प्राग। ‘द चेक रिपब्लिक’ आइतबार ४१ दशमलव १० डिग्री सेल्सियस तापक्रम मापन गर्दै नयाँ कीर्तिमान कायम भएको छ । यो लगातार दोस्रो दिन उच्चतम तापक्रमको नयाँ कीर्तिमान बनेको हो ।

चेक मौसम विज्ञान संस्थान (सीएचएमआई)का अनुसार प्रागको उत्तरमा रहेको डोक्सानीस्थित आधिकारिक मौसम केन्द्रमा ४१ दशमलव १० डिग्री सेल्सियस तापक्रम मापन गरिएको हो ।

संस्थानले सामाजिक सञ्जाल एक्समार्फत जारी गरेको जानकारीमा आधिकारिक मौसम केन्द्रको सञ्जालमा पहिलो पटक ४१ डिग्री सेल्सियसभन्दा बढी तापक्रम अभिलेख गरिएको जनाएको छ । तापक्रम अझै बढिरहेको जनाउँदै यसले रेकर्ड अझै माथि जान सक्ने उल्लेख गरेको छ ।

यसअघि शनिबार पनि डोक्सानीमा ४० दशमलव ९० डिग्री सेल्सियस तापक्रम मापन भएको थियो, जसले १४ वर्षअघिको रेकर्ड तोडेको थियो । युरोपका अधिकांश मुलुक झैँ ‘द चेक रिपब्लिक’ पनि पछिल्ला दुई सातादेखि तीव्र गर्मीको लहरबाट प्रभावित छ । मौसमविद्हरूले आइतबार गर्मी चरम अवस्थामा पुग्ने तथा साँझतिर पश्चिमी ‘द चेक रिपब्लिक’ केही क्षेत्रमा शक्तिशाली हुरी तथा वर्षाको सम्भावना रहेको बताएका छन् ।

आइतबार दुई वटा मौसम केन्द्रमा दिउँसो करिब एक घण्टामै ४० डिग्री सेल्सियसभन्दा बढी तापक्रम मापन गरिएको थियो, जुन शनिबारको तुलनामा करिब दुई घण्टा अगाडि हो ।

सीएचएमआईले प्राग र आसपासका क्षेत्रमा अत्यधिक गर्मीका कारण जमिन सतहमा ओजोनको मात्रा बढेर धुवाँको जोखिम देखिएकाले चेतावनी जारी गरेको छ । संस्थानले विशेषगरी दीर्घकालीन श्वासप्रश्वाससम्बन्धी समस्या भएका व्यक्ति, ज्येष्ठ नागरिक र बालबालिकालाई अनावश्यक शारीरिक श्रम नगर्न तथा आवश्यक सावधानी अपनाउन आग्रह गरेको छ । (रासस/एएफपी)