काठमाडौं । नेपाल पर्यटन बोर्डले आयोजना गरेको ‘जुम एप’ भर्चुअल बैठकमै एउटा अनौठो घटना घटेको छ। सोमवार बैठकमा प्रमुख अतिथि संस्कृति, पर्यटन तथा नागरिक उड्डयन मन्त्री योगेश भट्टराई बोलिरहदा अचानक पोर्न भिडियो खुलेपछि कार्यक्रम स्थगित भएको छ।
पर्यटनसँग सम्बन्धी सुरक्षा निर्देशिका सार्वजनिक गर्न दिउँसो १ बजे ‘जुम एप’ भर्चुअल बैठक आयोजना गरिएको थियो। मन्त्री बोल्न सुरु गरेको एकछिनमै अश्लिल भिडियोहरु भटाभट देखिन थालेपछि सहभागीहरु अचम्मित गर्दै मिटिङ 'लिभ' गरेका थिए।
उक्त जुम मिटिङमा देशभरका २ सयजना बढी पर्यटन व्यवसायी, उद्यमी र संचारकर्मी सहभागी थिए। अनाधिकृत रुपमा भर्चुल मिटिङमा प्रवेश गरेका ‘ह्यारिस’ नामको आईडीबाट यस्तो घटना भएको बताइएको छ।
बोर्डका एक अधिकारीले कसैले ह्याक गरेर यस्तो दृश्यहरु देखाइएको हुनसक्ने बताउँदै यसबारेमा छानबिन भइरहेको जानकारी दिए।
