काठमाडौँ। सर्वोच्च अदालतले अन्तरिम आदेश जारी गर्न अस्वीकार गरेपछि निर्वाचन आयोगले धनुषा–१ मा रोकिएको मतगणनाको परिणाम सार्वजनिक गरेको छ।

आयोगले हिजो रोक्का राखेको नतिजा फुकाउँदै नेकपाका उम्मेदवार मातृकाप्रसाद यादवलाई विजयी घोषणा गरेको हो।

सर्वोच्च अदालतमा दायर भएको रिट निवेदनमा अन्तरिम आदेश नआएपछि निर्वाचन आयोगलाई अन्तिम परिणाम सार्वजनिक गर्ने कानुनी बाटो खुलेको थियो। सोही निर्णयसँगै धनुषा–१ मा केही समयदेखि कायम रहेको चुनावी अन्योलता अन्त्य भएको छ। विजयको आधिकारिक घोषणासँगै निर्वाचन आयोगले यादवलाई निर्वाचित भएको प्रमाणपत्र प्रदान गर्ने प्रक्रिया अगाडि बढाएको छ।

धनुषा-१ मा राष्ट्रिय स्वतन्त्र पार्टीका उम्मेदवार किशोरी साहको उम्मेदवारी खारेज भएको थियो। मतगणनाको क्रममा उम्मेदवारी खारेज भएका किशोरीकै पक्षमा मत आएको थियो।

त्यसपछि निर्वाचन आयोगले निर्वाचन अधिकृतको कार्यालयलाई पत्र पठाएर अदालतबाट आदेश नहुँदासम्म उक्त क्षेत्रको पहिलो हुने निर्वाचन प्रणाली तर्फको मतपरिणाम घोषणा नगर्न भनेको थियो। नेकपाले धनुषा–१ मा १० हजार ४३० मतसहित आफ्नो उम्मेदवार मातृक‍ा यादव विजयी भएको दाबी गरेको छ। ‍