बीबीसी । कार्डिफ सिटीका फुटबलर इमिलियानो साला सवार विमानको भग्नावशेष इङ्गिलस च्यानलमा फेला परेको छ ।
गत जनवरी २१ मा फ्रान्सको नान्टेसबाट कार्डिफ आउने क्रममा अर्जेन्टिनी स्ट्राइकर र पाइलट डेभिड इबोटसन सवारी पिपर मालिबु एन २६४डीबी विमान बीच बाटोमै बेपत्ता भएको थियो ।
निजी लगानीमा विमानको खोजीमा लागेका डेभिड मर्नसले गुएर्नसे नजिकै आइतबार विमानको भगनावशेष फेला पारेका थिए ।
उनी भन्छन्, ‘पानीमूनि ठूलो भगनावशेष फेला परेको छ । अहिले म यतिमात्र भन्न सक्छु ।’
रेडियो फोरको एक कार्यक्रममा बोल्दै उनले विमानको भगनावशेष पानीको सतहभन्दा ६३ मिटर तल रहेको बताएका छन् ।
२८ वर्षीय अर्जेन्टिनी साला गत जनवरी २१ मा फ्रान्सको नान्टेसबाट नयाँ क्लब कार्डिफ सिटी जान वेल्सका लागि उडेका थिए । उनले उडान भर्नुभन्दा २ दिनअघि मात्रै कार्डिफ सिटीमा अनुबन्ध हुन सम्झौता गरेका थिए ।
साला बेपत्ता भएपछि उनको खोजी तत्कालै थालिए पनि ८० घन्टासम्मको खोजीपछि पनि उनको टुंगो नलागेपछि २ दिन खोजी रोकेर पुनः निजी क्षेत्रको पहलमा उनको खोजी थालिएको थियो ।
अब एयर एक्सिडेन्टस् इन्भेस्टिगेसन ब्रान्चले भगनावशेषलाई निकाल्नेछ ।
यसबारे साला र डेभिडको परिवारलाई पनि जानकारी दिइएको छ ।
