काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने पूर्ववत् पार्टी गतिविधिमा सक्रिय भएका छन्। शुक्रबार रिहा भएका लामिछानेको अध्यक्षतामा आज रास्वपाको केन्द्रीय समितिको बैठक बस्दैछ।
पार्टीका प्रवक्ता मनिष झाले जानकारी दिएअनुसार केन्द्रीय समिति बैठक अपराह्न ४ बजेका लागि तय गरिएको छ। बैठकमा सभापति लामिछानेले केन्द्रीय समिति सदस्यहरूलाई सम्बोधन गर्ने कार्यक्रम रहेको छ।
केन्द्रीय समिति बैठकअघि पार्टीका नेता तथा कार्यकर्ताले सभापति लामिछानेलाई दिउँसो ३ बजे स्वागत गर्ने कार्यक्रम पनि तय गरिएको छ।
शुक्रबार रिहा भएपछि लामिछाने शनिबार चितवनमा आयोजित सभामा सहभागी भई काठमाडौं फर्किएका थिए। त्यसपछि उनले जेनजी आन्दोलनमा सहिद भएका परिवारलाई भेटेर समवेदना व्यक्त गरेका थिए।
सहकारी ठगी प्रकरणमा लामिछाने जेल चलान भएपछि डोलप्रसाद अर्याल रास्वपाको कार्यवाहक सभापतिको जिम्मेवारीमा थिए। शुक्रबार लामिछाने रिहा भएलगत्तै रास्वपाले उनी पार्टी गतिविधिमा पूर्ववत् रूपमा सक्रिय हुने जानकारी सार्वजनिक गरेको थियो।
