काठमाडौँ । नेपाली राष्ट्रिय टोलीका अलराउन्डर आदिल अन्सारी र राष्ट्रिय टिमका पूर्वखेलाडी महबुब आलमसहित पाँच जनाले सफाइ पाएका छन् ।

जिल्ला अदालत काठमाडौंले उनीहरुलाई सफाइ दिएको हो । न्यायाधीश कमलप्रसाद पोखरेलको इजलासले उनीहरुसहित ५ जनामाथि स्पट फिक्सिङको दाबी नपुगेको भन्दै सफाइ दिएको जनाएको छ ।

उनीहरुलाई गत वर्ष काठमाडौंमा भएको नेपाल टी–२० लिगमा स्पट फिक्सिङ गरेको आरोप लागेको थियो । पक्राउ परेपछि उनीहरु गतवर्ष तीन लाख रुपैयाँ धरौटीमा छुटेका थिए ।

आदिलले नेपालबाट ६ ओडीआई र ८ टी–२० आई खेल खेलेका छन् । विष्फोटक ब्याटरको छवि बनाएका आदिल उक्त आरोपछि नेपाली टोलीमा देखा परेका छैनन् ।

महबुब आलमले आदिलसहित केही क्रिकेटरलाई स्पट फिक्सिङको प्रस्ताव गरेको आरोप लागेको थियो ।

महबुबले २००८ मा मोजाम्बिकविरुद्ध ७.५ ओभरमा १ मेडन सहित १२ रन खर्चेर १० विकेट लिँदै गिनिज बुकमा नामसमेत लेखाएका थिए ।

काठमाडौं । नेपाल टी–ट्वान्टी लिगमा स्पट फिक्सिङको आरोपमा पक्राउ परेका राष्ट्रिय टोलीका सदस्य आदील आलम र पूर्व खेलाडी महबुब आलम थुनामुक्त भएका छन् ।

एक महिनादेखि हिरासतमा रहेका आदील र महबुब जिल्ला अदालत काठमाडौंको आदेशबमोजिम ३ लाख धरौटी बुझाएर रिहा भएका हुन् ।

आदील र महबुब धरौटीमा छुटेको नेपाल क्रिकेट संघ (क्यान) का म्यानेजर विनोद दासले जानकारी दिए ।‘आदिलसहित तीन जनालाई धरौटीमा छाडेको हामीले पनि जानकारी पाएका छौं । तीन लाख धरौटीमा छुटेका थिए ।’, दासले भने, ‘यो क्रिकेट र स्पटको कुरा हो । आदिलले पूर्ण रुपमा फैसला नपाउन सम्म नेपाली क्रिकेट टोलीबाट खेल्ने सम्भावना कम हुन्छ ।’

अदालतले बुधबार थुनछेक बहस गर्दै उनीहरुलाई धरौटीमा छाड्न आदेश दिएको थियो। सो प्रकरणमा ५ जनालाई प्रतिवादी बनाइए पनि २ जना भने फरार रहेका छन् ।

केन्द्रीय अनुसन्धान ब्युरो (सीआईबी)ले ७ विदेशी र ५ नेपालीलाई प्रतिवादी बनाएर मुद्दा दर्ता गर्न राय दिएपनि काठमाडौँ जिल्ला सरकारी वकिल कार्यालयले भने नेपालीलाई मात्र मुद्दा दर्ता गरेको थियो ।

काठमाडौँ । क्रिकेटर आदिल अन्सारीले आफूमाथि लागेको स्पट फिक्सिङको आरोप अस्वीकार गरेका छन् । सोही आरोपमा पक्राउ परेका अन्सारीले फिक्सिङका लागि आफूलाई अप्रोच आएको भए पनि त्यसलाई आफूले स्वीकार नगरेको बताएका छन् ।

काठमाडौँ जिल्ला सरकारी वकिलसँग दिएको बयानमा उनले आफूलाई भएको अप्रोचका बारेमा एन्टी करप्सन युनिटलाई जानकारी दिएको समेत बताएका छन् । उनले खेलका क्रममा फ्याँकेको ‘नो बल’ नियतवश नभएको बयान दिएका छन् ।

उनले दिएको बयान यस्तो छ:

हाल सम्पन्न भएको नेपाल टी–२० लिग शुरु भएको केही दिनपछि सामान्य चिनजान भएका भारतका समिर शेख भन्ने व्यक्तिले म पनि लिगमा खेल्न लागेको थाहा पाई मलाई मैले प्रयोग गर्ने मोबाइल नम्बरमा हेलो भनी मेसेज पठाएका थिए ।

सोपश्चात ह्वाट्स एपमै कल गरी ‘मेरो लागि एउटा नो बल र वाइड बल फालिदेउ, त्यसबापत १ लाख रकम दिनेछु’ भनी प्रस्ताव राखेका थिए । तर मैले निजलाई तत्कालै यस्तो विषयमा मसँग कुरा नगर्नु भनि निजसँग कुरा गर्न छाडिदिएको थिएँ ।

मैले निजको एप्रोच तत्कालै अस्वीकार गरेको हुँ र निजले भनेअनुसार खेल खेलेको पनि छैन । सो विषयमा नेपाल क्रिकेट संघका म्यानेजर विनोद दासलाई समेत जानकारी गराएको थिएँ ।

सन् २६ डिसेम्बर २०२२ मा भएको खेल खेल्ने क्रममा बायाँ भागको कम्मरको नशामा समस्या आएपछि मैले तत्काल टीम कोचलाई जानकारी गराएपछि हाम्रो टीमको फिजियोथेरापिस्ट कर्मा छोडोन गुरुङले मलाई सामान्य उपचार गरिसकेपछि म पुनः खेल खेल्नको लागि मैदानमा गएको थिएँ ।

सो पश्चातको खेलमा पनि मैले अलराउण्डरको रुपमा खेल खेलि बलिङ गरेको थिएँ । हाम्रो टिममा तिव्रगतिको बलर नभएको कारण मलाई नै बलिङ गर्नको लागि कोचले निर्देशन दिएको कारण मैले बलिङ गरेको थिएँ ।

मलाई बायाँ भागको कम्मरमा समस्या आएकै कारण मिति २०७९ पौस १२ गते सम्पन्न भएको काठमाडौं नाइट्स र जनकपुर रोयल्सबीचको खेलको बाह्रौँ ओभर र मिति २०७९ पौष १४ गते सम्पन्न भएको जनकपुर रोवल्स र फार वेस्ट यूनाईटेड बीचको खेलको छैठौं ओभरमा दुखाईको कारण एक नो बल र एक वाईड बल हुन गएको हो । मैले समिर शेखले भनेअनुसार बलिङ गरेको होइन ।

सामान्य रकम प्रस्ताव गरेको हुँदा मैले यसमा निजले मसँग मजाक गरेका होलान् भनि गम्भीरतापुर्वक लिएको थिइनँ । खेलकै दौरान मलाई कल आएको एक-दुई दिनपछि विभिन्न सञ्चारमाध्यमहरुमा म्याच फिक्सिङ र स्पट फिक्सिङका बारेमा समाचार प्रकाशन-प्रसारण भएको र सर्वसाधारण समेतले यस बारेमा चर्चा–परिचर्चा हुन थालेपछी समिर शेखले मलाई फिक्सिङमा प्रयोग गर्न खोजेको हुनसक्छ भनि नेपाल क्रिकेट संघका म्यानेजर विनोद दासलाई उक्त एप्रोचको बारेमा जानकारी गराएको हुँ ।

निजको सल्लाह बमोजिम सोको भोलिपल्ट एन्टी करप्सन युटिन म्यानेजर बिर सिंहलाई जानकारी गराएको हुँ ।

मैले निज समिर शेखले भने अनुसार खेल नखेलको र निजसँगबाट रकम समेत लिएको छैन । तर निज समिर शेखले मजाक मजाकमा नो बल र वाईड बल फाल्न भनेपछि निजलाई मैले अब यस्तो नगर्नु भनि चेतावनीसमेत दिएर निजसँग कुरा गर्न छाडेको थिएँ ।

काठमाडौं । राष्ट्रिय क्रिकेटर मोहम्मद आदिल आलमले नेपाल टी–२० लिगमा दुई खेलका दुई वटा ओभरमा स्पट फिक्सिङ गरेको प्रहरी केन्द्रिय अनुसन्धान ब्युरो (सिआईबी) ले जनाएको छ । आदिलले मेहबुब आलमले प्रस्ताव गरे बमोजिम स्पट फिक्सिङ गरेको बताईएको छ ।

स्पट फिक्सिङमा संलग्न भएका मेहबुबबाट आदिललाई एउटा नो बल र एउटा वाइड फाल्न एप्रोच भएको सिआईबीले बताएको छ । जनकपुर रोयल्सबाट खेलेका आदिलले पुस १२ गते काठमाडौं नाइट्स र १४ गते फार वेष्ट युनाइटेडविरुद्धको खेलहरुमा मेहबुबको प्रस्ताव कार्यान्वयन गरेका थिए ।

आदिलले पुस १२ गते भएको काठमाडौं नाइट्सविरुद्धको खेलमा ४ ओभरमा दुई वाइड र एक नो बल गरी ३८ रन खर्चेर १ विकेट लिएका थिए । उनले ११.१ ओभरमा नो बल खेलेका थिए । त्यसको लगत्तै अर्को बलमा वाइड गरेका थिए ।

पुस १४ गते फारवेष्ट युनाइटेडविरुद्धको खेलमा भने आदिलले एक ओभरमात्र बलिङ गर्न पाए । पावर प्लेको अन्तिम ओभर खेल्न पाएका आदिलले पहिलो बल नो बल फाले भने लगत्तैको दोस्रो बल वाइड गरे ।

आदिलले कसले फिक्सिङको प्रस्ताव गरेको र कति रुपैयाँको सहमति भएको भन्नेबारे भने केहि खुलाएका छैनन् । आदिल सोमबार गृहनगर सप्तरीको राजविराजबाट पक्राउ परेका थिए।

काठमाडौँ । नेपालको टि–२० लिगमा स्पट फिक्सिङमा संलग्न भएको आरोपमा दुई क्रिकेट खेलाडी पक्राउ परेका छन् ।

केन्द्रीय अनुसन्धान ब्युरो (सीबीआई) को टोलीले राष्ट्रिय क्रिकेट टोलीका सदस्य एवं अलराउन्डर आदिल अन्सारी र पूर्वराष्ट्रिय क्रिकेट खेलाडी मेहबुब आलमलाई पक्राउ गरेको हो ।

उनीहरुले क्यानले व्यावसायिक तथा रणनीतिक साझेदार बनाएको सेभेन थ्री स्पोर्टसका मालिक जतिन अहुवालियाको योजना अनुसार स्पट फिक्सिङमा सहयोग गरेको बताईएको छ ।