ललितपुर । ललितपुरको कोन्जोस्योम गाउँपालिका वडा नम्बर २ मा रहेको एनसेल टावरमा अपरिचित ब्यक्तिको समूहले आगो लगाउने प्रयास गरेको छ।
गएराति करिब साढे १० बजेतिर उनीहरूले टावरमा लगेको तारको मुठोमा आगो लगाएर भागेको महानगरीय प्रहरी परीसर जावलाखेलका प्रवक्ता नारायन चिमरीयाले जानकारी दिए। उनका अनुसार उक्त समूहले तारमा आगो लगाएर रातो र कालो तार जडित प्रेसर कुकर छाडेर हिँडेका थिए।
नेपाली सेनाको टोलीले उक्त बम डिस्पोज गरेको छ। वडाध्यक्ष ध्रुब घिमिरेले बिहान सवा ७ बजे बम डिस्पोज गरिएको जानकारी दिए।
स्थानीयले तत्काल आगो निभाएका कारण क्षति नभएको चिमरियाले बताए। एनसेलको टावरसँगै ४र५ वटा घर पनि छन्।
घटनास्थल कोन्जोस्योम गाउँपालिका कार्यलयबाट करिब २० किलोमिटर दक्षिण पश्चिम पर्छ।
आगजनीपछि भाग्दा मकैबारी माडिएको देखिएकाले समूह ठूलै रहेको प्रहरीको अनुमान छ।घटनामा सरकारद्वारा प्रतिबन्धित विप्लव समूहको संलग्नताको शंका प्रहरीले गरेको समाचार अन्नपुर्ण पोष्ट दैनिकमा प्रकाशित छ ।
