वासिङ्टन । अमेरिकी प्रथम महिला जिल बाइडेन पुन:कोविड–१९ बाट सङ्क्रमित हुनुभएको छ । नियमित स्वास्थ्य परीक्षणका क्रममा सोमबार उहाँ कोरोनाबाट सङ्क्रमित भएको पुष्टि भएको हो । राष्ट्रपति जो बाइडेनको प्रयोगशाला परीक्षण प्रतिवेदन भने नकारात्मक आएको राष्ट्रपतिको कार्यालयले जनाएको छ ।

बहत्तर वर्षीया प्रथम महिलालाई कोरोनाका सामान्य लक्षणमात्र देखिएको जनाउँदै राष्ट्रपतिको कार्यालयले उहाँडेलावेयरको रेहोबोथ समुद्री किनारको घरमा बस्नुहुनेछ । एक वर्ष अघि पनि प्रथम महिला बाइडेनलाई कोभिड सङ्क्रमण भएको थियो । कोभिड परीक्षणलाई नियमितरूपमा जारी राख्ने र लक्षणहरूको निगरानी गरिने राष्ट्रपतिको कार्यालयले बताएको छ ।

पछिल्ला केही साता यता संयुक्त राज्य अमेरिकामा कोरोना सङ्क्रमण बढेको छभने बिरामीको अस्पताल भर्नादरमा पनि वृद्धि भएको छ ।

यसैबीच एनबिसी न्युजले स्वास्थ्य अधिकारीहरूलाई उद्धृत गर्दैै देशमा फेरि कोभिडको अर्को लहर आएको सङ्केत गरेको छ । बितेका दुई सातामा औसत दैनिक १० हजार पाँच जना सङ्क्रमित अस्पताल आएका तथा एक हजार तीन सय ९७ जनालाई सघन उपचार कक्षमा राखेर उपचार गर्नुपरेको छ ।

कोभिड–१९ बाट दैनिकरुपमा पाँच सय सात जना बालबालिका पनि पीडित भइरहेका छन् । अमेरिकी अधिकारीहरूले कोरोनाविरुद्धको खोप लगाउन सर्वसाधारणमा आग्रह पनि गरेका छन् । रासस

काठमाडौँ । अन्तर्राष्ट्रिय साहसी महिला पुरस्कार प्राप्त गर्नु भएका दुई जना नेपाली महिला भूमिका श्रेष्ठ र मुस्कान खातुनले अन्तर्राष्ट्रिय नारी दिवसको अवसरमा ह्वाइट हाउसमा आयोजना गरिएको कार्यक्रममा अमेरिकाकी प्रथम महिला जिल बाइडेन र अमेरिकी विदेशमन्त्री एन्टोनी ब्लिङ्केनसँग भेट गर्नुभएको छ ।

अमेरिकी विदेश मन्त्रालयले सन् २००७ मा विश्वभरका महिलाहरूको जीवनमा उल्लेखनीय परिवर्तन ल्याउने महिलाहरूलाई सम्मान गर्ने उद्देश्यले उक्त पुरस्कार स्थापना गरेको थियो ।

यसअघि कोभिड–१९ सँग सम्बन्धित प्रतिबन्धका कारण उहाँहरू दुई जनाले वाशिङ्गटनमा भौतिकरूपमा कार्यक्रममा भाग लिन पाउनुभएको थिएन । अहिले उहाँहरूलाई त्यो अवसर प्राप्त भएको छ नेपालस्थित अमेरिकी राजदूतावासले जनाएको छ ।

भूमिकाले एलजीबिटिक्यू समुदायको जीवनस्तर सुधारप्रतिको आफ्नो समर्पणका लागि गत वर्ष पुरस्कार प्राप्त गर्नुभएको थियो । सन् २०२१ मा मुस्कानलाई तेजाब आक्रमण अन्त्य गर्ने कामका लागि पुरस्कृत गरिएको थियो ।