काठमाडौं । भूमिगत राजनीतिबाट केही समयअघि खुला भएका मधेसवादी नेता डा। सीके राउतको जीवनीमा चलचित्र निर्माण सुरु भएको छ । चलचित्रको नाम पनि ‘डा. सीके राउत’ नै राखिएको छ । चलचित्रको टिजर बुधबार काठमाडौंमा सार्वजनिक गर्दै छायांकन सुरु गरिएको छ ।
आफ्नो जीवन कथालाई चलचित्रमा उतारेर डा। सीके राउत बनाउँदा आफूलाई खुसी लागेको डा। राउतले कार्यक्रममा बताए । चलचित्रको स्क्रिप्ट मन परेको र निर्माण टिमको जोसजाँगर देखेर आफ्नो जीवन कथालाई चलचित्र निर्माणका लागि अनुमति दिएको नेता राउतले बताए ।
‘मलाई भेट्न आउँदा खासै विश्वास लागेको थिएन । पछि उहाँहरूले पटक–पटक भेट्न खोज्दा समय दिएँ र पछि चलचित्र निर्माण सुरु भएका कारण राम्रो मान्छे भेटें भन्ने लाग्यो,’ राउतले कार्यक्रममा भने ।
चलचित्रमा ५० प्रतिशत राउतको जीवन कथा र ५० प्रतिशत काल्पनिक कथा राखिएको छ । यो चलचित्रलाई आगामी छठ पर्वमा प्रदर्शन गरिने जानकारी निर्माण घोषणा समारोहमा गराइयो ।
विजेता गिरीको प्रस्तुति रहने चलचित्रलाई सन्तोष साहले निर्देशन गर्नेछन् । चलचित्रमा भोजपुरी चलचित्रका अभिनेता परदेशी शाहले डा। सीके राउतको भूमिका निभाउनेछन् । चलचित्रमा परदेशीसँगै ध्रुव कोइराला, पुकार भट्टराई, विशाल पहाडी, किरण थापासहितको मुख्य भूमिका रहनेछ । यो चलचित्रलाई पवन गौतमले छायांकन गरिरहेका छन् । रेवन्तविक्रम थापाको द्वन्द्व निर्देशन रहने चलचित्रमा रामजी लामिछाने र लिगेश भट्टराईको कोरियोग्राफी रहनेछ । चलचित्र नेपाली भोजपुरी र हिन्दी भाषामा बन्ने समाचार राजधानी दैनिकमा प्रकाशित छ ।
