काठमाडाैंः प्रधानमन्त्री केपी शर्मा ओलीलाई कोरोना सम्बन्धी सातवटा अन्तरिम आदेशको पालना नगरेको भन्दै सर्वाेच्च अदालतले जवाफ सहित अदालतमा उपस्थित हुन आदेश दिएको छ ।
अधिवक्ता प्रकाशमणि शर्माले दायर गरेको अवहेलना मुद्दामा सुनुवाइ गर्दै मंगलबार न्यायाधीश अनिलकुमार सिन्हाको एकल इजलालले आदेश पालना नगर्नुको लिखित जवाफसहित बाटोको म्याद बाहेक १५ दिनभित्र आफैं उपस्थित हुन आदेश दिएको हो ।
सर्वोच्चको आदेशमा भनिएको छ, ‘उल्लिखित सात वटा अन्तरिम आदेशको पालना कसरी गरिएको छ ? ती आदेश पालना नगर्न कुनै आदेश, निर्णय, निर्देशन, दिइएको हो वा होइन ? तत्ससम्बन्धमा के कसो भएको हो ? यसबारेमा जवाफ पेश गर्नु ।'
सार्वजनिक सरोकारको विषय अन्तरगत दायर भै सरकारका नाममा जारी भएका आदेशको कार्यान्वयन नगरेको भन्दै अधिवक्ता शर्माले प्रधानन्त्रीविरुद्ध अवहेलना मुद्दामा कारबाही गर्न माग गर्दै रिट दायर गर्नुभएको थियो । निवेदकको माग बमोजिमको आदेश जारी हुनु नपर्ने हो? आदेश जारी हुन नपर्ने भए आधार कारणसहित यो आदेश प्राप्त भएको मितिले बाटोको म्याद बाहेक १५ दिनभित्र अदालतमा आफैँ उपस्थित भइ वा आफ्नो कानुनी प्रतिनिधिमार्फत लिखित जवाफ पेश गर्नु‘ न्यायधीश सिन्हाको ईजलासले आदेश दिएको हो ।
कोभिड–१९ का कारण सर्वोच्च अदालतले नियममित कार्य नगरेपछि लकडाउनभर सार्वजनिक सरोकारको विषयमा भने सुनुवाइ जारी राखेको थियो ।
