विराटनगर । प्रदेश १ को नाम ‘कोसी प्रदेश’ होस् भनी गरिएको प्रस्ताव पारित भएको छ।

एमालेका प्रदेश सभा सदस्य राम राना मगरको प्रस्तावकमा प्रदेश १ को नाम ‘कोसी प्रदेश’ पारित भएको हो ।

सभामुख बाबुराम गौतमले प्रस्ताब पारित गर्ने पक्ष र विपक्षमा ध्वनी मत जाहेर गर्न भनेका थिए । अब ‘कोसी प्रदेश’ को विषयमा सभामा छलफल हुने छ ।

विराटनगर । प्रदेश १ को नामकरणका लागि नेकपा (एकीकृत समाजवादी) र जनता समाजवादी पार्टी (जसपा)ले छुट्टै प्रस्ताव दर्ता गरेका छन् ।

संसद सचिवालयमा दुई दलका सांसदले ‘किरात लिम्बुवान सगरमाथा’ प्रदेश प्रस्ताव दर्ता गरेका हुन् ।

एकीकृत समाजवादीका सांसद पूर्व मुख्यमन्त्री राजेन्द्रकुमार राईले दर्ता गरेको प्रस्तावमा एकीकृत समाजवादीका सांसद कमलप्रसाद जवेगु र जसपा सांसद निर्मला लिम्बूको समर्थन रहेको छ ।

यसैबीच, नेपाली कांग्रेस र नेकपा (एमाले)ले कोसी प्रदेश नाम पेश गर्ने सहमति गरेसँगै नेकपा (माओवादी केन्द्र)ले पनि उक्त प्रस्तावमा मतदान गर्ने निर्णय गरेको छ ।

विराटनगर । प्रदेश १ को नाम कोसी प्रदेश रहने करिब निश्चित भएको छ ।

नेपाली कांग्रेस र नेकपा (एमाले) ले कोसी प्रदेश नाम पेश गर्ने सहमति गरेसँगै नेकपा (माओवादी केन्द्र) ले पनि उक्त प्रस्तावमा मतदान गर्ने निर्णय गरेको छ ।

पहिचानको पक्षमा रहेको माओवादी केन्द्रले कोसीमा मतदान निर्णय गरेको हो । यसअघि माओवादी केन्द्रले पहिचानसहितको छुट्टै नाम प्रस्ताव गर्ने तयारी गरेको थियो ।

विराटनगर । प्रदेश नम्बर १ ले प्रदेशको नामाकरण सम्बन्धी प्रस्ताव पेश गर्न आह्वान गरेको छ ।

प्रदेश नम्बर १ को नामाकरणका लागि नेपालको संविधानको धारा २९५ को उपधारा (२) बमोजिम प्रदेशसभा सदस्यहरूलाई प्रस्ताव पेस गर्न आह्वान गरिएको हो ।

प्रदेश सभा नियमावली, २०७४ (पहिलो संशोधन समेत( को नियम ५८ (ख) (१) बमोजिम सोही नियमावलीको अनुसूची ९ को ढाँचामा प्रदेश नं. १ का प्रदेशसभा सदस्यहरूलाई आज १०:०० बजे देखि १२:०० बजे सम्म आफ्नो प्रस्ताव प्रदेश सभा सचिव समक्ष दर्ता गराउन अनुरोध गरिएको छ ।

विराटनगर । राष्ट्रिय प्रजातन्त्र पार्टी (राप्रपा) प्रदेश १ सरकारबाट तत्काल नबाहिरिने भएको छ ।

राप्रपाका मन्त्रीहरूले संघ र अन्य केही प्रदेशमा राजीनामा दिएपनि प्रदेश १ मा सहभागी मन्त्रीहरू भने तत्काल नबाहिरिने भएका हुन् ।

केन्द्रभन्दा प्रदेश १ को परिस्थिति फरक भएकाले पार्टी भित्र छलफल गरेर मात्रै यसबारे निर्णय लिने राप्रपा नेताहरूले बताए । राप्रपाले आज सरकारका विषयमा निर्णय गर्न प्रदेश कमिटीको बैठक बोलाएको छ ।

गत पुस २४ गते एमाले संसदीय दलका नेता हिकमत कार्कीको नेतृत्वमा गठन भएको १ नम्बर प्रदेश सरकारमा ६ सीट रहेको राप्रपाले कृषि तथा सहकारी मन्त्रालय पाएको छ ।

विराटनगर। नेपाली कांग्रेसकी प्रदेश सभा सदस्य डोल्मा तामाङले प्रदेश नम्बर एकको नाम ‘सगरमाथा’ राख्न प्रस्ताव गरेकी छन् ।

कांग्रेस संसदीय दलको तर्फबाट सोमबार बैठकमा विशेष समयमा बोल्दै सांसद तामाङले अघिल्लो सरकारले प्रदेशको नाम राख्न नसेकेको भन्दै अब विलम्ब नगरी नामकरणमा जोड दिनुपर्ने बताइन् ।

“संसारले चिनेको विश्वकै अग्लो शिखरको नामबाट प्रदेश १ को नाम राख्न उपयुक्त हुन्छ, सगरमाथाको देश भनेर चिनिएको नेपालमा प्रदेशको नाम राख्न हामी किन पछि परिरहेको छौं,” तामाङले भनिन्, “यो निर्णय गर्दा सबैको शिर उँचो हुन्छ । इज्जत पनि बढ्छ ।” अरू सबै प्रदेशले नाम राखिसकेको अवस्थामा प्रदेश १ ले अहिलेसम्म नाम राख्न नसक्दा शिर झुेकेको उनले बताइन्।

उनले प्रदेशले खर्च बढाएको भन्ने आरोपलाई चिर्न मन्त्रालयको संख्या घटाउने काम भएको र प्रदेशको औचित्य पुष्टि गर्नुपर्ने बताइन् । उनले कांग्रेस रचनात्मक प्रतिपक्षीको भूमिकामा रहने पनि बताइन् ।

विराटनगर । प्रदेश १ मा मन्त्रिपरिषद् विस्तार भएको छ । मुख्यमन्त्री हिक्मत कार्कीले मन्त्रिपरिषद् विस्तार गरेर सात सदस्यीय मन्त्रिपरिषद् बनाउनुभएको छ । शुक्रबार तीन मन्त्रीले सपथ लिएका छन् ।

नेकपा (माओवादी केन्द्र)बाट तेह्रथुमका दुर्गा चापागाईं, मोरङका जीवन आचार्य र नेकपा (एमाले) बाट सोलुखुम्बुका बुद्धिकुमार राजभण्डारीले पद तथा गोपनीयताको सपथ लिनुभएको हो ।

केन्द्रीय सत्ता गठबन्धनले प्रदेश १ मा पूरै कार्यकाल एमालेलाई सत्ता सञ्चालन गर्न दिने गरेको सहमतिप्रति असन्तुष्ट प्रदेश माओवादी केन्द्र आजदेखि सरकारमा सहभागी भएको छ ।

नवनियुक्त मन्त्री आचार्य प्रधानमन्त्री पुष्पकमल दाहाल प्रचण्डका ज्वाइँ हुनुहुन्छ । तीनै जना मन्त्रीको जिम्मेबारी तोक्न भने बाँकी छ । यसअघि मुख्यमन्त्री कार्कीसँगै सपथ लिएका तीन जना मन्त्री
पनि विनाविभागीय छन् ।

एमालेका तिलकुमार मेन्याङ्बो (तोप्लेजङ), राष्ट्रिय प्रजातन्त्र पार्टी (राप्रपा) का भक्तिप्रसाद सिटौला (झापा) र जनता समाजवादी पार्टी (जसपा) की निर्मला लिम्बू (ताप्लेजुङं) यसअघि नै मन्त्री भइसक्नुभएको छ ।

बिराटनगर । प्रदेश १ को सभामुखमा माओवादी केन्द्रका सांसद बाबुराम गौतम निर्विरोध निर्वाचित भएका छन् । बिहीबार बसेको बैठकमा सभाका जेष्ठ सदस्य गयानन्द मण्डलले गौतमलाई निर्विरोध निर्वाचित भएको घोषणा गरेका हुन् ।

सभामुखमा एकल उम्मेदवारी परेका गौतमलाई सत्ता पक्ष र प्रतिपक्षी दल दुबैको समर्थन रहेको थियो ।

संसद् सचिवालयका अनुसार गौतमले आजै १ बजे शपथ ग्रहण गर्नेछन् । उनलाई प्रदेश प्रमुख परशुराम खापुङले शपथ गराउने छन् ।

माओवादी केन्द्रका केन्द्रीय सदस्य समेत रहेका गौतम ओखलढुङ्गाको प्रदेशसभा १(२) बाट प्रत्यक्ष निर्वाचित भएका थिए ।

विराटनगर । प्रदेश १ को सभामुखमा माओवादी केन्द्रका सांसद बाबुराम गौतमको एकल उम्मेदवारी परेको छ ।

सभामुखको निर्वाचनका लागि आज बिहान ११ बजे बैठक बस्न लागेको प्रदेश सभा सचिवालयले जानकारी दिएको छ । सोहि बैठकले गौतमलाई निर्वाचित भएको घोषणा गर्ने बताईएको छ ।

ज्येष्ठ सदस्य गयानन्द मण्डलले माओवादी उम्मेदवार गौतमलाई निर्विरोध निर्वाचित भएको घोषणा गर्ने तयारी गरिएको छ । गौतमलाई सत्ता पक्ष र प्रतिपक्षी दल दुबैको समर्थन रहेको छ ।

संसद् सचिवालयका प्रमुख गोपाल पराजुलीका अनुसार गौतमले आजै १ बजे शपथ ग्रहण गर्ने कार्यक्रम रहेको छ । उनलाई प्रदेश प्रमुख परशुराम खापुङले शपथ गराउने छ ।

माओवादी केन्द्रका केन्द्रीय सदस्य समेत रहेका गौतम ओखलढुङ्गाको प्रदेशसभा २(१) बाट प्रत्यक्ष निर्वाचित भएका थिए ।

विराटनगर । प्रदेश १ का नवनियुक्त मुख्यमन्त्री हिक्मतकुमार कार्कीले आज पद तथा गोपनीयताको सपथ लिँदै हुनुहुन्छ । उहाँसँगै ३ जना मन्त्रीले पद तथा गोपनीयताको सपथ लिने भएका छन् ।

केन्द्रमा नेकपा (माओवादी केन्द्र) ले प्रदेश १ मा नेकपा (एमाले) लाई सम्पूर्ण कार्यकाल मुख्यमन्त्री बनाउने सहमति गरपछि असन्तुष्ट बनेको प्रदेशको माओवादी केन्द्रले तत्काल सरकारमा नजाने स्पष्ट गरेको छ ।

आज माओवादी केन्द्रबिनै ३ मन्त्रीले सपथ लिनुहुने जनाएको छ । एमालेबाट तिलकुमार मेन्याङ्बो, राष्ट्रिय प्रजातन्त्र पार्टी (राप्रपा) बाट भक्ति सिटौला र जनता समाजवादी पार्टी (जसपा) बाट निर्मला लिम्बूले सपथ लिनुहुनेछ । मन्त्रीहरुको मन्त्रालयल अहिलेलाई नतोकिएको बताइएको छ ।

विराटनगर । प्रदेश १ को सभामुखमा नेकपा माओवादी केन्द्रका बाबुराम गौतम हुने भएका छन् । सत्ता साझेदार दलहरूका बिचमा सिट बाँडफाँड हुँदा प्रदेश १ को सभामुखको भाग माओवादीलाई परेसँगै पार्टिले गौतमलाई सभामुख बनाउने तयारी गरेको हो ।

गौतम ओखलढुंगा १(२)बाट निर्वाचित भएका हुन् ।

यसअघि संखुवासभाबाट निर्वाचित राजेन्द्र कार्कीलाई सभामुख बनाउने चर्चा थियो । तर माओवादीले अन्तिममा गौतमलाई सभामुख बनाउने निर्णय गरेको हो ।

काठमाडौँ । प्रदेश १ को सभामुख निर्वाचन यही पुष २८ गते हुने भएको छ । आइतबार संसद् सचिवालयमा बसेको सर्वदलीय बैठकले उक्त मितिमा सभामुखको निर्वाचन गराउने निर्णय गरेको हो ।

यस्तै उपसभामुखको निर्वाचन ३० गते गर्ने निर्णय भएको नेकपा एमालेका प्रमुख सचेतक रेवतीरमण भण्डारीले जानकारी दिए । उनका अनुसार सभामुखको निर्वाचन कार्यतालिका २६ गते सार्वजनिक हुने छ ।

मुख्यमन्त्री एमालेले पाउने र सभामुख पद नेकपा माओवादी केन्द्रले पाउने सत्तारूढ दलले सहमति गरेका छन् । माओवादी केन्द्रबाट सभामुखमा ओखलढुंगाका बाबुराम गौतम र सङ्खुवासभाका राजेन्द्र कार्कीले दाबी गरेका छन् ।

काठमाडौँ । प्रदेश १ मा सरकारको मुख्यमन्त्री दाबी गर्ने समयसीमा आज बेलुका ५ बजे सकिँदैछ । प्रदेशप्रमुख पर्शराम खापुङले प्रदेश १ मा मुख्यमन्त्रीमा दाबी गर्न प्रदेशसभामा प्रतिनिधित्व गर्ने दलहरुलाई आज बेलुका ५ बजेसम्मको समयसीमा दिनुभएको थियो ।

सत्ता साझेदारहरुले आजै नेकपा (एमाले) का हिक्मतकुमार कार्कीको नेतृत्वमा सरकार बनाउने तयारी गरेको बताइएको छ । झापा निर्वाचन क्षेत्र नं ५(१) बाट निर्वाचित कार्की मुख्यमन्त्री बन्ने भएका छन् । उनी एमाले स्थायी कमिटी सदस्यसमेत हुन् ।

यसअघिको प्रदेश सरकारमा उनी आन्तरिकमामिला तथा कानूनमन्त्री थिए ।

सो प्रदेशको मुख्यमन्त्रीमा दाबी गरिरहेको नेकपा (माओवादी केन्द्र) निकट नेताहरुले एमालेकै नेतृत्वमा सरकार बन्ने बताएका छन् ।

यही पुस १७ गते प्रदेशप्रमुख खापुङले संविधानको धारा १६८ को उपधारा २ बमोजिम मुख्यमन्त्रीको दाबी गर्न आह्वान गर्नुभएको थियो ।

९३ सदस्यीय प्रदेश १ को प्रदेशसभामा कुनै दलको पनि एकल बहुमत पुग्न नसकेकाले दुई वा दुईभन्दा बढी दलका सदस्यहरुको समर्थनमा मुख्यमन्त्री दाबी गर्न आह्वान गरिएको थियो ।

एमालेको ४० र माओवादीको १३ सिटले सरकार बनाउन आवश्यक बहुमत (४७) सिट सजिलै पुग्ने अवस्था छ । केन्द्रीय गठबन्धनमा सामेल राष्ट्रिय प्रजातन्त्र पार्टी (राप्रपा) को ६ र जनता समाजवादी पार्टी (जसपा) को १ सिट थपिँदा सरकारलाई कुल ६० सिटको समर्थन प्राप्त हुनेछ ।

प्रदेश १ मा नेपाली कांग्रेसको २९ र नेकपा (एकीकृत समाजवादी) को ४ सिट छ ।

विराटनगर । नेकपा (एमाले) ले प्रदेश १ मा शुक्रबारसम्ममा सरकार गठनका लागि दाबी पेस गर्ने जनाएको छ । प्रदेश १ मा एमाले सबैभन्दा ठूलो दलसमेत हो ।

एमाले संसदीय दलका नेता हिक्मतकुमार कार्कीले आगामी शुक्रबारसम्म सत्ता साझेदार दलहरुबीच सहमति गरेर प्रदेश प्रमुखसमक्ष सरकार गठनका लागि दाबी पेस गर्ने जानकारी दिनुभयो । उहाँका अनुसार एमालेकै नेतृत्वमा यो प्रदेशमा सरकार गठन हुनेछ ।

उहाँले सरकार गठनका लागि अनौपचारिक छलफल भइरहेको र अब यसले औपचारिकता पाउने बताउनुभयो ।

यस प्रदेशमा एमालेका ४०, नेकपा (माओवादी केन्द्र) का १४, राष्ट्रिय प्रजातन्त्र पार्टी (राप्रपा) का ६ र जनता समाजवादी पार्टी (जसपा) का १ सदस्य रहेका छन् । संघीय एमालेको नेतृत्वमा बन्ने सरकारमा यी सबै दल जाने देखिएको छ ।

संघीय सरकारमा यी दलसहित राष्ट्रिय स्वतन्त्र पार्टी (रास्वपा), जनमत पार्टी र नागरिक उन्मुक्ति पार्टीले गठबन्धन गरेका छन् । तर रास्वपाले कुनै पनि प्रदेशमा उम्मेदवारी दिएको थिएन भने जनमत पार्टी र नागरिक उन्मुक्ति पार्टीले यो प्रदेशमा कुनै सिट ल्याउन सकेका थिएनन् ।

एमालेको नेतृत्वमा सरकार बन्ने अवस्थामा यस प्रदेशमा नेपाली कांग्रेस र नेकपा (एकीकृत समाजवादी) प्रतिपक्षमा बस्नेछन् ।

प्रदेशप्रमुख पर्शुराम खापुङले संविधानको धारा १६८ को उपधारा (२) बमोजिम सरकार गठनका लागि प्रदेशसभामा प्रतिनिधित्व गर्ने दलहरुलाई यी पुस २४ गते आइतबार बेलुका ५ बजेभित्र दाबी पेश गर्न आह्वान गर्नुभएको छ ।

विराटनगर । यही पुस २४ गते आइतबार बेलुका ५ बजेभित्र प्रदेश १ मा मुख्यमन्त्री नियुक्त गर्नका लागि दाबी पेस गर्न समयसीमा दिइएको छ ।

प्रदेशप्रमुख पर्शुराम खापुङले संविधानको धारा १६८ को उपधारा (२) बमोजिम सरकार गठनका लागि प्रदेशसभामा प्रतिनिधित्व गर्ने दलहरुलाई दाबी पेश गर्न आह्वान गर्नुभएको हो ।

प्रदेश १ मा कुनै पनि दलले एकल बहुमत हासिल नगरेकाले उपधारा २ बमोजिम प्रदेशसभामा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत पुर्याएर मुख्यमन्त्री नियुक्तिका लागि दाबी पेश गर्न आह्वान गरिएको हो ।

विराटनगर । नेपाली कांग्रेस प्रदेश १ को संसदीय दलको नेतामा उद्वव थापा विजयी भएका छन् । पार्टीका प्रदेश कमिटी सभापतिसमेत रहेका थापाले १८ मत प्राप्त गरेर विजयी भएका हुन् ।

प्रदेश १ मा कांग्रेसका २९ सांसद छन् । जसमा थापासँगै भिडेका केदार कार्कीले ९ र अमृत अर्यालले २ मत प्राप्त गरे ।

उद्वव थापा कृष्ण सिटौलानिकटका हुन् । त्यस्तै अर्याल सभापति शेरबहादुर देउवानिकट र कार्की शेखर कोइरालानिकटका हुन् ।

मोरङ । नेपाली कांग्रेस संसदीय दलको नेता चयनका लागि प्रदेश नं १ मा आज निर्वाचन हुँदै छ । निर्वाचन सकिएलगत्तै परिणाम सार्वजनिक गर्ने निर्वाचन समितिका संयोजक रमेशजङ्ग रायमाझीले जानकारी दिनुभयो ।

प्रदेश नं १ को प्रदेशसभामा कांग्रेसबाट प्रत्यक्षतर्फ १७ र समानुपातिकतर्फ १२ गरी २९ जना विजयी भएका थिए । कांग्रेसको विधानअनुसार दलको नेता हुन ५१ प्रतिशत मत प्राप्त गर्नुपर्छ । त्यसैले दलको नेता बन्न २९ मध्ये १५ मत आवश्यक पर्छ । आज हुने निर्वाचनमा कुनै उम्मेदवारले ५१ प्रतिशत मत नल्याएको अवस्था पुनः आजै अर्को निर्वाचन गरेर दलको नेता चयन गर्ने तय भएको रायमाझीले जानकारी दिनुभयो ।

दलको नेताका लागि कांग्रेस प्रदेश नं १ का सभापति उद्धव थापा, केन्द्रीय सदस्य अमृत अर्याल र केदार कार्की चुनावी प्रतिस्पर्धामा छन् ।