काठमाडौँ । नेपाली काँग्रेसका सांसद डा सुनिल शर्माले बुधवारको प्रतिनिधि सभाको बैठकमा जरुरी सार्वजनिक महत्वको प्रश्ताव दर्ता गराउनुभएको छ ।
जरुरी सार्वजनिक महत्वको सूचना दर्ता गराउँदै सांसद डा। शर्माले स्वास्थ्य बीमाको क्षेत्रमा सबै नागरिकलाई समेट्न जरुरी रहेको बताउनु भयो । उहाँले कमजोर आर्थिक अवस्था र जनचेतनाको अभावले सामान्य प्रकृतिका रोगहरुको कारणले नागरिकले अकालमै ज्यान गुमाउनुपरेको उल्लेख गर्दै स्वास्थ्य बिमा कार्यक्रमलाई विस्तार गर्नुपर्ने बताउनु भयो ।
‘नेपालमा विषेशगरी ग्रामिण क्षेत्र, सिमान्तकृत वर्ग, पिछिडिएका र विपन्न समुदायको कमजोर आर्थिक अवस्था र जनचेतनाको अभाव लगायतका कारणले सामान्य तथा गम्भिर प्रकृतिका रोगहरुका लागि समेत स्वास्थ्य उपचार खर्चको अभाव हुनुका साथै स्वास्थ्य सेवामा पहुँच चुनौतिपूर्ण रहेको हुनाले नेपालका सबै नागरिकका लागि एक व्यापक स्वास्थ्य बिमा योजना प्रारम्भ गरी छिटो, सर्वसुलभ र सहज स्वास्थ्य सेवाको पहुँचमा सबैलाई समेट्न आवश्यक भएको हुनाले’ उहाँको जरुरी सार्वजनिक महत्वको प्रश्तावमा उल्लेख छ ।
प्रश्तावको समर्थन गर्दै स्वतन्त्र सांसद अमरेशकुमार सिंहले संविधानले ग्यारेन्टी गरेको स्वास्थ्य र शिक्षाको हक आम नागरिकले पाउन नसकेको बताउनु भयो । उहाँले स्वास्थ्य मन्त्रालयले सचिव र सम्बन्धीत मन्त्रालयका निकायहरुमा बिना कमिसनको नियुक्ति नहुने जिकिर गर्नुभयो । कसलाई कुन मन्त्रालयको सचिव बनाउने निर्णय सरकारले नभई विचौलियाले गर्ने गरेको उहाँको आरोप छ ।
राष्ट्रिय स्वतन्त्र पार्टीका प्रमुख सचेतक सन्तोष परियारले राज्यले संविधानले प्रत्याभुत गरेका आधारभुत सुविधाहर जनतालाई नदिएसम्म जनता र राज्यबीचको सम्बन्ध राम्रो नहुने बताउनु भयो । उहाँले राज्य र जनताको सम्बन्ध जोड्नको लागि सरकार जिम्मेवार हुनुपर्ने बताउनु भयो । सरकारले स्वास्थ्य र शिक्षामा प्रयाप्त खर्च नगरि समृद्धिको कुरा गर्नु बेकार हुने उहाँको भनाइ छ । उहाँले स्वास्थ्य क्षेत्रमा सुधार गर्नको लागि लगानी अभिवृद्धि गर्न जरुरी रहेको बताउनु भयो ।
उहाँले जरुरी सार्वजनिक महत्वको सूचनालाई कार्यान्वयनमा लैजान समेत आग्रह गर्नुभयो ।
