काठमाडौं । नेपाली राष्ट्रिय क्रिकेट टोली एसियाली खेलकुद छनोटको फाइनलमा प्रवेश गरेको छ। आइतबार बिहान सिंगापुरको सिंगा ओभल मैदानमा भएको सेमिफाइनल खेलमा ओमानलाई ८ विकेटले पराजित गर्दै नेपालले फाइनल यात्रा तय गरेको हो।

टस जितेर पहिले ब्याटिङ गरेको ओमानले निर्धारित १९.४ ओभरमा सबै विकेट गुमाउँदै ९४ रन मात्र बनाउन सक्यो। ओमानका लागि कप्तान सुफ्यन महमुदले सर्वाधिक ३८ रन जोडे भने अब्दुलजलिल खानले १६ र जुबाइर अली अकबरले २२ रनको योगदान दिए।

९५ रनको सामान्य लक्ष्य पछ्याएको नेपालले आक्रामक सुरुआत गर्दै ९.२ ओभरमै २ विकेटको क्षतिमा लक्ष्य पूरा गर्‍यो। नेपालको जितमा लोकेश बमले उत्कृष्ट प्रदर्शन गर्दै २६ बलमा ७ चौका र १ छक्कासहित अविजित ४४ रन बनाए। ओपनर कुशल भुर्तेलले २० रन जोडे भने कप्तान रोहित पौडेल २१ रनमा अविजित रहे।

बलिङतर्फ नेपालका लागि करण केसीले ३ विकेट लिँदा सोमपाल कामी र सन्दीप लामिछानेले २–२ विकेट हात पारे। त्यस्तै साहब आलम, कुशल मल्ल र दीपेन्द्रसिंह ऐरीले १–१ विकेट लिएर टोलीको जितमा योगदान गरे।

यस जितसँगै नेपाल एसियाली खेलकुदका लागि छनोट भइसकेको छ। सेमिफाइनल पुगेका अन्य तीन टोली पनि एसियाली खेलकुदका लागि छनोट भएका छन्। अब नेपालले उपाधिका लागि सोमबार हुने हङकङ र मलेसियाबीचको खेलको विजेतासँग प्रतिस्पर्धा गर्नेछ।

नेपाल अब उपाधि जित्ने लक्ष्यसहित फाइनलमा मैदान उत्रनेछ ।

काठमाडौँ। नेपाली राष्ट्रिय क्रिकेट टोलीका उपकप्तान दीपेन्द्रसिंह ऐरी आइसिसी टि–ट्वान्टी विश्व वरियताको अलराउन्डरतर्फ चौथो स्थानमा यथावत रहेका छन् ।

आइसिसीले आज सार्वजनिक गरेको नयाँ वरियतामा  दीपेन्द्र चौथो स्थानमा यथावत रहेका हुन् । वरियताअनुसार दीपेन्द्रको २४५ रेटिङ अङ्क छ ।

उक्त विश्व वरियतामा जिम्बाबेका सिकन्दर रजा ३२८ अङ्कसहित शीर्ष स्थानमा रहेका छन् । त्यस्तै भारतका हार्दिक पाण्ड्या दोस्रो तथा पाकिस्तानका साइम अयुब तेस्रो स्थानमा छन् । अफगानिस्तानका अजमतुल्लाह ओमरजाइ पाँचौँ स्थानमा रहेका छन् ।

त्यस्तै एकदिवसीय वरियताको अलराउन्डरतर्फ भने दीपेन्द्र तीन स्थान सुधार गर्दै २८औँ स्थानमा उक्लिएका छन् । उनको रेटिङ अङ्क १५३ छ । त्यस्तै नेपालका अर्का खेलाडी करण केसी तीन स्थान तल झर्दै ८४औँ स्थानमा पुगेका छन् ।

एकदिवसीय वरियताको ब्याटिङतर्फ भने दीपेन्द्र दुई स्थान सुधार गर्दै ९९औँ स्थानमा पुगेका छन् । त्यस्तै आसिफ शेख १३ स्थान सुधार गर्दै ९३औँ स्थानमा छन् ।  रासस