काठमाडौँ । नेपाली कांग्रेसको विशेष महाधिवेशनका सभापतिका दाबेदार गगनकुमार थापाले कांग्रेस कुनै एक समूहको नभई सबैको पार्टी भएको बताएका छन्।
आइतबारदेखि भृकुटीमण्डपमा जारी विशेष महाधिवेशन टुंगिने चरणमा पुग्दा थापाले सामाजिक सञ्जालमार्फत यस्तो धारणा सार्वजनिक गरेका हुन्।
विशेष महाधिवेशनमा सहभागी नेता तथा अर्का महामन्त्री विश्वप्रकाश शर्मासँगको तस्बिर साझा गर्दै थापाले लेखेका छन्, “हामी सबैको हो कांग्रेस।”
भृकुटीमण्डपमा विशेष महाधिवेशन चलिरहेकै बेला पार्टी केन्द्रीय कार्यालय सानेपामा बसेको संस्थापन पक्षको केन्द्रीय समिति बैठकले थापा, शर्मा तथा सहमहामन्त्री फरमुल्लाह मन्सुरलाई कारबाही गर्ने निर्णय गरेको थियो।
यता विशेष महाधिवेशन पक्षधरहरूले भने उक्त निर्णयलाई अस्वीकार गर्दै थापाको नेतृत्वमा नयाँ कार्यसमिति बनाएर अघि बढ्ने तयारी गरिरहेका छन्।
