गण्डकी। राष्ट्रिय प्राकृतिक स्रोत तथा वित्त आयोगले गण्डकी प्रदेश प्रमुख डिल्लीराज भट्टसमक्ष आज आर्थिक वर्ष २०८१/८२ को वार्षिक प्रतिवेदन पेस गरेको छ ।

आयोगका कार्यवाहक अध्यक्ष जुद्धबहादुर गुरूङले नेपालको संविधानको धारा २९४ को उपधारा (३) बमोजिम प्रदेश प्रमुख भट्टलाई प्रतिवेदन हस्तान्तरण गर्नुभएको हो ।

प्रतिवेदन बुुझ्दै प्रदेश प्रमुख भट्टले स्रोत तथा वित्त आयोग मुलुकमा वित्तीय सङ्घीयता लागू गर्ने आर्थिक पाटोतर्फको मेरुदण्ड भएको उल्लेख गर्दै पर्याप्त प्राकृतिक स्रोतले पूर्ण भए पनि देशले पर्याप्त लाभ लिन नसकेकामा चिन्ता व्यक्त गर्नुभयो ।

नेपाल सानो क्षेत्रफलमा पर्याप्त प्राकृतिक स्रोत भएको देशका रूपमा रहेको बताउँदै उहाँले यसको उपयोगिताका सन्दर्भमा प्रभावकारी उचित नीति र योजना नहुँदा उपभोग गरी लाभ लिन समस्या भइरहेको उल्लेख गर्नुभयो ।

चालु आवका लागि गण्डकी प्रदेश सरकारलाई रु सात अर्ब ७३ करोड ८९ लाख र प्रदेशभित्रका स्थानीय सरकारलाई रु नौ अर्ब २२ करोड ९३ लाख वित्तीय समानीकरण अनुदान उपलब्ध गराउन सिफारिस गरिएकामा सङ्घीय सरकारले सोही बमोजिम बजेट विनियोजन गरेको उहाँले जानकारी दिनुभयो ।

सङ्घीय सरकारले सिफारिस बमोजिम बजेट विनियोजन गरे पनि प्रदेश तथा स्थानीय तहलाई पूरै रकम हस्तान्तरण नहुँदा प्रदेश र स्थानीय सरकारको बजेट कार्यान्वयन प्रभावित भएको प्रदेश प्रमुख भट्टको भनाइ छ ।

आर्थिक वर्ष २०८१/८२ को अवधिमा आयोगले गण्डकी प्रदेश तथा प्रदेशभित्रका स्थानीय सरकारसँग सम्बन्धित विषयमा सम्पादन गरेका कामकारबाहीहरू वार्षिक प्रतिवेदनमा समेटिएकोे आयोगका कार्यवाहक अध्यक्ष गुरूङले जानकारी दिनुभयो । रासस

गण्डकी। गण्डकी प्रदेश प्रमुख डिल्लीराज भट्टले मानवकल्याण नै सबैभन्दा ठूलो धर्म भएको बताउनुभएको छ ।

पोखराको विन्ध्यवासिनी धार्मिक क्षेत्र विकास समितिले आज पोखरामा आयोजना गरेको श्री हेमदेवी धर्म संस्कृति तथा समाज सेवा पुरस्कार अर्पण समारोहमा उहाँले सडक आश्रित सहयोगापेक्षी मानवको हित गर्ने कार्य पनि निकै पुण्यको कर्म भएको बताउनुभयो ।

समितिका तर्पmबाट प्रदेश प्रमुख भट्ट, अध्यक्ष गणेशबहादुर श्रेष्ठले यस वर्ष मावन सेवा आश्रम नेपाललाई संस्थागत पुरस्कार गर्नुभएको । उहाँहरुले आश्रमका सञ्चालक राम्जी अधिकारीलाई संयुक्त रुपमा पुरस्कार प्रदान गर्नुभएको थियो । समितिका संस्थापक अध्यक्ष स्व हेमबहादुर प्रधानले स्थापना गरेको रु १५ लाखको अक्षयकोषबाट  रु एक लाख एक हजार राशीको पुरस्कार प्रदान गरिएको हो ।

प्रदेश प्रमुख भट्टले मानवसेवा आश्रमले सुरु गरेको मानवता प्रवर्द्धनको महाअभियानलाई सबैले साथ र सहयोग गर्नुपर्नेमा जोड दिनुभयो ।

यसअघि राष्ट्रपतिको समुपस्थितिमा विशिष्ट संस्कृतिसाधक स्व सत्यमोहन जोशी, स्वामी आत्मानन्द गिरीजी महाराज, समाजसेवी दुर्गा घिमिरे, संस्कृतिविद् साहित्यकार तुलसी दिवस र स्वामी कमलनयन आचार्य मुक्तिनाथ बाबालाई यस पुरस्कारबाट सम्मान गरिसकिएको साहित्यकार तीर्थ श्रेष्ठले जानकारी दिनुभयो । रासस

पोखरा। गण्डकी प्रदेश प्रमुख डिल्लीराज भट्टले जिम्मेवार र मर्यादित पत्रकारिता आजको आवश्यकता भएकाले समाज र राष्ट्रप्रति जवाफदेही भएर पत्रकारिता गर्नुपर्ने आवश्यकता औँल्याउनुभएको छ ।

नेपाल पत्रकार महासङ्घ कास्की शाखाद्वारा आयोजित गजेन्द्र भण्डारी सृजनशील राष्ट्रिय पत्रकारिता पुरस्कार वितरण कार्यक्रममा उहाँले सामाजिक उत्तरदायित्व बहन गर्दै सत्यको अन्वेषण र तथ्यको सम्प्रेषणमार्फत पत्रकारिताको धर्म र जिम्मेवारी पूरा गर्न पत्रकारलाई आग्रह गर्नुभयो ।

प्रमुख भट्टले पत्रकारको सुरक्षाका साथै पत्रकारिता क्षेत्रको विकासमा राज्यले लगानी गर्नुपर्नेमा जोड दिनुभयो । “नेपालमा लोकतन्त्र र गणतन्त्र स्थापना, प्रेस तथा अभिव्यक्ति स्वतन्त्रताका लागि अग्रज पत्रकार तथा पत्रकारिता जगत्ले खेलेको भूमिका अविस्मरणीय छ”, उहाँले भन्नुभयो, “पत्रकारले दबाब र अभावसँग सम्झौता नगरी आफ्नो कर्मप्रति इमान्दारिता प्रदर्शन गरिरहेका छन् ।”

प्रविधिको विकाससँगै पत्रकारिता क्षेत्रमा अवसर र चुनौती दुवै सृजना भएको उल्लेख गर्दै उहाँले डिजिटल सञ्चारमाध्यमको अत्यधिक सदुपयोग गर्दै पत्रकारिताको विश्वसनियता अभिवृद्धि गर्ने दिशामा पत्रकार क्रियाशील हुने विश्वास व्यक्त गर्नुभयो ।

“आर्थिक सङ्कटले सञ्चारसंस्थाहरूको दिगोपनामा समस्या पार्ने खतरा देखा परिसकेको छ । नेपाली पत्रकारको पेसागत असुरक्षा र न्यूनतम पारिश्रमिक कार्यान्वयनमा समस्या यथावत छ”, प्रदेश प्रमुख भट्टले भन्नुभयो, “श्रमजीवी पत्रकारको पेसागत अधिकार सुरक्षित हुनु अपरिहार्य छ ।”

प्रेस स्वतन्त्रता सेनानी माधव शर्माले पत्रकारिता क्षेत्रमा देखिएको विकृति र विसङ्गतिले जनतामा नकरात्मक सोचको विकास हुन नदिन सत्य, तथ्य समाचार सम्प्रेषणमा जोड दिनुपर्ने बताउनुभयो ।

उक्त पुरस्कारबाट दुई जना पत्रकार सम्मानित हुनुभएको छ । दोसल्ला, सम्मानपत्रसहित रु २५ हजार राशि रहेको सो पुरस्कार वर्ष–२०८१ बाट केशव पाठक र २०८२ बाट दुर्गा अधिकारी सम्मानित हुनुभएको हो ।

पत्रकार महासङ्घ कास्कीका अध्यक्ष माधव बरालको अध्यक्षतामा भएको कार्यक्रममा महासङ्घ प्रदेश अध्यक्ष रमेश पौडेल, पुरस्कारदाता परिवारको तर्फबाट सन्तोष भण्डारी, पत्रकार दीपेन्द्र श्रेष्ठ, माधव रेग्मी, भुपाल गुरुङलगायतले पत्रकारिताको विकासमा पुरस्कारको महत्त्वपूर्ण भूमिका रहने बताउनुभएकाे थियाे । रासस

गण्डकी। गण्डकी प्रदेशका प्रदेश प्रमुख डिल्लीराज भट्टले मानवमा आत्मिक जागरण अपरिहार्य भएको बताएका छन् ।

ब्रह्माकुमारी ईश्वरीय विश्व विद्यालय एवं राजयोग प्रशिक्षण केन्द्र, पोखराले शिवरात्रिको अवसरमा आयोजना गरेको महाशिवरात्रि महोत्सव, प्रवचन, शिवध्वजारोहण एवं स्नेह मिलन समारोहको उद्घाटन गर्दै उहाँले आत्मिक जागरणले मानवलाई समृद्धितर्फ उन्मुख गराउने बताए।

विश्वमा शान्ति र सर्वपक्षीय समृद्धिको लक्ष्यका लागि मानवमा आत्मिक जागरण अपरिहार्य रहेको बताउँदै उनले अध्यात्म, ध्यान र योगले मानव कल्याण हुने उल्लेख गरे । मानवमा शान्त र सकारात्मक मन, सबल र शुद्ध बुद्धि एवं श्रेष्ठ र दिव्य संस्कार निर्माणका लागि ब्रह्माकुमारी ईश्वरीय विश्वविद्यालयको ठूलो योगदान गरेको प्रदेश प्रमुख भट्टको भनाइ छ ।

ब्रह्माकुमारी ईश्वरीय विश्वविद्यालय आध्यात्मिक शैक्षणिक संस्थाका रूपमा रहेको बताउँदै उनले मानव मूल्यहरूको पुनः स्थापनाद्वारा मूल्यनिष्ठ समाजको निर्माणार्थ यसले काम गरिरहेको पाएको उल्लेख गरे। उनले विश्वका डेढ सयबढी देशमा आफ्ना सेवा केन्द्रको माध्यमबाट समाजमा सकारात्मक परिवर्तन ल्याउने कार्य तथा तनावमुक्त जीवन, नैतिक मूल्य एवं मानवीय संस्कारको निर्माण गर्न विशेष भूमिका निर्वाह गरिरहेको बताए।

महाशिवरात्रिको अवसरमा नेपालीको जीवनमा आध्यात्मिक जागरणको नयाँ उज्यालो छर्न सकोस् भन्ने शुभकामना व्यक्त गर्दै प्रमुख भट्टले शिवोत्पत्ति भएको विश्वास गरिने मानसखण्डको भू–भाग, शिवको विचरणस्थल मानिने हिमवत्खण्डको मुख्य भूगोल एवं निवासस्थल मानिने पवित्र पाशुपत क्षेत्र नेपालसँग रहनु हाम्रा लागि गौरवको विषय रहेको बताए।

गण्डकी प्रदेशसभा सदस्य भीम कार्कीले संस्कार र संस्कृति हाम्रो पहिचान भएकाले यसलाई भुल्न नहुने आवश्यकता औँल्याए । रासस