वालिङ । गल्याङ नगरपालिका–७ स्थित धार्मिक एवम् पर्यटकीयस्थल केदारनाथसम्म पुग्न पदमार्ग निर्माण गरिएको छ । गल्याङ–८ चिउरीस्थित सुनौली–पोखरा जोड्ने सिद्धार्थ राजमार्गबाट केदारनाथ मन्दिरलाई जोड्ने गरी पदमार्ग निर्माण गरिएको हो ।

अग्लो पहाडमा अवस्थित केदारनाथ मन्दिरसम्म दर्शनार्थीको सहजताका लागि गल्याङ नगरपालिकाले पदमार्ग निर्माण गरेको हो । दर्शनार्थीलाई आवतजावत गर्न सहज होस् भन्ने उद्देश्यले पदमार्ग निर्माण गरिएको पदमार्ग निर्माण समितिका अध्यक्ष टुकराज पाठकले बताउनुभयो । नगरपालिकाले पदमार्ग निर्माण गर्न आर्थिक वर्ष २०८०/८१ मा रु १० लाख र आव २०८१/८२ मा रु दश लाख विनियोजन गरेको उहाँले बताउनुभयो ।

विनियोजित बजेटबाट ३८५ मिटर लामो पदमार्ग निर्माण गरिएको छ । मन्दिरसम्म पुग्न स्टिलको रेलिङ समेत जडान गरिएको छ । सुनौली–पोखरा सिद्धार्थ राजमार्गमा यात्रा गर्ने भारतीय पर्यटकलाई समेत यसतर्फ आकर्षित गर्न सकिने उक्त मन्दिरका पुजारी काशीराम सापकोटाले बताउनुभयो ।

चट्टानै चट्टानले बनेको गुफाजस्तोमा रहेको मन्दिरमा भगवान शिवको प्रतिमूर्ति देख्न सकिन्छ । प्राकृतिक चट्टानबाट निर्मित शिवको प्रतिमूर्ति, नन्दीलगायतका अन्य थुप्रै आकृति यहाँ देख्न पाइने पुजारी सापकोटाले बताउनुभयो । मन्दिरलाई व्यवस्थित बनाउन २०७२ सालमा महायज्ञ सञ्चालन गरिएको थियो । उक्त महायज्ञबाट सङ्कलित रु दुई करोडबाट मन्दिरमा नयाँ संरचना तथा पूर्वाधार निर्माण गरिएको छ । मन्दिरलाई नयाँ स्वरुप दिइएको छ । सिद्धार्थ राजमार्गसँगै जोडिएको आँधीखोलामाथि बनेको अग्लो झोलुङ्गे पुल हुँदै झण्डै १५ मिनेटको पैदल दूरीमा यहाँ पुग्न सकिन्छ ।

केदारनाथ । मर्मत कार्यको लागि विमानबाट गौचर हवाई पट्टी लैजाँदै गरेको एमआई–१७ हेलिकप्टर शनिबार केदारनाथमा दुर्घटनाग्रस्त भएको छ ।

मर्मतको लागि लैजाने क्रममा विमानले सन्तुलन गुमाउदा दुर्घटनामा परेको थियो ।

हेलिकप्टरले केहि दूरी मात्र तय गरेको अवस्थामा सन्तुलन गुमाउन थालेको जिल्ला पर्यटन अधिकृत राहुल चौबेले बताउनुभयो ।

“हेलिकप्टरमा कुनै यात्रु वा सामान थिएन् । घटनाको जानकारी पाएलगत्तै उद्धार टोली घटनास्थल पुगेको अधिकारीले भन्नुभयो । टोलीले अवस्थाको निरीक्षण गरिरहेको छ,” चौबेले थप्नुभयो ।

हाल राष्ट्रिय प्रकोप प्रतिक्रिया बल (एसडीआरएफ) को टोली दुर्घटनास्थलमा पुगी राहत कार्य जारी राखेको छ । दुर्घटनामा कुनै मानवीय क्षति भने भएको छैन ।

दुर्घटनाको वास्तविक कारण अझै पत्ता लागिनसकेकाले अनुसन्धान जारी रहेको स्रोतले जनाएको छ ।

उत्तराखण्ड । भारतको उत्तराखण्डको रुद्रप्रयाग जिल्लाको केदारनाथ तीर्थस्थलमा ढुंगा खस्दा तीन तीर्थयात्रीको मृत्यु भएको छ । यस दुर्घटनामा ८ जना घाइते भएका छन् ।

गौरीकुण्डबाट ३ किलोमिटर टाढा चिरवासामा बनेको फुटपाथ हुँदै केदारनाथ धामतर्फ जाँदै गरेका तीर्थयात्रीलाई बिहान ७ः३० बजे ढुंगाले लागेको थियो ।

दुर्घटनाको जानकारी रुद्रप्रयाग जिल्ला प्रकोप व्यवस्थापनका नन्दनसिंह राजवारले दिएका छन् । मारिएकाहरु कहाँका थिए भन्ने जानकारी भने खुल्न सकेको छैन । यद्यपि एनडीआरएफ टोलीले राहत र उद्धार कार्य सुरु गरिसकेका छन् ।

मौसम विभागले आगामी ४८ घण्टामा उत्तराखण्डमा भारी वर्षा हुने चेतावनी दिएको छ । कुमाउ क्षेत्रका लागि रेड अलर्ट र गढवाल क्षेत्रमा पहेंलो अलर्ट जारी गरिएको छ ।

जुलाई २१ मा चम्पावत, नैनीताल र उधम सिंह नगरमा रेड अलर्ट जारी गरिएको छ । जबकि पौरी, पिथौरागढ, बागेश्वर र अल्मोडामा ओरेन्ज अलर्ट जारी गरिएको छ । यसबाहेक देहरादूनसहित राज्यका अन्य जिल्लाहरूमा भारी वर्षाको सन्दर्भमा पहेंलो चेतावनी जारी गरिएको छ ।

एजेन्सी । भारतको प्रसिद्ध धार्मिक स्थल केदारनाथ मन्दिरमा मोबाइल फोन निषेध गरिएको छ । भक्तजनले अब मन्दिर परिसरमा फोटो खिच्न वा भिडियो बनाउन पाउने छैनन् । बद्री–केदारनाथ मन्दिर समितिले यो निर्णय गरेको हो ।

केही दिन अघि एक महिला ब्लगरले आफ्नो प्रेमीलाई मन्दिरको अगाडि प्रपोज गरेकी थिइन् । भिडियो भाइरल भएपछि मन्दिर प्रशासनले असन्तुष्टि व्यक्त गरेको थियो । यस सम्बन्धमा मन्दिर समितिले यस्तो निर्णय गरेको हो ।

भक्तजनलाई पनि विनम्र पोशाक लगाएर मन्दिरमा आउन आग्रह गरिएको छ । यसका साथै मन्दिर परिसरमा पाल वा शिविर नराख्न पनि निर्देशन दिइएको छ । आदेश पालना नगर्नेलाई कानुनी कारबाही गरिने जनाइएको छ ।

मन्दिर परिसरमा विभिन्न स्थानमा बोर्ड राखिएको छ, जसमा मोबाइल फोन लिएर मन्दिर परिसरमा प्रवेश नगर्नू लेखिएको छ । यस्तै, ‘यहाँ फोटोग्राफी र भिडियोग्राफी पूर्ण रूपमा प्रतिबन्धित छ । तपाई सीसी क्यामेराको निगरानीमा हुनुहुन्छ ।’ पनि लेखिएको छ ।

पछिल्लो समय मन्दिरको गर्भगृहमा जानुअघि नै भक्तजनको मोबाइल फोन बन्द गर्न आदेश जारी भएपनि अहिले मन्दिर परिसरमा नै मोबाइल निषेध गरिएको छ ।

यस धाममा नेपालबाट पनि थुप्रै भक्तजनहरु दर्शन गर्न जाने गर्दछन् ।

एजेन्सी । केदारनाथ धाम हिउँले ढाकिएको छ । केदारनाथधाममा चार फिटसम्म हिउँ जमेको छ । केदारनाथ क्षेत्रमा आइतबार रातिदेखि लगातार हिमपात भइरहेको बताइएको छ ।

धाम परिसर र वरपरका पहाडमा भारी हिउँ परेको अधिकारीहरूले जनाएका छन् । यसैबीच राज्यको उत्तरकाशी प्रहरीले आसपासका नागरिकहरूलाई सम्भावित जोखिमबाट सचेत रहन आग्रह गरेका छन् ।

उत्तरकाशी प्रहरीले ट्वीटमा उल्लेख गरेको छ ( वर्षा र हिमपातका कारण गङ्गोत्री राष्ट्रिय राजमार्ग सुक्की टोपभन्दा माथि धरासु बन्दरकोट र बन्दरकोट नजिकै आएका फोहोर र हिमपहिराका कारण अवरुद्ध भएको छ । यमुनोत्री राष्ट्रिय राजमार्ग जानकीछट्टी र राडी मार्ग पनि अवरुद्ध भएको छ। यात्रुहरूलाई सावधानीपूर्वक हिड्न भनिएको छ ।

केदारनाथ धामका द्वारहरू अप्रिल २६ मा र गङ्गोत्री र यमुनोत्रीका ढोकाहरू अप्रिल २२ मा जाडो बिदापछि मात्र खुल्ने मन्दिर व्यवस्थान समितिले जनाएको छ ।

केदारनाथ, यमुनोत्री र गङ्गोत्रीका द्वार खोल्ने मिति तय हुनासाथ चारधाम यात्राको तयारी पनि शुरु हुने बताइएको छ । यमुनोत्री, गङ्गोत्री र बद्रीनाथसहित चार धाम भनेर चिनिने चारवटा पुरातन तीर्थस्थलहरूमध्ये केदारनाथ प्रमुख तीर्थस्थल हो।