काठमाडौँ । प्रमुख प्रतिपक्षी दल कांग्रेसले कोरोना भाइरसको अनुगमन गर्नका लागि गठन गरेको कोरोना अनुगमन समितिले सरकारले बिना तयारी र विना ठोस आधार लकडाउन खोलेको र नागरिकलाई महामारीबाट बाँच्नका लागि आवश्यक सहयोगका प्याकेजहरु दिन नसकेकोले देशमा महामारी झन् बढेको आरोप लगाएको छ ।
सरकारले बिना उपलब्धि नै लकडाउनको लामो अवधिको समय खेर फालेको आरोप सो समितिले लगाएको हो । शुक्रबार नेपाल औषधि व्यवसायी संघसँगको अन्तरक्रियामा नेपाली काँग्रेसका सहमहामन्त्री तथा कोभिड–१९ अनुगमन समितिका संयोजक डा.प्रकाशशरण महतले सरकारले लकडाउन खोल्दा बढ्न सक्ने संक्रमणप्रति सचेतता अपनाउन नसकेको र कुनै तयारी पनि नगरेको बताएका हुन् ।
संक्रमणको क्रम झनै बढेको भन्दै उनले हाल देशका विभिन्न स्थानमा र पछिल्लो समयमा राजधकानी काठमाडौँमै देखिएको संक्रमणको प्रकृतिले, संक्रमण समुदायमा फैलिन सक्ने खतरा पनि उत्पन्न गराएको उल्लेख गर्दै यस्तो अवस्थामा परीक्षण र ट्रेसिङको दायरालाई थप प्रभावकारी रुपमा बढाउनुपर्नेमा जोड दिए ।
उनले भने– यस्तो अवस्थामा त झनै उपचार, स्वास्थ्य उपकरण, जनशक्ति र स्वास्थ्यकर्मीको स्वास्थ्य सुरक्षा र सुविधाप्रति सरकारको तयारी हुनुपर्ने हो तर हामीले भने बमोजिम र जनताले चाहना गरेबमोजिम सरकारको तयारी नभएर अत्यन्तै निराशाजनक र एक किसीमले हेर्दा गैरजिम्मेवारपूर्ण रुपमा सरकार देखिन्छ, त्यसैले यो सरकारप्रति जनताको भरोसा पनि घट्दै गएको छ ।
लकडाउन खोलेपछि उद्योगधन्दा, व्यापार व्यवसाय, सार्वजनिक यातायात तथा पछिल्लो समयमा हिजोदेखि खुलेका होटल आदिमा पनि अपनाउनु पर्ने स्वास्थ्य सुरक्षा र सावधानीका उपायहरुमा पनि सरकार गम्भीर नभएको आरोप सहमहामन्त्री डा. महतले लगाए ।
उनले कांग्रेसको पटक पटक ध्यानाकर्षण गराए पनि सरकारले होल्डिङ सेन्टर, क्वारेन्टाइन केन्द्रहरुलाई मापदण्डअनुरुप सञ्चालन नगरेको बताए । काँग्रेसले स्वास्थ्य परीक्षणको दायरा फराकिलो पार्नुपर्नेमा पटक पटक सरकारको ध्यानाकर्षण गराएको छ तर पनि सरकार भने उल्टो परीक्षणको दायरा घटाएर संक्रमणको जोखिम कम भएको भन्दै भ्रामक प्रचार मात्र गरिरहेको उनको भनाई छ ।
सहमहामन्त्री डा.महतले अहिलेकै अवस्थामा उद्योग व्यवसाय सञ्चालन गर्दा थपिने संक्रमण र नागरिक जीवनमाथि आइपर्ने जोखिमका बारेमा सरकार अब गम्भीर हुनुपर्ने उनले बताए । तर पनि यसतर्फ सरकारको ध्यान नगएको महतले बताए ।
संयोजक डा.महतले भने– ‘परिक्षणको दायरा घटाएर संक्रमणको जोखिम कम भएको भ्रामक प्रचार गरिरहेको छ, सरकारले लडाउनको अवधिलाई महामारी नियन्त्रण र यसपछि जनजीवन सहज बनाउनेतर्फ पर्याप्त ध्यान नै दिएन बरु यो भन्दा बढी समय आफ्नै सत्ता जोगाउने खेलमा सरकार लाग्यो ।
