काठमाडौँ। एएफसी एसियन कप छनोट फुटबल प्रतियोगिताअन्तर्गत समूह ‘एफ’को अन्तिम खेलमा नेपाल लाओससँग पराजित भएको छ ।

लाओसको नेसनल रङ्गशालामा आज भएको खेलमा नेपाल १–० गोलअन्तरले पराजित भएको हो । खेलको पहिलो ‘हाफ’सम्म प्रतिरक्षा गरिरहेको नेपालले दोस्रो ‘हाफ’मा गोल खायो । लाओसका कप्तान बोउनफचान बोन्कोंगले खेलको ४८ औँ मिनेटमा गोल गरेका थिए ।

नेपालले गोल फर्काउन निकै प्रयास गरे पनि अन्ततः हार बेहोर्नुपर्यो । नेपाल एसियन कप छनोटबाट यसअघि नै बाहिरिसकेको थियो । समूह ‘एफ’मा नेपालले छ खेलबाट तीन अङ्क मात्र जोडेको थियो । रासस

काठमाडौँ। एएफसी एसियन कप छनोट अन्तर्गत भएको खेलमा नेपाल पराजित भएको छ ।

छनोटको समूह एफमा रहेको नेपाल मलेसियाको क्वालालम्बुरस्थित बुकित जलिल नेसनल स्टेडियममा मंगलबार भएको खेलमा घरेलु टोलीसँग १–० गोलले पराजित भयो । खेलको ५६औं मिनेटमा मलेसियाका फैसल हलिमले गरेको गोल नै निर्णायक बन्यो ।

तेस्रो चरणको छनोटमा नेपालका यो लगातार पाँचौं हार हो र शून्य अंकमा चार टिममध्ये पुछारमा छ । मलेसियाको भने यो लगातार पाँचौं जित हो । यससँगै १५ अंकमा मलेसिया अबको एसिया कपमा छनोटको नजिक पुगेको छ ।

काठमाडौँ। एएफसी एसियन कप छनोटअन्तर्गत तेस्रो चरणको दोस्रो खेलमा नेपाल घरेलु टोली लाओसँग पराजित भएको छ ।

न्यु लाओस राष्ट्रिय रङ्गशालामा भरखरै सम्पन्न खेलमा लाओसँग नेपाल २–१ गोलअन्तरले पराजित भएको हो । अन्तरराष्ट्रिय फुटबल प्रतियोगितामा नेपाल लाओसँग पहिलो पटक पराजित भएको हो ।

लाओसको जितमा दामोथ थोङखामसाभाथ र पिटर पान्थावोङले समान एक एक गोल गरे । नेपालविरूद्ध लाओसले खेलको १३औँ मिनेटमा पहिलो अग्रता लियो । लाओसका लागि दामोथले गोल गरे । त्यसपछि खेलको दोस्रो हाफ सुरु भएको चौथो मिनेटमा नेपालले दोस्रो गोल खायो । लाओसका पिटरले गोल गर्दै टोलीलाई दोस्रो अग्रता दिलाए ।

खेलमा २–० गोलले पछि परेको नेपालले खेलको ७१औँ मिनेटमा एक गोल फर्कायो । नेपालका मनिष डाँगीलाई लाओसका खेलाडीले बक्सभित्र खेलको ७१औँ  मिनेटमा फाउल हाने । त्यसपछि नेपालले पेनाल्टीको अवसर प्राप्त ग¥यो । सोही पेनाल्टीलाई सदुपयोग गर्दै मनिषले गोल गरे ।

त्यसपछि खेलमा गोल हुन सकेनन् र अन्ततः लाओसले नेपालमाथि २–१ गोलको एतिहासिक जित दर्ता ग¥यो । यसअघि नेपाल पहिलो खेलमा मलेसियासँग २–० ले पराजित भएको थियो । दुई खेलको समाप्तिमा नेपालले अङ्कको खाता खोल्न सकेको छैन ।

यसैगरी नेपाल र लाओस यसअघि छ पटक आमने सामने भएका थिए । जसमा नेपालले चार खेलमा लाओसलाई हराउँदा दुई खेल बराबरीमा सकिएका थिए ।

नेपाल सम्मिलित समूहमा लाओस, मलेसिया र भियतनाम रहेका छन् । प्रतियोगितामा समूह विजेताले सन् २०२७ मा साउदी अरेबियामा हुने १९औँ एसियन कप फुटबल प्रतियोगितामा भाग लिन पाउने छन् । नेपालले अब आफ्नो तेस्रो खेल आगामी अक्टोबरमा भियतनामसँग खेल्नेछ ।
रासस

काठमाडौँ । एएफसी यू–२० महिला एसियन कप फुटबल छनोटको दोस्रो चरण खेल्न म्यान्मा पुगेका नेपाली टोलीले आज साँझ घरेलु टोली म्यान्मासँग प्रतिस्पर्धा गर्दैछ ।

नेपाल र म्यान्माबीचको खेल नेपाली समयअनुसार साँझ ५:४५ बजे सुरु हुनेछ । नेपाल छनोटको समूह ‘बी’ मा रहेको छ । नेपालको समूहमा चीन, म्यान्मा र चाइनिज ताइपेइ छन् ।

नेपालले प्यालेस्टाइनमा भएको पहिलो चरणमा घरेलु टोली प्यालेस्टाइन र उत्तरी मरियाना आइल्यान्डलाई समान ६–० गोलअन्तरले पराजित गर्दै दोस्रो चरणमा प्रवेश गरेको थियो ।

नेपाली टोलिका प्रशिक्षक यमप्रसाद गुरुङले पहिलो चरणको सफलताले टिमको मनोबल बढाएको जनाउँदै हरेक खेल जित्नकै लागि खेल्ने बताउनुभयो । उहाँले भन्नुभयो, “फिफा वरियतामा हामीभन्दा माथि भएका टिम छन् तर हामी उच्च मनोबलका साथ मैदान उत्रने छौँ ।”

नेपाली टोलीको गोलरक्षकमा कविता विक, लीला जोशी र सावित्री किसान छन् भने डिफेन्डरमा सविना चौधरी, तुलसा बोहरा, सुनिता भुलान, सिमरन राई, दिव्या यस्माली मगर, प्रतिक्षा चौधरी, सजनी थोकर र कुमारी तामाङ छ्न ।

यसैगरी मिडफिल्डरमा सरस्वती हमाल, मनमाया दमाईं, सुनकला राई, दीपा शाही, हिमा रावत, सुस्मा जीटी, सारा बज्राचार्य र अञ्जली मचामासी छन् । फरवार्डमा गरिमा राई, अमिषा कार्की, ममता पुन र सन्दिपा भोलान छन् ।

यसैगरी नेपाले यही जेठ २५ गते चीनसँग खेल्नेछ भने यही जेठ २७ गते चाइनिज ताइपेइसँग खेल्नेछ ।

काठमाडौं । एएफसी यू-२० महिला एसियन कप छनोटको पहिलो खेलमा नेपालले आज प्यालेस्टाइनसँग भिड्दैछ ।

प्यालेस्टाइनको फैजल अल हुसेनी अन्तराष्ट्रिय रंगशालामा हुने खेल नेपाली समय अनुसार साँझ ६:४५ बजे सुरु हुनेछ ।

नेपाल आजको खेलमा प्यालेस्टाइनलाई हराएर सुखद सुरुआत गर्न चाहन्छ ।

समूह ‘बी’मा नेपालसँगै प्यालेस्टाइन र नर्दन मारियाना आइल्याण्ड रहेको छ । समूह ‘बी’मै रहेको युएईले भने प्रतियोगिताबाट नाम फिर्ता गरिसकेको छ ।

नेपालले दोस्रो खेल सोमबार नर्दन मारियानासँग खेल्नेछ । प्रतियोगिताको समूह विजेताले दोस्रो चरणको छनोटमा स्थान बनाउने छन् ।

दोस्रो चरणको छनोट खेल जुन ३ देखि ११ सम्म हुनेछ ।दोस्रो चरणबाट उत्कृष्ट ४ टोलीले उज्वेकिस्तानमा हुने यू-२० महिला एसियन कप खेल्नेछ ।

नेपाली टोली:

गोलकिपर: कविता विक, सावित्री किसन, लिला जोशी

डिफेन्डर: सबिना चौधरी, हिमा रावत, सरु हमाल, सुनिता भुलन, दिव्या यस्माली मगर, प्रतिक्षा चौधरी, कुमारी तामाङ

मिडफिल्डर: तुलसा बोहरा, जेनिफर राना, सारा बज्राचार्य, सुनकला राई, मनमाया दमाई, प्रीति राई, अञ्जली माचामासी, सरस्वती हमाल, दीपा शाही

फरवार्ड: गरिमा राई, अमिषा कार्की, ममता पुन, सदिपा भोलन

काठमाडौं । अखिल नेपाल फुटबल संघ (एन्फा) ले एएफसी यू–२० महिला एसियन कप छनोट खेल्ने राष्ट्रिय महिला टोलीलाई बिदाइ गरेको छ ।

प्यालेस्टाइनमा हुने खेलमा सहभागी टोलीलाई एन्फाले बिदाइ गरेको हो । नेपाली टोली आइतबार नै त्यसतर्फ प्रस्थान गर्ने छन् ।

छनोटको पहिलो चरणमा नेपाल समूह ‘बी’मा परेको छ । नेपालसँगै आयोजक प्यालेस्टाइन, युएई र नर्दन मारियाना आइल्याण्ड समूह ‘बी’मा रहेको छ ।

नेपालले पहिलो खेल ८ मार्चमा घरेलु टोलि प्यालेस्टाइनविरुद्ध खेल्नेछ ।

छनोटबाट समूह विजेताले दोस्रो चरणमा स्थान बनाउने छन् । दोस्रो चरणका उत्कृष्ट ४ टोलीले उज्वेकिस्तानमा हुने यू(२० महिला एसियन कप खेल्नेछ ।

नेपाली टोली 

गोलकिपर: कविता विक, सावित्री किसन, लिला जोशी

डिफेन्डर: सबिना चौधरी, हिमा रावत, सरु हमाल, सुनिता भुलन, दिव्या यस्माली मगर, प्रतिक्षा चौधरी, कुमारी तामाङ

मिडफिल्डर: तुलसा बोहरा, जेनिफर राना, सारा बज्राचार्य, सुनकला राई, मनमाया दमाई, प्रीति राई, अञ्जली माचामासी, सरस्वती हमाल, दीपा शाही

फरवार्ड: गरिमा राई, अमिषा कार्की, ममता पुन, सदिपा भोलन

काठमाडौं । कुवेतमा सम्पन्न एएफसी एसियन कप छनोट अन्तर्गत तेस्रो चरणको प्रतियोगितामा सहभागि भएर नेपाली राष्ट्रिय फुटबल स्वदेश फर्किएको छ ।

चीनमा आयोजना हुने एसियनकपको छनोटका लागि कुवेत भ्रमण गरेको नेपाली टोली बिहीबार विहान त्रिभुवन अन्तर्राष्ट्रिय विमानस्थलमा ओर्लिएको हो । टोली स्वदेश फर्किए पनि मुख्य प्रशिक्षका अबदुल्लाह अलमुताइरी भने नेपाल फर्किएका छैनन् । तीन महिनाको विदामा प्रशिक्षक कुवेतमा नै रहेका हुन । तीन खेल खेल्दा नेपाली टोलीले कुनै पनि खेलमा सुखद नतिजा निकाल्न सकेन । सन्तोषजनक प्रदर्शन गर्न नसकेको नेपाली टोलीका कप्तान नवयुग श्रेष्ठले अन्तर्राष्ट्रिय विमानस्थलमा ओलिएपछि नयाँ खेलाडीको प्रदर्शन सन्तोषजनक भएको बताए । केही सिनियर खेलाडी विना छनोट खेल्न गएको नेपाली टोलीबाट केही नयाँ खेलाडीले सुरुआतमा केही डराएर खेलेको तर निरन्तरको अभ्यासपछि भने सबै खेलाडीले राम्रो खेलेको बताए ।

‘टिममा प्रायजसो नयाँ भाइहरु रहेका छन् । उनीहरुको प्रदर्शन चित्त बुझ्दो छ । विवाद नेपालमा भए पनि भ्रमण गरिसके पछि विर्सियौं । केही सिनियर खेलाडी विना जाँदा सुरुआतमा नयाँ खेलाडीले डराएको जस्तो प्रदर्शन गरे । तर निरन्तरको अभ्यास पछि उनीहरुमा पनि आत्मबल बढ्यो ।’

नियमिति कप्तान तथा गोलकिपर किरण चेम्जोङसहित १० सिनियर खेलाडी विना भ्रमणमा निस्किएको नेपाली टोलीमा राम्रो प्रदर्शनका लागि अनुभवि खेलाडीको अभाव महसुस भएको बताए ।

‘भइरहेका खेलाडी टिममा नपर्दा केही फरक त परिहाल्छ । नयाँ खेलाडीले राम्रो खेलेर प्रमाणित त गरे तर अनुभवि खेलाडी टोलीमा भएको प्रदर्शन अलि राम्रो हुन्थ्यो । कठिन समूह अटाएका हामीले अनुभवि खेलाडी भएको अवस्थामा नतिजा केही फरक हुने अनुमान गर्न सकिन्छ ।’

यस्तै नेपाली टोलीका सदस्य पुजन उपर्कोटीले युवा टोलीसहितको भ्रमण नयाँ अनुभव लिने अवसर भएको बताए । उता ४० वर्ष पछि नेपालले कुवेत विरुद्ध गोल गर्दै इतिहास बनाएका दर्शन गुरुङले बलियो टोलिविरुद्ध गोल गर्न पाउँदा खुसी लागेको बताए ।

छनोट प्रतियोगिताभर नेपालले कुल १३ गोल खाँदा एक गोल फर्कायो । पहिलो खेलमा जोर्डनसँग २–० ले पराजित भएको थियो । फिफा वरियतामा नेपालमा भन्दा धेरै माथि रहेको कुवेतविरुद्ध नेपालले चार गोल खाँदा एक गोल इन्जुरी समयमा गोल फर्काएको थियो । उक्त गोल नेपाली कुवेतविरुद्ध करिब चार दशकपछि फर्काउन सफल भएको थियो ।

एकमात्र गोल नेपालका युवा खेलाडी दर्शन गुरुङले गरेका थिए । लगातार दुई खेलमा पराजय पश्चात एएफसी एसियनकपको सम्भावन टरेको नेपाली टोलीले अन्तिम खेलमा इन्डोनेसियासँग खेलेको थियो । उक्त खेलमा नियमिति कप्तात नवयुग श्रेष्ठको स्थानमा पुजन उपकोटीले कप्तानको जिम्मेवारी लिएका थिए ।

सोही खेलमा नेपालले लज्जास्पद हार भोगेको थियो । ७–० को फराकिलो हारसँगै छनोटको भ्रमण सकाएको थियो ।

काठमाडौं । एएफसी एसियन कप छनोटको तेस्रो चरण अन्तर्गत नेपालले आज (मंगलबार) इन्डोनेसियाविरुद्ध खेल्दैछ ।

कुवेतको जाबिर अल अहमद स्टेडियममा नेपालले इन्डोनेसियाविरुद्ध तेस्रो तथा अन्तिम खेल खेल्न लागेको हो । नेपाल र इन्डोनेसियाबीचको खेल नेपाली समय अनुसार राति १ बजे सुरु हुनेछ ।

नेपाल पहिलो जितको खोजीमा समेत रहेको छ । यसअघि नेपाल
पहिलो खेलमा नेपाल जोर्डनसँग २–० ले तथा दोस्रो खेलमा आयोजक कुवेतसँग ४–१ गोलले पराजित बनेको थियो ।

छनोटको समूह ‘ए’ मा रहेको नेपाल अंक विहीन रहदै पुछारमा रहेको छ । इन्डोनेसिया २ खेलमा ३ अंक जोडेर दोस्रो स्थानमा रहेको छ । यस्तै, दुई खेलमा दुई जितसहित जोर्डन तालिकाको पहिलो स्थानमा छ । कुवेत ३ अंकसहित तेस्रो स्थानमा रहेको छ ।

नेपालको एसियन कपमा छनोट हुने सम्भावना समाप्त भईसकेको छ । नेपालले अन्तिम खेलमा जित निकालेर सुखद अन्त्य गर्न चाहन्छ ।

समूहको शीर्ष टोलीले एसियन कपमा स्थान बनाउने भने उत्कृष्ट हुने दोस्रो टोलीले पनि एसियन कप खेल्न पाउनेछ ।

काठमाडौं । एएफसी एसियन कप छनोटको तेस्रो चरण अन्तर्गत नेपालले आज (बुधबार) राति जोर्डनको सामना गर्दैछ । कुवेतको जाबिर अल अहमद मैदानमा नेपाल र जोर्डनबीचको खेल नेपाली समयअनुसार राति १ बजे सुरु हुनेछ ।

नियमित कप्तान किरण चेम्जोङसहितका ११ सिनियर खेलाडी बिना कुवेत पुगेको नेपाली टोलीलाई बलियो प्रतिद्वन्द्वी जोर्डनविरुद्धको खेल चुनौतिपूर्ण हुनेछ ।

प्रि म्याच कन्फरेन्समा नेपालका मुख्य प्रशिक्षक अबदुल्लाह अलमुताईरीले जोर्डनविरुद्ध दबाब रहित खेल्ने बताएका छन् । किरणको अनुपस्थितिम्मा कप्तानीको जिम्मेवारी नवयुग श्रेष्ठलाई दिइएको छ । श्रेष्ठले आफ्नो उत्कृष्ट प्रदर्शन दिने र सबै कुरा प्रदर्शनमा निर्भर रहने बताएका छन् ।

जोर्डन फिफा वरियताको ९१ औं स्थानमा रहको छ भने नेपाल १६८ औं स्थानमा छ । यस्तै, नेपाली टिममा युवा खेलाडीहरुको बाहुल्यता रहेकाले प्रशिक्षक अबदुल्लाह अलमुताइरीको जोर्डनबिरुद्धको खेल अग्नि परीक्षाको रुपमा हेरिएको छ । नेपाल र जोर्डनबीच हालसम्म ४ पटक प्रतिष्पर्धा भएको छ । तर, नेपालको नतिजा सुखद छैन । नेपालले जोर्डनबिरुद्ध तीन खेल गुमाएको छ । एक खेलभने बराबरी खेलेको छ ।

विश्वकप छनोट अन्तर्गत नै नेपालले सन् २०११ को जुलाईमा जोर्डनसँग खेलेको थियो । जुलाई २३ मा जोर्डनको मैदानमा भएको खेलमा नेपाल ९–० ले पराजित भएको थियो । तर, २०११ को जुलाई २८ मा नेपालमा भएको खेलमा नेपालले जोर्डनलाई १–१ गोलको बराबरीमा रोकेको थियो । यही खेल नै चार भेट मध्येको सुखद नजिता हो ।

नेपालले जोर्डनसँग २०१९ को अक्टोबरमा खेलेको थियो । विश्वकप छनोट अन्तर्गत नै नेपालले जोर्डनसँग उसैको मैदानमा खेलेको थियो । उक्त खेलमा नेपाल ३–० ले पराजित भएको थियो । पछिल्लो पटक नेपालले जोर्डनसँग फिफा विश्वकप छनोट तथा एशियन कप छनोटको दोस्रो चरणमा प्रतिष्पर्धा गरेको थियो । गत वर्षको जेठमा कुवेतमा नै भएको खेलमा नेपाल जोर्डनसँग ३–० गोल अन्तरले पराजित भएको थियो ।

कुवेत जानु अघि नेपालले कतारको दोहामा १० दिनको तयारी गरेको थियो । जहाँ नेपाली टोलीले ३ मैत्रीपूर्ण खेल समेत खेलेको थियो ।छनोटको समूह ‘ए’ मा नेपाल, जोर्डन, कुवेत र इन्डोनेसिया रहेका छन् । नेपालले जेठ २८ गरे घरेलु टोली कुवेत र ३१ जेठमा इन्डोनेसियासँग खेल्नेछ ।

समूहको शीर्ष टोली एसियन कपमा छनोट हुनेछ भने उत्कृष्ट हुने दोस्रो टोलीले पनि एसियन कपमा स्थान बनाउनेछ ।

काठमाडौ । एएफसी एसियन कप छनोटको तयारीका लागि बन्द प्रशिक्षणमा रहेका खेलाडीले प्रशिक्षक अबदुल्लाह अलमुताईरीको बारम्बार दबाबका कारण क्याम्प छाड्नु परेको बताएका छन् ।

राजधानीमा बिहीबार पत्रकार सम्मेलन गरेर मुख्य प्रशिक्षक अलमुताइरीले न्युनतम सेवा सुविधाका लागि माग राख्दा बारम्बार दबाब दिएर क्याम्प छाड्न बाध्य भएको बताएका हुन् । नियमित कप्तान किरण चेम्जोङको अनुपस्थितिमा रोहित चन्दले नेतृत्व गरिरहेको टोलीमा न्युनतम सेवा सुविधा उपलब्ध गराउन माग राखेको विषयमा प्रशिक्षकले आफू  माथि निरन्तर दबाब दिएर क्याम्प छाड्न सक्ने भने पछि होटल छाडेर गएको उनीहरुले पत्रकार सम्मेलनमा बताएका हुन् ।

प्रशिक्षकको कार्यशैलीमा असन्तुष्टि जनाउँदै प्रशिक्षणमा रहेका १२ खेलाडीले अलमुताईरीको आचरण बेठिक भएको टिप्पणी समेत गरेका छन् । पत्रकार सम्मेलनमा बन्द प्रशिक्षण बहिस्कार गरेका १० खेलाडी नै उपस्थित भएका थिए । यस्तै खेलाडीहरुले प्रशिक्षकसँगको विवादबारे अखिल नेपाल फुटबल संघ (एन्फा) लाई जानकारी गराएको तर एन्फा नेतृत्वले अहिले निर्वाचन नजिकिँदै गरेको भन्दै खेलाडीलाई बुझेर खबर गर्ने बताए पनि खबर नआएको उनीहरुले बताए ।

खेलाडीले पत्रकार सम्मेलनमार्फत खेलाडीमा लगाएको आरोपको समेत खण्डन गरेका छन् । उनीहलाई विद्रोही भनिएकोमा आपत्ति समेता जनाए । प्रशिक्षकले बारम्बार क्याम्प छाडेर जान भनेपछि मात्र क्याम्प छाडेनको बताएका हुन् । खेलाडीले समस्या सुल्झाउन कदम चाल्नुको सट्टा एन्फाका जिम्मेवार पदाधिकारीबाट सार्वजनिक मिडियामा हामी क्याम्पबाट भाग्यौँ भन्ने अभिव्यक्ति दिएको भन्दै आश्चर्य समेत ब्यक्त गरेका छन् । उनीहरुले सत्य तथ्य छानविन गर्नका लागि नेतृत्व पक्षलाई माग समेत राखेका छन् । यस्तै खेलाडीले अहिलेको प्रशिक्षकसँग रहेर फुटबल खेल्न कठिन हुने समेत बताए ।

उता अखिल नेपाल फुटबल संघका महासचिव इन्द्रमान तुलाधारले खेलाडी र प्रशिक्षकसँगको विवादको अध्ययन भइरहेको बताएका छन् । खेलाडीले किन क्याम्प छाडेर गएको विषयमा प्रशिक्षकसँग छलफल भएको र एन्फाले अध्ययन गर्ने महासचिव इन्द्रमान तुलाधारले बताए ।

प्रशिक्षकसँग असन्तुष्ट देखिएका रोहित चन्दले सुरुवातमा क्याम्पबाट बिदा लिएका थिए । रोहित सहित ९ जना खेलाडीले क्लोज क्याम्प छाडेको ब्यवस्थापक मधुसुदनले पुष्टि गरेका थिए । गोलकिपर विशाल श्रेष्ठ, अनन्त तामाङ, अन्जन विष्ट, सुमन लामा, तेज तामाङ, विशाल राई, बिमल घर्तिमगर दिनेश राजबंशी लगायतका खेलाडीले होटल छाडेर हिडेका हुन् । सिनियर खेलाडीले प्रशिक्षण छाडेपछि त्यसको बदलामा अलमुताईरीले जुनियर १४ नयाँ खेलाडीलाई बिहीबारबाट बन्द प्रशिक्षणमा समेत बोलाएका छन् ।

एएफसी एसियन कप छनोट प्रतियोगिताको कठिन मानिएको समूहमा रहेको नेपालले जुन ८ देखि १४ सम्म कुवेतमा हुने प्रतियोगिताका लागि तयारी गरिरहेको छ । कठिन मानिएको समूहमा रहेको नेपालले छनोटमा उत्कृष्ट प्रदर्शनको अपेक्षा राखेको छ । मुख्य प्रशिक्षकले छनोट हुँदैनौ भन्दै दिएको अभिव्यक्तिको सार्वजनिक रुपमा दिएपनि नेपाली टोली उत्कृष्ट प्रदर्शन गर्नका लागि योजनाबद्द तरिकाले तयारी गरिरहेको बताएको छ । छनोटबाट समूहको शीर्ष टोली चीनमा आयोजना हुने एसियन कप २०२३ मा छनोट हुने छन । यस्तै ५ समूहको उत्कृष्ट उपविजेताले पनि प्रतियोगितामा सहभागि हुने मौका पाउनेछन् ।