काठमाडौँ । निर्वाचन आयोगमा ६५ राजनीतिक दलले समानुपातिक निर्वाचन प्रणालीअन्तर्गतको बन्दसूची बुझाएका छन्।
आयोगका अनुसार मंगलबार बिहानसम्म नेपाली कांग्रेस, नेकपा एमाले र राष्ट्रिय स्वतन्त्र पार्टी (रास्वपा)सहित ६५ दलले बन्दसूची दर्ता गराएका हुन्।
निर्वाचन आयोगले समानुपातिकको बन्दसूची बुझाउन सोमबारसम्मको समय निर्धारण गरेको थियो। तर निर्धारित समयभित्र बन्दसूचीका लागि निस्सा बुझाएका दलहरूले मंगलबारसम्म पनि बन्दसूची बुझाइरहेको आयोगले जनाएको छ।
आयोगका अनुसार समयमै निस्सा लिएका दलहरूको बन्दसूची दर्ता प्रक्रिया जारी रहेको छ। समानुपातिक प्रणालीअन्तर्गत प्रतिनिधित्व सुनिश्चित गर्न दलहरूले संविधान र प्रचलित कानुनअनुसार बन्दसूची पेस गर्नुपर्ने व्यवस्था छ।
