काठमाडौँ । अभिनेत्री मिरुना मगर र फिल्म प्राविधिक पृथ्वीसिंह ठकुरीविरुद्ध मुद्दा दायर गरिएको छ । बौद्ध भिक्षु फुर्वा साङ्मो तामाङले काठमाडौँ जिल्ला अदालतमा गाली बेइज्जती र कुटपिटसम्बन्धी मुद्दा दायर गरेका हुन् ।

तामाङले दुवैजनालाई कानूनबमोजिमको सजायको माग गरेका छन् । माफी माग्ने बेलामा पटकपटक पहल गर्दा पनि अभिनेत्री मगरले बेवास्ता गरेपछि बाध्य भएर मुद्दा दर्ता गर्नुपरेको तामाङले उजुरीमा उल्लेख गरेका छन् ।

उनले मिरुनालाई फिल्म प्राविधिक ठकुरीले उक्साएको भन्दै उनीविरुद्ध पनि मुद्दा दायर गरेको बताएका छन् । गत जेठ १५ गते काठमाडौँ को सिभिल मलस्थित एक कफी सपमा कबड्डी ४ फिल्मको प्रचारका लागि पुगेकी मिरुनाले आफूलाई दुर्व्यवहार गरेको भन्दै तामाङलाई थप्पड हानेकी थिइन् ।

त्यसपछि बौद्ध भिक्षु र बौद्ध समुदाय फिल्मविरुद्ध नै प्रदर्शनमा उत्रिएका थिए । त्यसपछि फिल्मसम्बद्ध पक्ष र बौद्ध समुदायबीच माफी मागेर सहमति भएको थियो ।

तर सहमति भएको एक सातामै मिरुना र फुर्वा फेरि विवादमा उत्रिएका थिए । अहिले मिरुनाले माफी माग्नुपर्ने भन्दै फुर्वाले मुद्दा दायर गरेका हुन् ।

काठमाडौँ । विवाद समाधान नहुन्जेलसम्मका लागि सिक्किम सरकारले कबड्डी–४ को प्रदर्शनमा रोक लगाएको छ । सिक्किममा मुख्यमन्त्री प्रेमसिंह तामाङ गोलेले विभिन्न संघसंस्था र संगठन तथा सिक्किमे जनताको भावनालाई मध्यनजर गर्दै कबड्डी–४ को प्रदर्शनमा रोक लगाइएको जानकारी दिएका छन् ।

आफ्नो आधिकारिक फेसबुक पेजमा उनले सरकारले स्वीकार्य तरिकामा विवाद समाधान नहुन्जेलसम्मका लागि कबड्डी–४ को रिलिजमा प्रतिबन्ध लगाउने निर्णय गरेको बताए।

चलचित्रमा कलाकार दयाहाङ राईले निभाएको लामाको चरित्रले सम्पूर्ण लामाहरूको आस्थामा ठेस पुर्‍याएको भन्दै सिक्किम लामा एसोसियसन तथा अल इन्डिया बुद्धिस्ट फोरमलगायतका संस्थाहरूले कबड्डी–४ को प्रदर्शनमा रोक लगाउन पर्ने माग राख्दै आएका थिए ।

यही जेठ १३ गते नेपालमा रिलिज भएको कबड्डी–४ सिक्किमको राजधानी ग्यांगटोक र नाम्चीमा यही जेठ १७ गते प्रदर्शन गर्ने तयारी थियो । तर सिक्किम लामा एसोसियसन तथा अल इन्डिया बुद्धिस्ट फोरमलगायतका संस्थाहरूले कबड्डी–४ को प्रदर्शनमा रोक नलगाइए हलमा हुने तोडफोड र क्षतिको जिम्मेवारी आफूहरूले नलिने बताएका थिए ।

उनीहरुले पत्रकार सम्मेलन गरी दयाहाङ राईले निभाएको लामाको चरित्रले बुद्धिज्म र भिक्षुहरूमाथिको अन्याय भएको बताएका छन् । पत्रकार सम्मेलनमा बौद्ध भिक्षु ओन्डी पिन्टोले भने, “यसबारेमा सबैले आवाज उठाउनुपर्छ । नेपालमा पनि यो विवाद समाधान हुनुपर्छ।”

काठमाडौं । चलचित्र ‘कबड्डी–४’ले ग्रस कलेक्सनमा ऐतिहासिक रेकर्ड राखिरहेको छ । हालसम्मकै सर्वाधिक शो पाउने चलचित्रको रेकर्ड बनाएको यस फिल्मले कलेक्सनमा पनि नयाँ रेकर्ड कायम गरिरहेको छ ।

पाँच दिनमा फिल्मले १२ करोड ५५ लाख रुपैयाँ ग्रस कलेक्सन गरेको छ । यो हालसम्मकै छोटो समयमा भएको धेरै ग्रस कलेक्सन हो ।

गत शुक्रबारबाट हलमा लागेको यो चलचित्रले क्यूएफएक्स चेनमा मात्रै ९८ शो पाएको थियो । यसअघि सबैभन्दा धेरै शो पाउने चलचित्र ‘केजीएफ च्याप्टर–२’ थियो । जसले ८० शो पाएको थियो ।

ओपनिङ डेज हाउसफुल व्यापार गरेको चलचित्रले चार दिनमै १० करोडको आंकडा पार गरेको थियो । चार दिनमा १० करोड ग्रस कलेक्सन गर्ने ‘कबड्डी–४’ नेपालमा नै पहिलो चलचित्र समेत हो ।

रामबाबु गुरुङको निर्देशन रहेको चलचित्रमा दयाहाङ राई, मिरुना मगर, सौगात मल्ल, बुद्दि तामाङ, विजय बराललगायत कलाकारको मुख्य भूमिका छ ।

काठमाडौं । अभिनेत्री मिरुना मगरलाई दुर्व्यवहार गरेको आरोपमा पक्राउ परेका बौद्ध भिक्षु फुर्वा लामा रिहा भएका छन् । जिल्ला प्रशासन कार्यालय काठमाडौँले मुगुका बौद्ध भिक्षु लामालाई मंगलबार रिहा गरेको हो ।

अभिनेत्री मगरले सुन्धारास्थित सिभिल मलको एक कफी सपमा आफूविरुद्ध बौद्ध भिक्षु लामाले ‘दुर्व्यवहार’ गरेको भन्दै प्रहरीमा उजुरी दिएकी थिइन् । उजुरीपछि भिक्षु लामालाई प्रहरीले पक्राउ गरेको थियो ।

काठमाडौँ । एक अभिनेत्रीलाई ‘दुर्व्यवहार’ गरेको आरोपमा पक्राउ परेका एक बौद्ध भिक्षुलाई रिहा गर्न माग गर्दै मंगलबार बिहान प्रदर्शन गरिएको छ । ‘कबड्डी ४’ की नायिका मिरुना मगरलाई दुर्व्यवहार गरेको भन्दै मुगु स्थायी घर भएका फुर्वा लामा नामक बौद्ध भिक्षुलाई प्रहरीले पक्राउ गरेको थियो ।

युवाहरुको एक समूहले मंगलबार बिहान चावहिलस्थित केएल टावरअगाडि फुर्वा लामाको रिहाइको माग गर्दै विरोध प्रदर्शन गरेको हो । समूहले ‘कबड्डी ४’ को पोस्टरसमेत जलाइदिएको छ ।

अभिनेत्री मगरले सुन्धारास्थित सिभिल मलको एक कफी सपमा आफूविरुद्ध बौद्ध भिक्षु लामाले ‘दुर्व्यवहार’ गरेको भन्दै प्रहरीमा उजुरी दिएकी थिइन् । उजुरीपछि भिक्षु लामालाई प्रहरीले पक्राउ गरेको थियो ।

लामाको पक्राउको विरोधमा कर्णालीबासी र लामा समुदायले मंगलबार अपराह्न २ बजे माइतीघर मण्डलामा विरोध प्रदर्शन गर्ने र प्रशासनमा उजुरी दिने कार्यक्रम राखिएपनि स्थगित गरिएको बताइएको छ ।

‘कबड्डी ४’ का निर्माता र निर्देशकले मंगलबार बिहानै बौद्ध गुम्बाका केही लामा अगुवासँग वार्ता गरेका थिए । आफ्नो फिल्मविरुद्ध प्रदर्शन चर्किने संकेत पाएका निर्देशक रामबाबु गुरुङले तामाङ समुदायका विभिन्न संघसंस्थासँग छलफल गरेका थिए । उनले मेलमिलापतिर आफू गएको बताएका छन् ।

‘कबड्डी ४’का लागि सिनेमा हल पुगेकी अभिनेत्री मगरले सोमबार ती बौद्ध भिक्षुले आफूलाई तीनपटक पछाडिबाट नियोजित ढंगले छोएर दुर्व्यवहार गरेको आरोप लगाएकी छन् ।

काठमाडौँ । दर्शकको मन जित्न सफल रहेको कबड्डी ब्राण्डको कबड्डी ४ (द फाइनल म्याच) आउँदो शुक्रवारबाट देशभर प्रदर्शन हुने भएको छ ।

मंगलवार काठमाडौंमा पत्रकार सम्मेलन गरेर कबड्डी ४ को बारेमा जानकारी गराइएको हो । फिल्मको एडभान्स बुकिङ खुल्ला भएको जनाइएको छ । नेपाली चलचित्रको सोमवबारबाट नै बुकिङ खुला भएको यो पहिलोपटक हो ।

कार्यक्रममा नायक दयाहाङ राईले फिल्मले दर्शकलाई भरपुर मनोरञ्जन दिलाउने बताउनु भयो । उहाँले कबड्डी एकदेखि ४ सम्म आईपुग्दा काजीको जीवन कसरी चलिरहेको छ भन्ने कुरा फिल्ममा आफ्नो पात्रको अभिनय रहेको बताउनु भयो । उहाँले कबड्डी ४ विशेष हुने पनि बताउनु भयो ।

त्यस्तै नायक सौगात मल्लले कबड्डी ४ सिरिजको फाइनल म्याच भएकोले के हुन्छ भन्ने नै मुख्य भाग रहेको बताउनु भयो । त्यस्तै नव नायिका मिरुना मगरले आफ्नो लागि यो नयाँ भएपनि फिल्ममा कुनै कन्जुस्याइँ नगरेको बताउनु भयो ।

रामबाबु गुरुङको निर्देशनमा बनेको चलचित्रमा दयाहाङ राई, सौगात मल्ल, मिरुना मगर, बुद्धि तामाङ, विजय बराल, गौमाया यात्री, पुष्कर गुरुङ, कमलमणी नेपाल, कविता आले, जयनन्द लामा, प्रकाश घिमिरे, माओत्से गुरुङ, सारदा अधिकारी लगायतको अभिनय छ । ‘कबड्डी’को अन्तिम सिरिज भनिएको यस चलचित्रको कथा निर्देशक गरुङ र उपेन्द्र सुब्बाले मिलेर लेखेका हुन् ।

काठमाडौँ । नेपाली कथानक चलचित्र ‘कबड्डी–४’को ट्रेलर सार्वजनिक भएको छ । चलचित्रको ट्रेलर बुधबार दिउँसो सुष्मा प्रोडक्शन ग्लोबल च्यानलमार्फत युट्युबमा सार्वजनिक भएको हो ।

रामबाबु गुरुङले निर्देशन गरेको फिल्ममा दयाहाङ राई, सौगात मल्ल, मिरुना मगर, गौमाया गुरुङ, बुद्धि तामाङ, विजय बराल, कमलमणि नेपाल लगायत कलाकारको भूमिका रहेको छ ।

कबड्डी–४ को रिलिज डेट परिवर्तन भएको छ । अब ‘कबड्डी–४’ दर्शकले जेठ १३ गते हेर्न पाउनेछन् । वैशाख ३० गते स्थानीय तहको निर्वाचन हुने भएका कारण पूर्व निर्धारित मितिमा चलचित्र प्रदर्शन गर्न नसकिएको निर्देशक रामबाबु गुरुङले जनाएका छन् ।