काठमाडौँ । उज्यालो नेपाल पार्टी (उनेपा)का अध्यक्ष कुलमान घिसिङले सीमा विवादका सम्बन्धमा प्रधानमन्त्री बालेन्द्र शाहले हालै संसदमा दिएको अभिव्यक्तिले थप संसय र प्रश्नहरू जन्माएको जनाउनु भएको छ ।

घिसिङले सामाजिक सञ्जालमार्फत प्रतिक्रिया जनाउदै राष्ट्रिय स्वाभिमान, भौगोलिक अखण्डता र सार्वभौमिकतासँग जोडिएका विषयमा सरकारको अभिव्यक्ति अत्यन्त जिम्मेवार, स्पष्ट र प्रमाणमा आधारित हुनुपर्ने उल्लेख गर्नुभएको छ ।

उहाँले लेख्नुभएको छ

प्रतिनिधिसभाको आइतबारको बैठकमा सम्माननीय प्रधानमन्त्री बालेन्द्र शाहले “भारतले नेपालको भूमि मिचिरहेको मात्रै नभई नेपालले पनि भारतको भूमि मिचेको आफूले हालसालै थाहा पाएको” भन्ने अभिव्यक्ति दिनुभएको विषय अत्यन्त गम्भीर, संवेदनशील र राष्ट्रिय हितसँग प्रत्यक्ष रूपमा जोडिएको विषय हो। नेपाल–भारत सीमा विवाद कुनै नयाँ विषय होइन। दुवै देशले सीमा सम्बन्धी केही क्षेत्रमा विवाद रहेको स्वीकार गर्दै आएका छन् र नेपालले विगतदेखि नै उपलब्ध ऐतिहासिक दस्तावेज, नक्सा, सन्धि तथा तथ्य–प्रमाणका आधारमा आफ्नो अडान स्पष्ट रूपमा राख्दै आएको छ।

यस्तो अवस्थामा सार्वभौम राष्ट्रको प्रधानमन्त्रीले संसदजस्तो सर्वोच्च लोकतान्त्रिक मञ्चबाट दिएको यस्तो अभिव्यक्तिले नेपालको राष्ट्रिय अडानलाई कमजोर बनाउने, सीमा सम्बन्धी विषयमा अन्तर्राष्ट्रिय स्तरमा भ्रम सिर्जना गर्ने तथा तथ्य र प्रमाणका आधारमा नेपालले उठाउँदै आएको वैध दाबीलाई समेत प्रभावित पार्ने जोखिम उत्पन्न गर्दछ। राष्ट्रिय स्वाभिमान, भौगोलिक अखण्डता र सार्वभौमिकतासँग जोडिएका विषयमा सरकारको अभिव्यक्ति अत्यन्त जिम्मेवार, स्पष्ट र प्रमाणमा आधारित हुनुपर्छ। विशेषत: राष्ट्रिय स्वतन्त्र पार्टीका सभापतिको भारत भ्रमणको पूर्वसन्ध्यामा सोही पार्टीका वरिष्ठ नेता तथा प्रधानमन्त्रीबाट आएको यस्तो अभिव्यक्तिले थप सॅसय र प्रश्नहरू जन्माएको छ।

त्यसैले प्रधानमन्त्रीले आफ्नो अभिव्यक्तिको आधार, सन्दर्भ र तथ्य सार्वजनिक गर्दै देश र जनतासमक्ष स्पष्ट धारणा राख्न आवश्यक छ। नेपाल–भारत सीमा समस्या भावनात्मक वा अनुमानका आधारमा होइन, उपलब्ध ऐतिहासिक तथ्य, प्रमाण, नक्सा र दुवै देशका विज्ञहरूको अध्ययनका आधारमा समाधान हुनुपर्छ। राष्ट्रिय हितका विषयमा अस्पष्टता होइन, दृढता र जिम्मेवारी अपेक्षित हुन्छ। सीमा सम्बन्धी विषय कुनै दल वा व्यक्तिको होइन, सम्पूर्ण राष्ट्रको साझा चासो र संवेदनशील विषय हो। त्यसैले यस्ता अभिव्यक्तिप्रति गम्भीर समीक्षा र स्पष्टिकरण आवश्यक छ।

काठमाडौं । प्रधानमन्त्री बालेन्द्र शाहले काठमाडौं उपत्यकाका सुकुमवासी समस्या तत्कालै समाधान हुने विषय नभएको भन्दै व्यवस्थित र दीर्घकालीन कार्यान्वयन आवश्यक रहेको बताएका छन्।

आइतबार प्रतिनिधिसभा बैठकमा सांसदहरूले उठाएका प्रश्नको जवाफ दिने क्रममा प्रधानमन्त्री शाहले लामो समयदेखि समाधान हुन नसकेको सुकुमवासी समस्या एकैछिनमा समाधान हुने अपेक्षा गर्नु व्यावहारिक नहुने स्पष्ट पारे।

उनले ३५ वर्षमा समाधान नभएको समस्या ३५ मिनेटमा हुँदैन भन्दै हतारमा भन्दा योजनाबद्ध रूपमा अघि बढेर मात्रै वास्तविक समाधान सम्भव हुने धारणा राखे।

प्रधानमन्त्री शाहका अनुसार सरकारले वास्तविक सुकुमवासीको पहिचान गर्ने, अस्थायी रूपमा होल्डिङ सेन्टरमा राख्ने र त्यसपछि स्थायी जग्गा व्यवस्थापन गर्ने नीति अनुसार काम अघि बढाइरहेको छ।

उनले स्थानीय तहमा रहँदा नै संघीय सरकारलाई यस्तो मोडेल अपनाउन सुझाव दिएको उल्लेख गर्दै अब संघीय तहमा त्यसलाई कार्यान्वयनको चरणमा लैजाने प्रयास भइरहेको बताए।

भूमि सम्बन्धी समस्या समाधानका लागि समिति गठन भइसकेको र अर्थ मन्त्रालयले चालु आर्थिक वर्षभित्र व्यवस्थापन प्रक्रिया अघि बढाउने तयारी गरेको पनि उनले जानकारी दिए।

यसैबीच, विगतका वर्षमा सुकुमवासी बस्तीहरू बाढी, डुबान र फोहोरजन्य स्वास्थ्य जोखिममा परेको कारण सुरक्षित स्थानान्तरण आवश्यक भएको सरकारको भनाइ छ।

तस्बिरः प्रदीपराज वन्त-रासस

काठमाडौं: प्रधानमन्त्री बालेन्द्र शाहले नेपालको सार्वभौम संसदमा उभिएर नेपालले भारतको जमिन मिचेको बताएका छन् ।

संसदमा कालापानी लिपुलेकको विषयमा श्रम संस्कृति पार्टीका आरेन राईले राखेको प्रश्नको जवाफ दिँदै प्रधानमन्त्रीले यो तहको जानकारी गराएका हुन् ।

उनले भने, ‘तपाईंहरूलाई सुन्दा अचम्म लाग्ला, मैले पनि भर्खरै थाहा पाएँ । भारतले मात्र नभएर नेपालले पनि भारतको जग्गा मिचेको रहेछ । हामी टेबल टकमा बसेर एकअर्काको जमिन मिचिएको विषयमा छलफल गर्नेछौं ।’

विगतमा भारतले कालापानी लिपुलेकमा नेपालको भूमि अतिक्रमण गरेको बताउँदै विरोध हुँदै आएको थियो ।

तर प्रधानमन्त्री शाहले गम्भीर प्रश्न उठाएर नेपालको सार्वभौम विषयमा खेलवाड गरेको जानकारहरुले बताएका छन् ।

तस्बिरः प्रदीपराज वन्त-रासस

काठमाडाैँ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा मन्त्रिपरिषद् बैठक शुरु हुनुअघि सञ्चारकर्मीहरूलाई दृश्य सङ्कलन (भिडियो खिच्न) मा अवरोध पुर्‍याइएको छ ।

कार्यालय बाहिरबाट भिडियो खिचिरहेका सञ्चारकर्मीहरूलाई प्रधानमन्त्री बालेन्द्र साहले रोक्न निर्देशन दिएपछि सुरक्षाकर्मीले कडाइ गरेका हुन् । मन्त्रिपरिषद् बैठकमा सहभागी हुन पुग्नुभएका प्रधानमन्त्री साहले बाहिरबाट भिडियो खिचिरहेका पत्रकारहरूतर्फ सङ्केत गर्दै सुरक्षाकर्मीहरूसँग असन्तुष्टि व्यक्त गर्नुभएको थियो ।

प्रधानमन्त्री कार्यालयभित्र प्रवेश गरेलगत्तै त्यहाँ तैनाथ सुरक्षाकर्मीहरूले बाहिर रहेका भिडियो पत्रकारहरूलाई सो स्थानबाट तत्काल निस्कन र दृश्य सङ्कलन नगर्न आदेश दिएका थिए । सार्वजनिक सरोकारका सूचना र गतिविधिहरू सङ्कलन गर्न पुगेका सञ्चारकर्मीहरूमाथि प्रधानमन्त्रीकै उपस्थितिमा भएको यस प्रकारको व्यवहारले प्रेस स्वतन्त्रताको विषयमा चासो बढाएको छ ।

राज्यको प्रमुख प्रशासनिक केन्द्रमा सञ्चारकर्मीहरूलाई आफ्नो व्यावसायिक जिम्मेवारी पूरा गर्न बाधा पुर्‍याइनुले सूचनाको हक र स्वतन्त्र पत्रकारिताको मर्ममाथि प्रहार भएको सञ्चार क्षेत्रका जानकारहरूले बताएका छन् ।

काठमाडौं: राष्ट्रपति रामचन्द्र पौडेलले संसदको दुबै सदनलाई आज सम्बोधन गर्नेक्रममा न्यायालयको कार्यसम्पादन प्रति गरिएको टिप्पणीलाई धेरैले अनौठो र आश्चर्यजनक मानेका छन् ।

प्रधानमन्त्री बालेन्द्र शाहले राष्ट्रपति मार्फत वाचन गर्न दिइएको सम्बोधन भाषणमा न्यायालयका प्रति टिप्पणी गरिएको छ । अर्थात् राष्ट्रपतिले गरेको सम्बोधन सरकारकै धारणा रहेकामा विवाद छैन ।

राष्ट्रपतिले सम्बोधनका क्रममा न्यायालयको कार्यसम्पादन छिटो छरितो, स्वतन्त्र र निष्पक्ष नरहेको संकेत गरेका थिए । उनले परिवर्तनका लागि जीवन उत्सर्ग गर्ने शहीदहरूप्रति सम्मान हुनका लागि न्यायालयको कार्यसम्पादनमा परिवर्तन देखा पर्नुपर्ने बताएका छन् ।

 

राष्ट्रपतिको सम्बोधनमा के भनिएको छ ?

न्यायपालिकाबाट छिटो छरितो, स्वतन्त्र र निष्पक्ष न्यायसम्पादन हुन सक्यो भने मात्र परिवर्तनका लागि अमूल्य जीवन उत्सर्ग गर्ने शहीदहरूप्रति साँचो अर्थमा सम्मान हुने ठहर्छ ।

शक्ति पृथकीकरणमाथि खेलबाड

नेपालको संविधानले शक्ति पृथकीकरणको सिद्धान्तलाई आत्मसात गरेको छ । कार्यपालिका, न्यायपालिका र व्यवस्थापिकाका आफ्नै काम र सीमा छन् । एकले अर्कोको कार्यप्रति बढी चासो र हस्तक्षेप हुने अवस्था आएमा न्याय निरुपणमा प्रभाव पर्ने निश्चित छ ।

अझ नितान्त स्वतन्त्र रहनु पर्ने न्यायालयमाथि राष्ट्रपतिको सम्बोधन मार्फत गरिएको यो टिप्पणी शोभनीय पटक्कै होइन ।

पछिल्ला केही समयदेखि न्यायालयले सरकारले चाहे अनुसार काम नगरेको भन्दै टिप्पणी हुने गरेको छ । तर न्यायालयले गर्ने काम र न्याय निरुपण गर्ने भनेको संविधान, कानुन र कानुनी राज्यको अवधारणा बमोजिम नै हो ।

संविधानका एक जानकारका अनुसार, राष्ट्रपतिको सम्बोधन मार्फत बालेन सरकारले न्यायालयमाथि प्रभाव र दबाब सिर्जना गर्न चाहेको रुपमा बुझ्न सकिन्छ जुन गलत हो ।

काठमाडौं । प्रधानमन्त्री बालेन्द्र शाह (बालेन)ले लुम्बिनी प्रदेशबाट निर्वाचित प्रतिनिधि सभा सदस्यसँग छलफल गर्नुभएको छ । छलफलका क्रममा सांसदहरूले प्रदेशका विकास निर्माणका विषयलाई प्राथामिकता दिएका थिए ।

उनिहरुले प्रधानमन्त्री शाहलाई भैरहवा विमानस्थल सञ्चालनका लागि हवाई मार्गबारे भारतसँग कुराकानी गर्न आग्रह गरेका छन् । छलफलमा सहभागी नेपाली कम्युनिस्ट पार्टी (नेकपा) का सांसद एवं पूर्वअर्थमन्त्री वर्षमान पुनले रोल्पा तथा लुम्बिनी प्रदेशका चालु विकास आयोजना र केही नयाँ परियोजनालाई प्राथमिकतामा राखेर काम अघि बढाउन प्रधानमन्त्री शाहको ध्यानाकर्षण गराएको जानकारी दिनुभयो ।

उहाँले भैरहवा क्षेत्रीय अन्तर्राष्ट्रिय विमानस्थल तत्काल सञ्चालनमा ल्याउनका लागि हवाई मार्गका विषयमा भारतसँग कूटनीतिक संवाद अघि बढाउन सुझाब दिनुभयो ।

उहाँले भन्नुभयो ‘भैरहवा विमानस्थलमा श्रम डेस्क राखेर अन्तर्राष्ट्रिय उडान नियमित गरेर पर्यटन क्षेत्रमा सम्भावनाको ढोका खोल्न अब ढिला गर्नु हुँदैन’, पुनले छलफलमा भने, ‘अन्तर्राष्ट्रिय हवाई मार्गका लागि भारतसँग कूटनीतिक पहल गर्न सम्माननीय प्रधानमन्त्रीको ध्यानाकर्षण गराउन चाहन्छु।’

सासदहरुले लुम्बिनी प्रदेशमा सिंचाई, मल, बिउ, आधुनिक कृषि औजार र बजार व्यवस्थापनसहित एकीकृत विकास परियोजना अघि बढाउन पनि सुझाब दिएका छन् ।

काठमाडौँ: प्रधानमन्त्री बालेन्द्र शाहले सबै मन्त्री र सचिवहरुलाई कडा निर्देशन दिँदै सरकारले जारी गरेका सुधारका सय सूचीका कार्यक्रमहरु तत्कालै थाल्न भनेका छन् ।

उनले हिजो र आज सबै मन्त्रीलाई प्रधानमन्त्रीको कार्यालयमा बोलाएर सो निर्देशन दिएका हुन् । उनले नेपाल सरकारले यही चैत १३ गते पास गरेको सुधारका कार्यक्रम अन्तर्गतका एक सय बुँदे कार्यक्रम तत्कालै थाल्न निर्देशन दिएका हुन् ।

निर्देशनमा उनले भनेका थिए– यो हामीले चुनावकै बेलामा गरेको बाचा हो । त्यसै अनुरुप ल्याइएको हो र सार्वजनिक पनि भैसकेको छ । अब जनताले काम खोज्छन् । त्यसैले आजैबाट काम थाल्नुहोस्, नसकिने केही छैन । मलाई प्रगति विवरण मात्र सुनाउनुहोस ।

प्रधानमन्त्री शाहले कुनै बाधा अड्चन आएमा आफूलाई भन्न र नभए खुरु खुरु काम गरेर सय दिनका सय सूचीका काम पूरा गर्न निर्देशन दिएका हुन् ।

यसैबीच आज प्रधानमन्त्री शाहले पोखरा महानगरपालिकाका प्रमुख धनराज आचार्यलाई फोन गरेर फेवातालको अतिक्रमण रोक्ने विषयमा के कति प्रगति भएको छ भनेर जानकारी मागेका थिए ।

यसअघि सर्वोच्च अदालतले सो अतिक्रमण हटाउन दिएको आदेश बमोजिम काम भए नभएको बारेमा उनले पोखराका मेयरसँग सोधपुछ गरेका प्रधानमन्त्री बालेनको सचिवालयले जनाएको छ ।

काठमाडौं । प्रधानमन्त्री बालेन्द्र शाह (बालेन) ले आफ्नो सचिवालय टिम पनि बनाउनु भएको छ ।

शाहले प्रमुख सल्लाहकारमा कुमार बेनलाई नियुक्त गर्नुभएको छ । यसैगरी राजनीतिक सल्लाहकारमा असिम शाह मुख्य स्वकीय सचिवमा सुवास शर्मा र सुदिप ढकाललाई प्रधानमन्त्रीको प्रशासन प्रमुखको जिम्मेवारी दिइएको छ।

सूचना, सञ्चार तथा प्रविधि संयोजकमा विवेक मिश्र नियुक्त हुनु भएको छ । प्रधानमन्त्री शाहको सरकारी टिमतर्फ निजी सचिवालयको जिम्मेवारी सहसचिव प्रदीप परियारलाई दिईएको छ ।

काठमाडौँ, १३ चैतः नवनियुक्त प्रधानमन्त्री बालेन्द्र शाहले सिंहदबारस्थित पदभार ग्रहणलगत्तै मन्त्री र सचिवहरुलाई निर्देशन दिनुभएको छ ।

राष्ट्रपति रामचन्द्र पौडेलसँग पद तथा गोपनीयताको शपथ लिएर दिउँसो २ः१५ बजे प्रधानमन्त्री तथा मन्त्रिपरिषद्को कार्यालयमा प्रवेश गर्नुभएका प्रधानमन्त्री शाहले ब्रिफिङ लिँदै मन्त्री र सचिवहरुलाई निर्देशन दिनुभएको हो ।

प्रधानमन्त्री शाहलाई मुख्यसचिव सुमनराज अर्याललगायत सचिवहरुले स्वागतसहित ब्रिफिङ गर्नुभएको थियो ।

काठमाडौँ, १३ चैतः नवनियुक्त प्रधानमन्त्री बालेन्द्र शाहको नेतृत्वमा १५ सदस्यीय मन्त्रिपरिषद् गठन भएको छ ।

राष्ट्रपति रामचन्द्र पौडेलले आज नवनियुक्त प्रधानमन्त्री शाहको उपस्थितिमा राष्ट्रपतिको कार्यालयमा आयोजित विशेष समारोहमा नवनियुक्त मन्त्रीहरुलाई पद तथा गोपनीयताको शपथ गराउनुभयो ।

सो अवसरमा डा स्वर्णिम वाग्ले अर्थमन्त्री, सुधन गुरूङ गृहमन्त्री, शिशिर खनाल परराष्ट्रमन्त्री, सुनील लम्साल भौतिक पूर्वाधार तथा यातायात एवं सहरी विकासमन्त्री, विराजभक्त श्रेष्ठ ऊर्जा, जलस्रोत तथा सिँचाइमन्त्री, खड्गराज पौडेल संस्कृति, पर्यटन तथा नागरिक उड्डयनमन्त्री, सस्मित पोखरेल शिक्षा, विज्ञान तथा प्रविधि एवं खेलकुदमन्त्री, निशा मेहता स्वास्थ्य तथा जनसङ्ख्या एवं खानेपानीमन्त्री, डा विक्रम तिमिल्सिना सञ्चार तथा सूचना प्रविधिमन्त्री, प्रतिभा रावल सामान्य प्रशासन तथा भूमि व्यवस्था तथा गरिबी निवारणमन्त्री, सोविता गौतम कानुन, न्याय तथा संसदीय मामिलामन्त्री, गीता चौधरी कृषि तथा पशुपक्षी एवं वन तथा वातावारणमन्त्री, डा दीपक साह श्रम रोजगार तथा सामाजिक सुरक्षामन्त्री र सीता वादी महिला, बालबालिका तथा ज्येष्ठ नागरिकमन्त्रीको शपथ लिनुभएको थियो ।

यसैगरी, रक्षा र उद्योग, वाणिज्य तथा आपूर्ति मन्त्रालयको जिम्मेवारी भने हाल प्रधानमन्त्री शाहले आफैँ सम्हाल्नुभएको छ । राष्ट्रपति पौडेलले आजै बिहान शाहलाई नेपालको संविधानको धारा ७६ को उपधारा (१) बमोजिम प्रधानमन्त्री पदमा नियुक्त गर्नुभएको थियो ।

समारोहमा उपराष्ट्रपति रामसहायप्रसाद यादव, निवर्तमान प्रधानमन्त्री सुशीला कार्की, प्रधानन्यायाधीश प्रकाशमानसिंह राउत, राष्ट्रियसभाका अध्यक्ष नारायणप्रसाद दाहाल उपस्थित हुनुहुन्थ्यो । समारोहमा पूर्वप्रधानमन्त्री, मन्त्रिपरिषद्का पूर्वअध्यक्ष, संवैधानिक निकायका प्रमुख, सरकारका विशिष्ठ श्रेणीका अधिकृत, सुरक्षा निकायका प्रमुख, यहाँस्थित विभिन्न कूटनीतिक नियोगका पदाधिकारीलगायत उपस्थित हुनुहुन्थ्यो ।रासस

काठमाडौँ: नब नियुक्तमन्त्रीहरुले सपथ लिनु भएको छ।

राष्ट्रपति भवन, शीतल निवासमा आयोजित समारोहमा नवनियुक्त मन्त्रीहरुलाई राष्ट्रपति रामचन्द्र पौडेलले पद तथा गोपनियताको सपथ गराउनु भएको छ ।

बालेन्द्र शाह-प्रधानमन्त्री/रक्षा/उद्योग वाणिज्य तथा आपूर्ति

डा. स्वर्णीम वाग्ले- अर्थमन्त्री

सुदन गुरुङ -गृहमन्त्री

शिशिर खनाल- परराष्ट्र मन्त्री

सोविता गौतम-कानुन मन्त्री

सस्मित पोखरेल-शिक्षा मन्त्री

सुनिल लम्साल- भौतिक पुर्वाधार तथा यातायात

प्रतिभा रावल- सामान्य प्रशासनरभूमी, सहकारी तथा गरिबी निवारण

सिता वादी- महिला बालबालिका तथा ज्येष्ठ नागरिक

विराज भक्त श्रेष्ठ- उर्जा जलस्रोत तथा सिंचाई

निशा मेहता-स्वास्थ्य तथा जनसंख्या

गनेश पौडेल-संस्कृतिरपर्यटन

डा. विक्रम तिमल्सिना-सञ्चार तथा सूचना

दीपक शाह-श्रम रोजगार तथा सामाजिक सुरक्षा

गिता चौधरी- कृषि तथा पशुपंक्षी

तस्बिरः रत्न श्रेष्ठररासस

काठमाडौँ: राष्ट्रपति रामचन्द्र पौडेलसमक्ष नवनियुक्त प्रधानमन्त्री बालेन्द्र शाहले पद तथा गोपनीयताको शपथ लिनुभएको छ ।

राष्ट्रपति पौडेलले राष्ट्रपतिको कार्यालयमा आज आयोजित विशेष समारोहमा राष्ट्रिय स्वतन्त्र पार्टी (रास्वपा)का संसदीय दलका नेता शाहलाई शपथ गराउनुभएको हो । राष्ट्रपति पौडेलले आजै बिहान उहाँलाई नेपालको संविधानको धारा, ७६ को उपधारा (१) बमोजिम प्रधानमन्त्री पदमा नियुक्त गर्नुभएको थियो ।

समारोहमा उपराष्ट्रपति रामसहायप्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमानसिंह राउत, राष्ट्रियसभाका अध्यक्ष नारायणप्रसाद दाहाल, निवर्तमानप्रधानमन्त्री सुशीला कार्की र पूर्व प्रधानमन्त्रीहरु उपस्थित हुनुहुन्थ्यो । समारोहमा संवैधानिक निकायका प्रमुख, सरकारका विशिष्ट श्रेणीका अधिकृत, सुरक्षा निकायका प्रमुख, यहाँस्थित विभिन्न कूटनीतिक नियोगका पदाधिकारीलगायत उपस्थित हुनुहुन्थ्यो ।

प्रधानमन्त्रीको शपथ पहिलोपटक वैदिक–सनातन परम्परा झल्किने गरी गरिएको थियो । समारोहमा सात शङ्खबाट शङ्खनादसँगै १०८ जना वटुकले स्वस्ति–शान्ति वाचन र १०८ बौद्ध भिक्षु लामाले शुभ–मङ्गल पाठ गर्नुभएको थियो ।

रास्वपा वरिष्ठ नेता शाहलाई बिहीबार सो पार्टीले संसदीय दलका नेतामा सर्वसम्मत चयन गरेको थियो ।रासस

तस्बिरः रत्न श्रेष्ठ-रासस

काठमाडौं । राष्ट्रपति भवन, शीतल निवासमा नवनियुक्त प्रधानमन्त्रीको पद तथा गोपनीयताको शपथका लागि तयारी सकिएको छ ।

नेपालको संविधानको धारा ७६(१) अनुसार बहुमतप्राप्त राष्ट्रिय स्वतन्त्र पार्टी संसदीय दलका नेता बालेन्द्र शाह प्रधानमन्त्रीमा नियुक्त भइसक्नुभएको छ ।

राष्ट्रपति रामचन्द्र पौडेलसमक्ष उहाँले आज पद तथा गोपनीयताको शपथ लिँदै हुनुहुन्छ । प्रधानमन्त्रीले शपथ लिएपछि आजै नियुक्त हुने मन्त्रीहरूले पनि शपथ लिने तयारी छ ।

शपथ समारोहमा मुलुकका उच्चपदस्थ पदाधिकारी, नेपालस्थित कूटनीतिक नियोगका प्रमुख र प्रतिनिधि, समाजका लब्ध प्रतिष्ठित व्यक्तिहरू सहभागी हुने कार्यक्रम छ ।

काठमाडौं । राष्ट्रपति रामचन्द्र पौडेलले बालेन्द्र शाहलाई नेपालको प्रधानमन्त्रीमा नियुक्त गर्नुभएको छ।

राष्ट्रपतिको कार्यालय द्वारा जारी विज्ञप्तिअनुसार नेपालको संविधानको धारा ७६ को उपधारा ९१० बमोजिम उहाँलाई प्रधानमन्त्री पदमा नियुक्त गरिएको हो।

उक्त निर्णय अनुसार बालेन्द्र शाह प्रतिनिधि सभाका सदस्यको हैसियतमा प्रधानमन्त्री बन्नुभएको हो।

काठमाडौँ। मुलुकले आज नयाँ प्रधानमन्त्री पाउने भएको छ ।

राष्ट्रपति कार्यालय शीतल निवासमा आज दिउँसो राष्ट्रपति रामचन्द्र पौडेलले राष्ट्रिय स्वतन्त्र पार्टीका वरिष्ठ नेता बालेन्द्र शाहलाई प्रधानमन्त्रीको शपथ गराउने कार्यक्रम तय गरिएको बताइएको छ ।

त्यसअघि नेता शाहलाई प्रधानमन्त्रीमा नियुक्त गरिएको जानकारी गराइनेछ । नेपालको संविधानको धारा ७६ को उपधारा १ अनुसार एकल सरकार गठन हुन लागेको हो ।

राष्ट्रपति कार्यालयका अनुसार अपराह्न प्रधानमन्त्रीको पद तथा गोपनियताको शपथ ग्रहणको कार्यक्रम तय गरिएको बताइएको छ । शपथ ग्रहण समारोहमा सहभागी हुन विभिन्न राजनीतिक दल, यहाँस्थित कूटनीतिक नियोगका प्रतिनिधि, नागरिक समाज, उच्च सरकारी अधिकारीलाई आमन्त्रण गरिसकिएको छ । प्रधानमन्त्रीको शपथसँगै मन्त्रीहरूको पनि शपथ गराइने बुझिएको छ ।

गत फागुन २१ मा सम्पन्न प्रतिनिधिसभा सदस्य निर्वाचनमा राष्ट्रिय स्वतन्त्र पार्टीले १८२ सिटमा जित निकालेको छ । सो दलले बिहिबार मात्रै नेता शाहलाई संसदीय दलको नेता चयन गरिसकेको छ ।

प्रतिनिधिसभा सदस्य निर्वाचनमा नेता शाहले झापा क्षेत्र नं ५ बाट ६८ हजार ३४८ मत प्राप्त गरी विजयी हुनुभएको थियो । बिहिबार नै प्रतिनिधिसभाका ज्येष्ठ सदस्य अजुर्ननरसिंह केसीले सांसदहरूलाई पद तथा गोपनियताको शपथ गराइसक्नुभएको छ । रासस

काठमाडौं। राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन)ले नयाँ गीत सार्वजनिक गरेका छन्।

प्रधानमन्त्री पदमा सपथ लिनुअघि बिहिबार उनले ‘जय महाकाली’ नामक गीत आफ्नो युट्युबमा सार्वजनिक गरेका हुन्।

उक्त गीतमा रास्वपाको चुनावी अभियानका विभिन्न दृश्यहरु राखिएको छ । उक्त गीत बालेन शाहकै युटुब च्यानलबाट सार्वजनिक गरिएको छ ।

फागुन २१ मा सम्पन्न निर्वाचनमा पहिलो दल बनेको रास्वपाले बालेनलाई प्रधानमन्त्री बनाउने निर्णय गरिसकेको छ । भोलि शुक्रबार दिउँसो उनले प्रधानमन्त्रीको शपथ लिने कार्यक्रममा तय भइसकेको छ ।

काठमाडाैँ । राष्ट्रिय स्वतन्त्र पार्टी (रास्वपा)को संसदीय दलको नेतामा बालेन्द्र शाह चयन भएका छन् ।

रास्वपाको आज बसेको केन्द्रीय समितिको बैठकले उनलाई संसदीय दलको नेता चयन गरेको हो ।

बैठकमा सभापति रवि लामिछानेले पार्टी वरिष्ठ नेता शाहलाई संसदीय नेताका रूपमा चयन गर्न गरेको प्रस्ताव सर्वसम्मत रूपमा पारित भएको प्रवक्ता मनिष झाले जानकारी दिए।

काठमाडाैँ । मुलुकले चैत १३ गते नयाँ प्रधानमन्त्री पाउने भएको छ। राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) शुक्रबार प्रधानमन्त्री पद तथा गोपनीयताको शपथ ग्रहण गर्ने भएका छन्।

शपथ ग्रहण कार्यक्रम मध्याह्न १२:३४ बजेका लागि तय गरिएको बताइएको छ। समारोहलाई विशेष बनाउन विभिन्न धार्मिक तथा सांस्कृतिक विधिहरू समेत समावेश गरिएको छ।

कार्यक्रममा सात वटा शंखबाट शंखनाद गरिने, १०८ जना बटुकद्वारा स्वस्ती शान्ति वाचन गरिने तथा १६ जना बौद्ध भिक्षुबाट अष्टमंगल पाठ गरिने तयारी रहेको छ।

शपथ ग्रहणपछि प्रधानमन्त्री शाहले दिउँसो करिब सवा २ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा पदबहाली गर्ने कार्यक्रम रहेको जनाइएको छ।

काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ले चैत १३ गते प्रधानमन्त्रीको शपथ लिने तयारी गर्नुभएको छ ।

बिहीबार साँझ भएको रास्वपा चार शीर्षनेताको छलफलमा चैत १३ मा प्रधानमन्त्रीको शपथ तय गरिएको जनाइएको छ।

काठमाडौँको एक होटलमा बिहीबार अपरान्ह पार्टी सभापति रवि लामिछाने, वरिष्ठ नेता बालेन्द्र शाह (बालेन) र उपसभापतिद्वय डीपी अर्याल एवम् डा.स्वर्णिम वाग्ले सरकार गठनको छलफलमा जुटेका हुन् ।

छलफलमा चुनावी समीक्षा देखि नयाँ सरकार गठन र सुशासनको मुद्धाको सम्बोधन गर्ने खाकाबारे गृहकार्य भएको एक नेताले जानकारी दिनुभयो ।

यसैगरी मन्त्रिमण्डल गठन,आकाङ्क्षीको व्यवस्थापन र पहिलो मन्त्रिपरिषद् बैठकको एजेण्डा लगायतका विषयमा पनि नेताहरू बीच छलफल भएको छ ।

बिहीबार अपराह्न संघीय संसद् सचिवालयले नवननिर्वाचित सांसदको शपथ ग्रहण तय गरेको थियो। प्रतिनिधि सभामा प्रतिनिधित्व गर्ने ६ दलसँगको छलफलपछि चैत १२ गते दिउँसो २ बजे नवनिर्वाचित सांसदको शपथ ग्रहण तय गरिएको हो।

काठमाडौं । भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टीका सभापति रबि लामिछाने र वरिष्ठ नेता बालेन्द्र शाह (बालेन)लाई आज फोन गरेका छन् । त्यस अवसरमा प्रधानमन्त्री मोदीले रवि–बालेनसँग न्यानो संवाद भएको प्रतिक्रिया दिएका छन् ।

‘मैले निर्वाचनमा रास्वपाको जितका लागि दुवै नेतालाई बधाई दिएको छु,’ फेसबुकमा प्रतिक्रिया दिँदै मोदीले लेखेका छन्,

राष्ट्रिय स्वतन्त्र पार्टी (रास्वपा) का सभापति श्री रवि लामिछाने र रास्वपाका वरिष्ठ नेता श्री बालेन्द्र शाहसँग टेलिफोनमा सौहार्दपूर्ण कुराकानी भयो।

वहाँहरुको निर्वाचनमा प्राप्त जित र नेपालको निर्वाचनमा रास्वपाको शानदार सफलताका लागि दुवै नेताहरूलाई बधाई दिएँ। वहाँहरूको आगामी नयाँ सरकारका लागि शुभकामना व्यक्त गर्दै हामी दुई देशबीचको आपसी समृद्धि, प्रगति र हितका लागि वहाँहरूसँग मिलेर काम गर्ने भारतको प्रतिबद्धता समेत व्यक्त गरेँ।

हाम्रो संयुक्त प्रयासले आगामी वर्षहरूमा भारत र नेपालको सम्बन्धले नयाँ उचाइ प्राप्त गर्नेछ भन्ने कुरामा म विश्वस्त छु ।

मोदीको फेसबुक पेजमा रहेको पोस्ट