काठमाडौँ। नेपाली यु–१९ महिला क्रिकेट टोलीकी कप्तान सोनी पाख्रिनले मलेसियामा हुने एसिसी यु–१९ महिला प्रिमियर कपमा देशले गर्व गर्न लायक क्रिकेट खेल्ने बताएकी छन् ।

एशियन क्रिकेट काउन्सिल (एसिसी) को आयोजनामा आगामी असार २७ गतेदेखि महिला प्रिमियर कप मलेसियाको क्वालालम्पुर शहरमा हुँदैछ । यसअघि पूजा महतोको कप्तानीमा नेपाली युवा टोलीले खेल्दै आएको थियो, जतिबेला सोनी उपकप्तान थिइन् । पूजाले यो उमेरसमूह पार गरेपछि सोनी कप्तान चयन भएकी हुन् । सोही प्रतियोगिताका लागि गौशालामा बिहीवार भएको बिदाइ कार्यक्रमका अवसरमा कप्तान सोनीले राम्रो तयारी पाएको उल्लेख गर्दै देशले गर्व गर्ने किसिमको प्रदर्शन गर्ने बताएका हुन् । यही प्रतियोगितामा राम्रो क्रिकेट खेलेर आफूलाई प्रमाणित गर्ने सोनीको विश्वास छ ।

नेपाल क्रिकेट संघ (क्यान) ले बुधवार मात्र सोनीको कप्तानीमा १५ सदस्यीय नेपाली टोलीको घोषणा गरिसकेको छ । गत ढेड महिनाको अवधिमा यो उमेरसमूहको सुर्खेत र मधेश प्रदेशमा प्रतियोगिता आयोजना हुँदा खेलाडीहरू व्यस्त रहे । त्यसैले पर्याप्त समय नपाउँदा १० दिनको तयारीबाट नेपाली युवा टोली प्रिमियर कपमा खेल्दैछ । महेशप्रसाद रिजालको प्रशिक्षणमा नेपाली टोलीले कीर्तिपुरस्थित त्रिवि क्रिकेट मैदानमा अभ्यास गरेको थियो । नेपाली यु–१९ महिला क्रिकेट टोलीका प्रशिक्षक महेशप्रसाद रिजालले उपलब्ध श्रोतसाधनअनुरूप तयारी राम्रो गरेको र महिला यु–१९ विश्वकपका लागि यो प्रतियोगिता महत्वपूर्ण रहने भएकाले प्रिमियर कपमा राम्रो क्रिकेट खेल्ने बताए ।

नेपाली यु–१९ महिला क्रिकेट टोलीले बनाउँदै आएको लिगेसीलाई कायम राख्न र  अझै सुधार गर्न आवश्यक रहेको प्रशिक्षक रिजालले उल्लेख गरे । अनुभवी र क्षमतावान खेलाडीसहित बलियो टोली बनेको उनको विश्वास छ । यो टोलीले नेपालको महिला क्रिकेटलाई थप बलियो बनाउन मद्दत गर्ने आशा व्यक्त गरेका छन् । कप्तान सोनी, सना प्रविण र सावित्री धामीजस्ता राम्रा ब्याटर रहेको र बलिङमा पनि राम्रो रहेको प्रशिक्षक महेशले बताएका छन् । प्रतियोगितामा सहभागी भएका राष्ट्रमध्ये नेपाल पनि एउटा बलियो टोली रहेको उनी बताउँछन् । महिला क्रिकेटलाई थप मजबुत बनाउनतर्पm लक्षित रहँदै क्रिकेट खेल्ने उनको विश्वास छ ।

नेपाल क्रिकेट संघ (क्यान) का उपाध्यक्ष रोशन सिंहलगायतले नेपाली टोलीलाई बिदाइ गरेका थिए । नेपाली युवा टोली आजै मलेसिया प्रस्थान गर्दैछ । प्रतियोगितामा नेपालसहित १३ राष्ट्रले खेल्दैछन् । सहभागी १३ राष्ट्रलाई चार समूहमा विभाजन गरिएको छ । नेपाल रहेको समूह ‘ए’ मा चार राष्ट्र छन् । अन्य समूहमा समान तीन राष्ट्र समावेश छन्  । नेपालको समूह ‘ए’ हङकङ, कतार र सिंगापुर छन् । ‘डी’ मा थाइल्यान्ड, म्यान्मार र जापान रहँदा समूह ‘बी’ मा युएई, ओमान र भुटान छन् । समूह ‘सी’ मा इन्डोनेसिया, मलेसिया र कुवेत छन् । हरेक समूहका शीर्ष दुई  टोलीले क्वार्टरफाइनलमा स्थान बनाउनेछन् । प्रतियोगिताको पहिलो खेलमा नेपालले कतारसँग खेल्नेछ । दोस्रो खेलमा असार २८ गते सिंगापुरसँग र तेस्रो तथा समूह चरणको अन्तिम खेलमा असार ३० गते हङकङसँग खेल्नेछ ।

सेमिफाइनलमा पुग्ने टोलीले एशिया कपको यात्रा तय गर्नेछ । सेमिफाइनलका दुई विजेताका बीचमा साउन दुई गते फाइनल खेल हुनेछ । सोनीको कप्तानीमा रहेको नेपाली यु–१९ महिला टोलीमा साना, अलिसाकुमारी यादव, सावित्री धामी, मनीषा उपाध्याय, रचना चौधरी, रिया शर्मा, अनु कडायत, त्रिसना विक, कृस्मा गुरुङ, अन्जी पाठक, मनीषा चौधरी, स्नेहा महरा र करुणा विष्ट छन् ।–न्युज एजेन्सी नेपाल