पोखरा । कास्कीको पहिरोमा परी ज्यान गुमाउनेको परिवारलाई १ लाख रुपैयाँ राहत र घाइतेलाई निशुल्क उपचार गरिने भएको छ । जिल्ला विपद् व्यवस्थापन समिति कास्कीको शुक्रबार बसेको बैठकले उक्त निर्णय गरेको हो ।
‘मृतकका परिवारलाई प्रति मृतक १ लाखको दरले तत्काल राहत उपलब्ध गराउने तथा घाइतेको सरकारी अस्पतालमा निशुल्क उपचारको व्यवस्था गरेका छौं’ समितिको निर्णयमा भनिएको छ । समितिले अन्य सरकारी मापदण्डका राहत पनि उपलब्ध गराउने निर्णय गरेको छ ।
कास्कीमा बिहीबारदेखि परेको अविरल वर्षाका कारण विभिन्न ठाउँमा पहिरो जाँदा ७ जनाको मृत्यु भएको छ भने १३ जना घाइते भएका छन् । घाइतेहरुको पोखराकै मणिपाल अस्पताल र पोखरा स्वास्थ्य विज्ञान प्रतिष्ठानमा उपचार भइरहेको छ ।
