्न सकेन ३८.२ ओभर खेलेको इंग्ल्यान्डले दक्षिण अफ्रिकासामु १८० रनको लक्ष्य प्रस्तुत गर्यो।
जवाफमा दक्षिण अफ्रिकाले २९.१ ओभरमा तीन विकेट गुमाएर १८१ रन बनाएर जित हासिल गर्यो। दक्षिण अफ्रिकाका लागि रस्सी वैन डेर ड्युसेनले ८७ बलमा ७२ रन बनाए। त्यस्तै हेनरिक क्लासेनले ५६ बलमा ६४ रन जोडे। त्यस्तै इंग्ल्यान्डका लागि जोफ्रा आर्चरले दुई र स्पिनर आदिल रशीदले एक विकेट लिए।
समूह ‘बी’ मा दक्षिण अफ्रिका समूह विजेता बन्दा अस्ट्रेलिया उपविजेता बनेर अन्तिम चारमा पुगे। यो समूहबाट अफगानिस्तान र इंग्ल्यान्ड बाहिरिए।
यसअघि समूह ‘ ए’ बाट न्युजिल्यान्ड र भारत अन्तिम चारमा पुगेका थिए। आयोजक पाकिस्तान र बंगलादेश भने बाहिरिएका थिए। न्युजिल्याान्ड र भारतबीच हुने समूहको अन्तिम खेलपछि समूह विजेतासँगै सेमिफाइनलमा भिड्ने समिकरण पूरा हुनेछ।
