काठमाडौँ । सैनिक प्रहरी गणले नेपाली सेनाका उपरथी प्रेम शाहीलाई नियन्त्रणमा लिएको छ । अदालतले सेवाअवधि एक वर्ष थपेपछि हाजिर हुन जंगी अड्डा जाने तयारीमा रहेका शाहीलाई सेनाले नियन्त्रणमा लिएको हो ।

आफ्नो पदावधि अझै एक वर्ष बाँकी रहेको दाबी गर्दै शाहीले नेपाली सेनाको जंगी अड्डा र रक्षा मन्त्रालयविरुद्ध यही पुस ७ गते सर्वोच्च अदालतमा रिट दायर गरेका थिए ।

अदालतले उनको पक्षमा आदेश दिएपछि हाजिर हुन जंगी अड्डा जाने तयारीमा रहेका उनलाई सैनिक प्रहरी गणले नियन्त्रणमा लिएको हो ।

विगतमा परेका केही उजुरीको विषयमा छानबिन गर्नुपर्ने भएकाले उपरथी शाहीलाई ‘भित्रै बस्न’ निर्देशन भएको नेपाली सेनाका प्रवक्ता कृष्णप्रसाद भण्डारीले बताउनुभयो । उहाँका अनुसार अदालतको आदेश एउटा पाटो भए पनि उहाँ विरुद्ध परेका उजुरीका विषयमा छानबिन गर्न बाँकी छ ।

उपरथी शाहीमाथि ‘आर्थिक अनियमितता’ गरेको आरोप लागेको बताइएको छ । यसअघिका प्रधानसेनापति पूर्णचन्द्र थापाका नजिकका अधिकृत मानिने शाहीको शैक्षिक प्रमाणपत्रमा दुई प्रकारको उमेर देखिएको थियो ।

सैनिक मुख्यालयको अभिलेखअनुसार यही पुस २० गते उनी अनिवार्य अवकास हुँदैछन् । अवकाशको १५ दिनअघि बिदा बस्ने परम्पराअनुसार उनी बिदामा समेत बसेका थिए । तर यही बेला सर्वोच्चले उनको सेवावधि एक वर्ष लम्बिने गरी आदेश दिएको थियो ।