सुर्खेत। वीरेन्द्रनगर बसपार्कमा शुक्रबार राति अज्ञात समूहले धारिलो हतियार प्रयोग गरी एक युवकमाथि साङ्घातिक आक्रमण गरेका छन्। आक्रमणमा परी लेकबेशी नगरपालिका–६ निवासी २२ वर्षीय ललित परियार गम्भीर घाइते भएका हुन्।
जिल्ला प्रहरी कार्यालय सुर्खेतका अनुसार राति ११:५५ बजेतिर दुई जनाको समूह स्कुटरमा आएर परियारमाथि आक्रमण गरी फरार भएका थिए। घटनापछि गम्भीर अवस्थामा रहेका परियारलाई उपचारका लागि तत्कालै नेपालगन्ज रेफर गरिएको प्रहरी नायब उपरीक्षक (डीएसपी) मोहनजंग बुढ्थापाले जानकारी दिए। हाल उनी नेपालगन्जस्थित स्वास्थ्य संस्थामा उपचाररत छन्।
घटनामा संलग्न व्यक्तिहरूको खोजी तीव्र पारिएको प्रहरीले जनाएको छ। पीडितले दिएको हुलिया र घटनाको विवरणका आधारमा अनुसन्धान अघि बढाइएको छ।
डीएसपी बुढ्थापाका अनुसार आक्रमणको कारण हालसम्म स्पष्ट भइसकेको छैन। तर, घटनाको गम्भीरताका कारण प्रहरी टोलीले अनुसन्धानलाई प्राथमिकताका साथ अगाडि बढाइरहेको छ। शङ्कास्पद व्यक्तिहरूको निगरानी र सम्भावित संलग्नहरूको पहिचानमा प्रहरीले सक्रियता बढाएको छ।
