आइसिसी विश्वकप क्रिकेट अन्तर्गत लखनउमा सम्पन्न श्रीलंका र नेदरल्यान्ड्स बीचको खेलमा श्रीलंकाले पहिलो जित हात पारेको छ ।

नेदरल्यान्ड्सले प्रस्तुत गरेको २६३ रनको लक्ष श्रीलंकाले ५ विकेटको क्षतिमा पुरा गरेको थियो ।

टस जितेर पहिले ब्याटिङ गरेको नेदरल्यान्ड्सले संघर्षपूर्ण २६२ रन बनाएको थियो । नेदरल्यान्ड्सका लागि सिब्रान्ड एन्जेलब्रेक्टले व्यक्तिगत ७० रन बनाएका थिए । यस्तै लोगान भान बीकले ५९ रन बनाए ।

श्रीलंकाका लागि डिल्सान मधुशन्का र कसुन रजिथाले समान चार चार विकेट लिएका थिए । त्यस्तै महीश थिक्सनाले एक विकेट लिएका थिए ।

२६३ रनको लक्ष श्रीलंकाले १० बल बाँकी छँदै पाँच विकेट गुमाएर पुरा गरेको थियो । श्रीलंकाका लागि सदिरा विक्रमासिंघाले अविजित ९१ रन, पथुम निसान्काले ५४, चरिथ अशालन्काले ४४, धनन्जय डी शिल्भाले ३० रन बनाएका थिए ।

यो जितसँगै श्रीलंकाले ४ खेलबाट २ अंक हासिल गरेको छ, र अंक तालिकामा नवौं स्थानमा छ । नेदरल्यान्ड्स भने रन रेटका आधारमा आठौं स्थानमा छ ।

काठमाडौँ । त्रिवि कीर्तिपुर खेल मैदानमा जारी तेस्रो तथा अन्तिम एक दिवसीय क्रिकेट खेलमा संयुक्त अरब इमिरेट्स (युएई) ले नेपालसामु १७७ रनको लक्ष्य दिएको छ ।

टस हारेर ब्याटिङमा ओर्लिएको युएईले भर्खरै सम्पन्न पहिलो इनिङमा निर्धारित ५० ओभरको खेलमा ९ विकेटको क्षतिमा १७६ रन बनाएको छ । युएईका लागि आयान अफजल खानले ६३ बलमा ७ चौका र १ छक्काको मद्दतमा नटआउट ५४ रन बनाए ।

कुनै बेला ३१.१ ओभरमा ९३ रनमा ९ विकेट गुमाइसकेको युएईले पूरा खेल खेल्दै सम्मानजनक रन बनायो । आयान अफजल खानलाई पुछारमा आएका हजरत बिलालले राम्रो साथ दिएका थिए । हजरतले ५४ बलमा एक छक्काको सहयोगमा २० रन बनाए ।

युएईका लागि सुरुआत राम्रो हुन सकेन । उसले ३.१ ओभरमा १६ रन बनाउँदा ३ विकेट गुमाइसकेको थियो । ओपनर ब्याटरहरु मुहम्मद वासिम ११ र वृत्य अरविन्द शून्य रनमा पभेलियन फर्केका थिए । ४ विकेटको क्षतिमा ७९ रन बनाएको युएईले ९३ रन पुग्दा ९ विकेट गुमाइसकेको थियो ।

तर खान र बिलाले अन्तिम विकेटको साझेदारीमार्फत टिमको स्कोरलाई माथि पुर्याए । खान र बिलालले टिमलाई सम्मानजनक स्कोरमा पुर्याउन ८३ रनको साझेदारी गरे । युएईका अन्य ब्याटरमा कप्तान चुन्दाङ्गापोइलले ४, रोहन मुस्तफा २४ र आलिशान सराफूले ३३ रन बनाए ।

बलिङतर्फ नेपालका लागि गुलशन झा, दीपेन्द्रसिंह ऐरी र कुशल भुर्तेलले समान २/२ विकेट लिए । झाले ७ ओभरमा ४२, ऐरीले १० ओभरमा २२ र भुर्तेलले ७ ओभरमा ३२ रन खर्चिएका थिए । अन्य बलरमा सोमपाल कामी, ललित राजवंशीले समान १/१ विकेट लिए । युएईका जुहुर खान रनआउट भएका थिए ।

आजको खेलमा नेपालले अतिरिक्त २० रन दिएको थियो जसमा वाइडमात्र १७ थियो । केही बेरमा नेपालले जवाफी ब्याटिङ गर्दैछ । तीन एक दिवसीय खेलमा नेपाल र युएईले एक/एक खेल जितिसकेका छन् ।

काठमाडौँ । नेपाल र संयुक्त अरब इमिरेट्स (युएई) बीचको तेस्रो एक दिवसीय क्रिकेट खेलका क्रममा त्रिवि क्रिकेट मैदानबाटै केही सट्टेबाज पक्राउ परेका छन् ।

खेलमा बल टु बल सट्टेबाजी गरेको आरोपमा उनीहरुलाई पक्राउ गरिएको प्रहरीले जनाएको छ । सो विषयमा प्रहरीले अनुसन्धानसमेत गरिरहेको बताइएको छ । केन्द्रीय अनुसन्धान ब्यूरो (सीआईबी) को टोलीले उनीहरुलाई शुक्रबार पक्राउ गरेको हो ।

प्रहरीका अनुसार क्रिक इन्फो र टेलिभिजन प्रत्यक्ष प्रसारणमा कम्तिमा पनि तीन सेकेण्ड ढिलो हुँदा त्यसको फाइदा लिन मैदानमै बसेर बल टु बल एपको माध्यमबाट सट्टेबाजी गरेको हुनसक्छ ।

प्रहरीले पक्राउ पर्ने धेरै रहेको र उनीहरुको संलग्नताबारे अनुसन्धान गरेर निर्दोष देखिएकालाई छोडिने बताएको छ । प्रहरीले पक्राउ पर्नेको साथबाट मोबाइल फोन र नगद बरामद गरेको बताइएको छ । प्रहरीले पहिलो एक दिवसीय खेलबाटै उनीहरुमाथि शंका गरेको थियो ।

काठमाडौँ । नेपाललाई संयुक्त अरब इमिरेट्स (युएई) ले नेपालसामु १९२ रनको लक्ष्य प्रस्तुत गरेको छ । भर्खरै सम्पन्न पहिलो इनिङमा युएईले ४३.२ ओभरमा सबै विकेट गुमाई १९१ रन बनाएको छ ।

कीर्तिपुर खेल मैदानमा दोस्रो एक दिवसीय खेलमा टस जितेर युएईले ब्याटिङ गरेको थियो । युएईका लागि ओपनर ब्याटरद्वय मुहम्मद वासिम र वृत्य अरविन्दले ११.५ ओभरमा ७२ रनको साझेदारी गरेका थिए । वासिमले ४६ बलमा ३ चौका र ४ छक्काको मद्दतमा सर्वाधिक ५० रन बनाए भने अरविन्दले २५ रन जोडे ।

त्यस्तै कप्तान चुङ्दागापोइल रिजवानले २२, आलिशान सराफूले ३५, विष्णु सुकुमारनले १५ र बसिल हमिदले २४ रन बनाए ।

बलिङतर्फ आज नेपालका सोमपाल कामीले ७.२ ओभरमा ३५ रन दिँदै ३ विकेट तथा ललित राजवंशीले १० ओभरमा ४१ रन दिएर समान ३ विकेट लिए । अन्य बलरहरुमा करन केसी, गुलशन झा, दीपेन्द्रसिंह ऐरी र कुशल भुर्तेलले १/१ विकेट लिए ।

तीन खेलमध्ये पहिलो एक दिवसीय खेलमा नेपाल युएईसँग ८४ रनले पराजित भएको थियो । केहीबेरमा नेपालले जवाफी ब्याटिङ गर्नेछ ।

काठमाडौँ । काठमाडौँमा जारी नेपाल र संयुक्त अरब इमिरेट्स (युएई) बीचको पहिलो एक दिवसीय खेलमा युएईले नेपाललाई २६४ रनको लक्ष्य दिएको छ ।

टस हारेर पहिले ब्याटिङ गरेको युएईले निर्धारित ५० ओभरको खेलमा ७ विकेटको क्षतिमा २६३ रन बनायो । कीर्तिपुर खेल मैदानमा भएको खेलमा युएईका लागि रोहन मुस्तफाले सर्वाधिक ५३ रन बनाए ।

यस्तै अन्य ब्याटरमा मुहम्मद वासिमले ४४, भृत्य अरविन्दले ४०, आलिशान सराफूले २९ र अहमद राजाले २७ रन बनाए । युएईको पहिलो विकेट १४.२ ओभरमा ७५ रनको स्कोरमा झरेको थियो । युएईका तीन खेलाडी रनआउट भएका थिए ।

बलिङतर्फ नेपालका गुलशन झाले ६ ओभरमा २६ रन दिई २ विकेट लिए । अन्य बलरतर्फ सोमपाल कामी र दीपेन्द्रसिंह ऐरीले समान एक÷एक विकेट लिए । आज बलिङतर्फ प्रमुख बलरहरु करण केसी र सोमपाल कामी महँगो साबित भए । केसीले १० ओभरमा ५९ र कामीले १० ओभरमा ६७ रन दिए ।

नेपालको बलिङ पनि खराब देखियो । अतिरिक्त २७ रन दिएको नेपालले वाइडमा मात्र १६ रन खर्चियो ।

आजको खेलबाट नेपालका तर्फबाट अर्जुन साउद र हरिशंकर साह तथा युएईका तर्फबाट आयान अफजल खान र हजरत बिलालले डेब्यु गरेका हुन् ।

नेपालले युएईसँग यहाँ तीन वटा एकदिवसीय खेल खेल्नेछ । दोस्रो खेल बुधबार र तेस्रो खेल शुक्रबार हुनेछ ।

काठमाडौँ । तेस्रो तथा अन्तिम एक दिवसीय खेलमा घरेलु टोली केन्याले नेपाललाई जितका लागि २५६ रनको लक्ष्य दिएको छ ।

केन्याको नैरोवीस्थित जिमखाना क्रिकेट मैदानमा टस जितेर पहिले ब्याटिङ गरेको केन्याले निर्धारित ५० ओभरमा ९ विकेट गुमाएर २५५ रनको योगफल बनायो । केन्याका लागि कोलिन्स अबुयाले ८४ रनको अर्धशतकीय इनिङ खेले । उनले १११ बलमा सात चौका र दुई छक्काको मद्दतमा सो रन बनाएका हुन ।

यस्तै लुकास एनडानडासनले अविजित रहदै ५९ रनको योगदान दिए भने सुखदिप सिंहले ३७ रन बनाए । इमानुएल बुन्डीले २३ रन बनाउँदा कप्तान शेम एनगोचेले १७ रन जोडे ।

बलिङमा नेपालका सोमपाल कामी र आदील अन्सारीले समान दुई÷दुई विकेट लिए भने बसिर अहमद र शाहब आलमले एक÷एक विकेट लिए । तीन खेलको सिरिजमा नेपाल २–० ले अघि रहेको छ । एकदिवसीय सिरिजको पहिलो खेलमा नेपालले केन्यालाई ७ विकेटले पराजित गरेको थियो भने दोस्रो एकदिवसीय खेलमा १७ रनले विजयी भएको थियो ।

त्यसअघि केन्या विरुद्धको पाँच खेलको टी–२० अन्तर्राष्ट्रिय सिरिजमा नेपालले ३–२ ले जितेको थियो । नेपाल अहिले जवाफी ब्याटिङमा उत्रेको छ ।

काठमाडौँ । नेपाल र केन्याबीचको तीन एक दिवसीय सिरिजअन्तर्गत आज भएको पहिलो खेलमा घरेलु टोली केन्याले नेपाललाई जीतका लागि दुई सय १९ रनको लक्ष्य दिएको छ ।

केन्याको नैरोबीस्थित जिमखाना क्रिकेट मैदानमा टस जितेर पहिले व्याटिङ रोजेको केन्याले ४८ दशमलव १ ओभरमा सबै विकेट गुमाउँदै दुई सय १८ रनको योगफल बनाएको हो । केन्याका लागि रकिप पटेलले सर्वाधिक ६७ रनको योगदान दिए भने कोलिन्स ओबुयाले ६२ रन बनाए । यसैगरी इरफान करिमले ३० रन जोड्दा सचिन भुडियाले २६ रन बनाए ।

बलिङतर्फ नेपालका सोमपाल कामी र करण केसीले समान ३/३ विकेट लिए भने आदिल अन्सारी र पवन शर्राफले १/१ विकेट हात पारे । नियमित कप्तान सन्दिप लामिछाने क्यारेबियन प्रिमियर लिग खेल्न वेस्टइन्डिज गएपछि आजको खेलमा रोहितकुमार पौडेलले नेतृत्व गर्दैछन् । उक्त सिरिजअन्तर्गतको दोस्रो खेल भालि शनिबार र तेस्रो खेल सोमबार हुनेछ ।

यसअघि नेपाल र केन्याबीच भएको पाँच खेलको टी ट्वान्टी सिरिज नेपाल ३–२ ले विजयी भएको थियो । नेपाल अहिले जवाफी ब्याटिङमा उत्रेको छ ।