सल्यान। लगातारको वर्षापछि खसेको पहिरोका कारण राप्ती राजमार्ग आइतबार साँझदेखि पूर्ण रूपमा अवरुद्ध भएको छ। कपुरकोट गाउँपालिका–३ चोरखोला क्षेत्रमा ठूलो पहिरो खसेपछि राजमार्ग साँझ ७ बजेदेखि ठप्प भएको हो।
पहिरोका कारण यात्रुवाहक गाडीहरू बीच बाटोमै रोकिएका छन् भने एक गाडीमा क्षति पुगेको प्रहरीले जनाएको छ। वैकल्पिक मार्ग प्रयोग गर्न पनि असम्भव भएपछि यात्रुहरू थप समस्यामा परेका छन्।
जिल्ला प्रहरी कार्यालय सल्यानका प्रहरी निरीक्षक रेसम खत्रीका अनुसार आइतबार दिउँसो पनि पहिरोका कारण राजमार्ग करिब चार घण्टा अवरुद्ध भएको थियो। पहिरो पन्छाएर केहीबेर गाडी चलाइए पनि साँझ पुनः भारी वर्षासँगै पहिरो झरेर बाटो पुनः बन्द भएको उनले जानकारी दिए।
रात परिसकेकाले तत्काल पहिरो हटाउन सकिने अवस्था नरहेको र सडकमा अलपत्र परेका सवारीसाधनलाई वैकल्पिक मार्ग रोज्न सुझाव दिइएको खत्रीले बताए। यद्यपि, वैकल्पिक मार्ग पनि अवरुद्धजस्तै भएकाले समस्या थपिएको छ।
स्थानीय प्रशासन र सुरक्षाकर्मीहरू सोमबार बिहानबाट पहिरो पन्छाउने तयारीमा जुट्ने जनाइएको छ।
