काठमाडौँ । जसपा (नयाँ शक्ति)को अध्यक्षमा डा बाबुराम भट्टराई निर्वाचित भएका छन् ।

प्रतिद्वन्दी नेत्र चपाईंलाई पराजित गर्दै भट्टराई अध्यक्षमा निर्वाचित भएका हुन् ।

अध्यक्षमा भट्टराई निर्वाचित भएको जानकारी दिँदै उपाध्यक्ष मानुषी यमि भट्टराईले औपचारिक घोषणा साँझ ५ बजेको पत्रकार सम्मेलन बाट गरिने बताइन् । नेपाल प्रज्ञा प्रतिष्ठानस्थित सिद्धिचरण हलमा आयोजना हुन लागेको सम्मेलनमा प्रथम राष्ट्रिय महाधिवेशनबाट नवनिर्वाचित पदाधिकारी र सदस्यहरूको शपथ ग्रहण कार्यक्रमका साथै भट्टराईले विशेष सम्बोधन समेत गर्ने कार्यक्रम रहेको उनले बताईन् ।

काठमाडौँ । नेपाल समाजवादी पार्टी (नयाँ शक्ति)को पदाधिकारी, प्रदेश र केन्द्रीय सदस्यमा निर्विरोध निर्वाचित भएका छन् ।

निर्वाचन समितिको अनुसार उपाध्यक्ष (महिला) मानुषी यमि भट्टराई र दलिततर्फ उपाध्यक्षमा दुर्गा सोब निर्विरोध निर्वाचित भएकी छिन् ।

यस्तै, केन्द्रीय सदस्यतर्फ कोशी प्रदेश (खुल्ला) मणि राई, महिला केन्द्रीय सदस्यमा तारा बास्तोला दवाडी निर्विरोध भएका छन् । मधेस प्रदेशमा(महिला) बिबि समिना खातुन, बागमती प्रदेश केन्द्रीय सदस्य (महिला) वसुन्धरा सापकोटा, गण्डकी प्रदेश केन्द्रीय सदस्य (खुल्ला) चित्र सापकोटा निर्वाचित भएका छन् ।

यसैगरी गण्डकी प्रदेश केन्द्रीय सदस्य (महिला) नारायणी अधिकारी, लुम्बिनी प्रदेश केन्द्रीय सदस्य (खुल्ला) कमल खनाल, लुम्बिनी प्रदेश केन्द्रीय सदस्य (महिला) सुनिता काफ्ले, कर्णाली प्रदेश केन्द्रीय सदस्य (खुल्ला) लक्ष्मी प्रसाद भट्टराई र सोही प्रदेशबाट केन्द्रीय सदस्य(महिला) मिराकुमारी मल्ला निर्वाचित हुँदा सुदूरपश्चिम प्रदेश केन्द्रीय सदस्य (खुल्ला) रतनबहादुर टमटा, सुदूरपश्चिम प्रदेश केन्द्रीय सदस्य (महिला) सत्यदेवी चापागाईँ, भारत प्रवास प्रदेश केन्द्रीय सदस्य (खुल्ला) लोकेन्द्रबहादुर सुनार निर्विरोध निर्वाचित भएका छन् ।

यस्तै, केन्द्रीय सदस्य खुला युवा महिला निशा श्रेष्ठ,आदिवासी जनजाति युवा महिला मन्जु माया तामाङ, मधेसी महिला अमृता कुमारी देवी, दलित केन्द्रीय सदस्य युवा हिकमत विक र थारु महिला केन्द्रीय सदस्यमा गीता थनेत निर्वाचित भएका निर्वाचन समितिले जनाएको छ ।

काठमाडौँ । नेपाल समाजवादी पार्टी (नयाँ शक्ति)को नयाँ नेतृत्वका लागि आज निर्वाचन हुने भएको छ ।

आइतबारदेखि प्रज्ञाभवन कमलादीमा सुरु भएको पार्टीको प्रथम महाधिवेशनमा आज दिउँसो ३ बजेपछि चुनावी प्रक्रिया सुरु हुने केन्द्रीय कार्यालय प्रमुख रोशन पोखरेलले जानकारी दिए ।

महाधिवेशनमा आईतबार निवर्तमान अध्यक्ष डा बाबुराम भट्टराईले ‘नयाँ युगको नयाँ कार्यभारः वैकल्पिक राजनीतिको औचित्य र आधार’ सम्बन्धी राजनीतिक र साङ्गठनिक प्रतिवेदन पेस गरेका थिए । उक्त प्रतिवेदनमाथि दोस्रो दिनको बन्द सत्रमा समूहगत छलफल भइरहेको छ ।

प्रतिवेदनमाथि १२ वटा समूहमा समूहगत छलफल भइरहेको पोखरेलले जानकारी दिए । दिउँसो ३ बजे समूहबाट आएका प्रश्नको जवाफ दिएपछि प्रतिवेदन पारित गर्ने र त्यसपछि निर्वाचन समितिले निर्वाचन प्रक्रिया अगाडि बढाउने उनले बताए ।

निर्वाचनबाट ११ जना पदाधिकारी, ९९ केन्द्रीय सदस्य र केन्द्रीय निकायका पदाधिकारी चुनिने उनले बताए । मंगलबार महाधिवेशनको समापन गर्ने तयारी रहेको छ ।