काठमाडौं । नेपाल कम्युनिष्ट पार्टी (नेकपा) का वरिष्ठ नेता झलनाथ खनालले आफ्नो विद्यार्थी संगठन सँग नेविसंघले हार्ने निश्चित भएपछि नेपाली कांग्रेसले स्ववियू चुनाव सार्नका लागी प्रस्ताव अघि सारेको बताएका छन् ।
सोमबार स्वतन्त्र विद्यार्थी युनियन, आरआर क्याम्पसले काठमाण्डौमा आयोजना गरेको रचनात्मक कार्यक्रममा बोल्दै खनालले स्ववियु निर्वाचन सार्न कांग्रेसले चलखेल सुरु गरेको भन्दै उनले स्ववियू चुनाव पछि धकेल्ने प्रयास नगर्न कांग्रेसलाई सचेत समेत गराए ।
नेता खनालले स्ववियू चुनाव तोकिएकै मितिमा सम्पन्न गर्न पनि सरकारसँग माग गरे । उनले प्रमुख प्रतिपक्ष दल नेपाली कांग्रेसलाई आन्दोलन छोडेर देश निर्माणको अभियानमा जुटन समेत आग्रह गरे ।
खनालले देशको आर्थिक उन्नतिका लागि रचनात्मक काम गर्न छाडेर आन्दोलन गरिरहे कांग्रेस आफै कमजोर हुदैँ जाने चेतावनी दिए । देशमा राजनीतिक क्रान्ति सकिएकाले अब आर्थिक उन्नतिको दिशामा केन्द्रित हुने बेला आएको वरिष्ठ नेता खनालको भनाई छ ।
