काठमाडाैँ । नेपाली कांग्रेसका सचेतक निश्कल राईले प्रधानमन्त्रीमाथि नेपाललाई ‘सीमा अतिक्रमणकारी देश’ भनेर प्रस्तुत गर्न खोजिएको आरोप लगाउँदै कडा टिप्पणी गरेका छन्।
राईले सामाजिक सञ्जालमा फैलाइएका केही दाबीहरूलाई लक्षित गर्दै प्रमाणविहीन सामग्रीका आधारमा नेपाललाई गलत रूपमा चित्रण गर्ने प्रयास भइरहेको बताएका छन्। उनले यसलाई राष्ट्रहितविपरीत कदमको संज्ञा दिँदै प्रश्न उठाए— “राष्ट्रको बेइज्जत गर्दा किन कसैलाई आनन्द हुन्छ? यस्तो मानसिकता हामीले किन विकास गर्दैछौं?”
उनका अनुसार प्रधानमन्त्रीले प्रतिनिधिसभामा दिएको अभिव्यक्तिपछि नेपालले समेत भारतको भूमि अतिक्रमण गरेको भन्ने सन्दर्भमा बहस र विवाद उत्पन्न भएको छ।
यसअघि जेठ १७ गते प्रधानमन्त्री बालेन शाह ले प्रतिनिधिसभामा सांसदहरूको प्रश्नको जवाफ दिने क्रममा नेपालले पनि भारततर्फ केही जमिन मिचेको जस्ता विषयमा टिप्पणी गरेको बताइन्छ। सो अभिव्यक्तिपछि विपक्षी दलहरूले त्यसको व्याख्या र प्रमाणबारे प्रश्न उठाउँदै आएका छन्।
सोही विषयलाई उल्लेख गर्दै राईले प्रतिपक्षी दलहरूले लगातार सदनमा “नेपाल सीमा अतिक्रमणकारी देश होइन” भन्ने कुरा स्पष्ट पार्न माग गर्दै आएको बताए। उनले प्रधानमन्त्री स्वयं उपस्थित भएर आफ्नो भनाइबारे स्पष्टीकरण दिनुपर्ने र आवश्यक परे आत्मालोचना तथा माफी माग्नुपर्ने मागसमेत राखे।
उनले सभामुखले यस विषयमा भूमिका खेल्दै प्रधानमन्त्रीलाई सदनमा बोलाएर स्पष्ट जवाफ लिनुपर्ने माग पनि गरेका छन्। राईले सभामुखको अभिभावकीय भूमिकामा जोड दिँदै यस विषयमा रुलिङ आवश्यक रहेको बताएका छन्।
