काठमाडौँ: सरकारले त्रिपुरेश्वरस्थित राहदानी विभाग अगाडि  आत्मदाह प्रयास गरेपछि जलेर गम्भीर बिरामी भएका  गणेश नेपालीको सम्पूर्ण उपचार खर्च उपलब्ध गराउने भएको छ ।

सडक पेटीमा मोटरसाइकल रोकेको आरोपमा काठमाडौं महानगर प्रहरीले उनको मोटरसाइकल उठाएर  ट्रकमा  हालेर लैजान लागेपछि आक्रोशित बनेका नेपालीले नगर प्रहरीकै अघिल्तिर शरीरमा पेट्रोल खन्याएर आत्मदाहको प्रयास गरेका थिए ।

तर त्यहाँ भेला भएका सर्बसाधारणले उनको शरीरमा लागेको आगो निभाए पनि उनले लगाएको कपडा सबै जलेको थियो । गम्भीर घाइते अवस्थामा उद्धार गरी उनलाई वीर अस्पतालमा भर्ना गरिएको थियो ।

हाल वीर अस्पतालमा उपचाररत नेपालीको थप तथा विशिष्टिकृत उपचारका लागि तत्कालै भारतको नयाँ दिल्लीस्थित ‘अखिल भारतीय आयुर्विज्ञान संस्थान’ (एम्स) लैजाने तयारी गरिएको छ ।

बिरामीको स्वास्थ्य अवस्था बुझ्न र उपचार प्रक्रियालाई तीव्र बनाउन गृहमन्त्री सुधन गुरुङ र प्रधानमन्त्रीको सचिवालयका सदस्यहरू बिहीबार वीर अस्पताल पुग्नुभएको थियो । उहाँहरूले अस्पतालका चिकित्सक टोलीसँग घाइतेको पछिल्लो स्वास्थ्य स्थिति र उपचारको प्रगतिका बारेमा प्रत्यक्ष जानकारी लिनुभएको थियो ।

चिकित्सकसँगको परामर्श र अवस्थाको गम्भीरतालाई ध्यानमा राख्दै उहाँहरूले बिरामीलाई तत्काल भारत लैजान आवश्यक प्राविधिक तथा व्यवस्थापकीय तयारी चुस्त बनाउन निर्देशन दिनुभएको छ ।

प्रधानमन्त्री वालेन्द्र शाहको निर्देशनमा घाइते नेपालीलाई थप उपचारका लागि भारत लैजाने प्रक्रिया अघि बढाइएको हो ।

अनलाइनखबरका अनुसार, भक्तपुरको कमलविनायकमा बस्दै आएका गणेश पछिल्लो साढे दुई वर्षदेखि पठाओ चलाउने काम गर्थे । त्यही कामबाट परिवार चलिरहेको थियो ।

मुगुको सोरु गाउँपालिका–१ स्थायी घर भएका गणेश ७ वर्ष अगाडि काठमाडौं छिरेका थिए । कृषि विषयमा जेटी (जुनियर टेक्निसियन) अध्ययन गरेका गणेशले जीवन सजिलो होला भन्ने आशामा काठमाडौं रोजेका थिए । तर रोजगारी मिलेन ।

गणेशका श्रीमती, दुई वर्षकी छोरी र वृद्ध आमा–बुबा गाउँमा छन् । ६ वर्षअघि विवाह गरेका गणेशको कमाइले नै परिवार धानिन्थ्यो । श्रीमती गृहिणी हुन् । ‘भाइले कमाएर ल्याउँथ्यो । त्यसैले बच्चाको खर्च चल्थ्यो, स्कुल पठाउने सोच थियो,’  उनका दाजु मदन नेपालीले बताए ।

गणेश नेपालीको उपचार र न्यायको माग गर्दै उनको गृहजिल्ला मुगुवासीले  माइतीघरमा प्रदर्शन गरेका छन् ।