काठमाडाैंः लगभग पार्टी विभाजनकाे मोडमा पुगेको नेकपामा अध्यक्ष एबं प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच आज आइतबार पनि छलफल हुँदैछ । बिहान १० बजे बालुवाटारमा हुने भनिएको छलफलमा पछिल्लो विकसित घटनाक्रमका बारेमा छलफल हुने जनाइएको छ ।
शनिबार साँझ प्रधानमन्त्री ओलीले मन्त्रीहरुलाई आआफ्नो कित्ता स्पष्ट पार्न आग्रह गर्नुपछि राजनीतिक घटना नयाँ मोडमा पुगेको छ । दुबै पक्ष पार्टी फुटको अपजस आफूले लिन नचाहेको अवस्था तथा अर्को पक्षलाई गलाउने अभियानले समस्यालाई झनै गिजोल्दै गएको छ ।
ओली पक्ष पनि टसको मस नभएको अवस्था तथा ओली-इतर खेमा जुनसुकै हुर्मत लिएर भएपनि ओलीलाई हटाउने अभियानका कारण कठिन मोडमा पुगेको नेकपाका मुख्य दुई शीर्ष नेताहरुबीच छलफल हुन लागेको हो । शनिबार पनि दुई अध्यक्षबीच छलफल हुने भनिए पनि आआफ्नै गुटगत छलफलका कारण हिजो वार्ता हुन सकेकाे थिएन ।
