सुर्खेत। लामो समयदेखि आन्दोलनमा रहेका मध्यपश्चिम विश्वविद्यालयका आंशिक प्राध्यापकहरूले आफ्नो आन्दोलनका सम्पूर्ण कार्यक्रम आइतबारदेखि फिर्ता लिएका छन्। विश्वविद्यालय प्रशासनसँग भएको औपचारिक वार्तामा सहमति जुटेसँगै आन्दोलन स्थगित गरिएको हो।
विश्वविद्यालयद्वारा गठित वार्ता समिति र आंशिक प्राध्यापक संघबीच भएको संवादबाट सहमतिको वातावरण बनेको हो। संघले आन्दोलन फिर्ता लिने निर्णय विश्वविद्यालयले प्रस्तुत गरेको “आंशिक शिक्षकहरूको वस्तुगत अवस्थाको अध्ययन प्रतिवेदन–२०८२” बमोजिम सहमति कार्यान्वयन गरिने प्रतिबद्धतापछि गरेको जनाएको छ।
वार्ता समितिले तयार पारेको सहमतिको दस्तावेज विश्वविद्यालयका प्रमुख पदाधिकारीहरूलाई औपचारिक रूपमा हस्तान्तरण गरिएको छ। संघले अब सहमतिका बुँदाहरूको प्रभावकारी कार्यान्वयनको अपेक्षा राखेको छ।
यस सहमतिसँगै विश्वविद्यालयको शैक्षिक वातावरण सामान्य हुने अपेक्षा गरिएको छ।
