नवलपरासी। मुस्लिम आयोगका अध्यक्ष महमदिन अलीले मदरसा व्यवस्थापन तथा विकासका लागि थप बजेट आवश्यक पर्ने बताउनुभएको छ ।

पश्चिम नवलपरासीको पाल्हीनन्दन गाउँपालिका–३ स्थित मरसा प्रवर्द्धन सामाजिक केन्द्रको आज यहाँ उद्घाटन गर्दै उहाँले मदरसा व्यवस्थापन तथा विकासका लागि अर्थ मन्त्रालयलाई थप बजेट विनियोजन गर्न आग्रह गर्नुभयो ।

केन्द्रको रामग्राम नगरपालिका–८ का वडास्तरीय अध्यक्ष हैदरअलि मोमिनको अध्यक्षतामा सम्पन्न भएको कार्यक्रममा आयोगका अध्यक्ष अलीले मदरसामा प्रयाप्त बजेट नहुँदा पूर्णरूपमा सञ्चालन तथा व्यवस्थापनमा समस्या भइरहेको बताउनुभयो । मदरसामा अध्ययन गर्नेहरूलाई गुणस्तरीय शिक्षा दिनुपर्नेमा जोड दिँदै उहाँले विद्यार्थीलाई इमान्दारीका साथ मेहनत गर्न आग्रह गर्नुभयो ।

अध्यक्ष अलीले प्रत्येक गाउँ टोलमा मदरसा सञ्चालन गर्नुपर्ने आवश्यकता औँल्याउनुभयो । “मदरसामा कबरीसतान तथा मुस्लिम समुदायको समस्याका बारेमा छलफल गरी समाधान खोज्नुपर्छ । धार्मिक सहिष्णुता कायम राख्दै अन्य समुदायसँग सहकार्य र समन्वय आजको आवश्यकता हो”, उहाँले भन्नुभयो । रासस

काठमाडौँ । राष्ट्रपति रामचन्द्र पौडेलसमक्ष मुस्लिम आयोगले आर्थिक वर्ष २०८०र८१ मा सम्पादन गरेका कामहरूको वार्षिक प्रतिवेदन पेस गरेको छ । राष्ट्रपति भवन शीतल निवासमा आज आयोजित कार्यक्रममा आयोगका अध्यक्ष समिम मियाँ अन्सारीले राष्ट्रपति पौडेलसमक्ष प्रतिवेदन पेस गर्नुभयो ।

त्यस अवसरमा राष्ट्रपति पौडेलले देशको सांस्कृतिक विविधता कायम राख्दै समानता एवं सहअस्तित्वका आधारमा विभिन्न जातजाति, समुदायको भाषा, लिपि, संस्कृति, साहित्य, कला, सम्पदाको संरक्षण र विकास गर्ने राज्यको सामाजिक र सांस्कृतिक रूपान्तरणसम्बन्धी नीति रहेको सन्दर्भमा सोही बमोजिम गठित मुस्लिम आयोगको जिम्मेवारी र दायित्व गहन रहेको बताउनुभयो ।

उहाँले आयोगले आफ्नो संवैधानिक र कानुनी दायित्व पूरा गर्ने सन्दर्भमा आफूले गरेका काम कारबाहीहरू समेटेर तयार पारेको प्रतिवेदनमा उठाइएका महत्वपूर्ण विषयलाई सम्बोधन गर्ने विषयमा सरकारले ध्यान दिने विश्वास व्यक्त गर्नुभयो ।

काठमाडौँ । मुस्लिम आयोगका अध्यक्ष समिम मियाँ अन्सारीले मुस्लिम समुदायले प्रयोग गर्दै आएको मस्जिद, कब्रिस्तान र इदगाहको जग्गा संरक्षण गर्न सरकारसँग आग्रह गर्नुभएको छ ।

मुस्लिम आयोगले आयोजना गरेको मुस्लिम समुदायको सांस्कृतिक धरोहरहरुको संरक्षण एवं विकास विषयक अन्तरक्रिया कार्यक्रममा बोल्दै उहाँले यस्तो बताउनुभएको हो ।

उहाँले मुस्लिम समुदायले प्रयोग गर्दै आएको मस्जिद, कब्रिस्तान र इदगाहको जग्गा हडप्ने काम भइरहेकोप्रति मुस्लिम समुदायले संरक्षणका लागि आग्रह गरेको बताउनु भयो । उहाँले कार्यक्रममा भूमि व्यवस्था, सहकारी तथा सहकारीमन्त्री बलराम अधिकारलाई बोलाएर मुस्लिम समुदायका सांस्कृतिक धरोहरहरु संरक्षणका लागि आग्रह गरेको बताउनु भयो । कार्यक्रममा मन्त्री अधिकारीले मन्त्रालयले गर्नसक्ने सहयोगका लागि आफू सधैँ सकारात्मक रहेको बताउनुभएको पनि अध्यक्ष अन्सारीले बताउनु भयो । उहाँले अहिलेको सरकारको भावना पिछडीएका वर्गलाई सम्बोधन गर्ने रहेकाले मुस्लिम समुदायले पनि सोहीअनुसार न्याय पाउनेमा आशावादी रहेको बताउनु भयो । अध्यक्ष अन्सारीले काठमाडौंका मुस्लिम समुदायले प्रयोग गर्दै आएको स्वयम्भूस्थित कब्रिस्तान सानो भएकाले सो बारेमा सरकारले सोच्नुपर्ने बताउनु भयो ।

उहाँले भन्नुभयो, ‘मुस्लिम समुदायको उहाँको मन्त्रालय मातहतमा रहेको समस्या जुन लामो समयदेखि मस्जिदको जग्गा, कब्रिस्तानको जग्गा, इदगाहको जग्गा मुस्लिम समुदायले भोगचलन गर्दै आइरहेको छ । तर लालपूर्जा नलिएको थियो । पहिला आफ्नो भएपछि भयो, किन लिनपर्छ र रु भन्ने थियो । अहिले आएर ठाउँठाउँमा विवाद हुने, समस्या सिर्जना हुने भएको छ । मान्य मन्त्रीज्युकै मन्त्रालयको इस्यु भएकाले यसमा छलफल गरेका हौँ । कतिपय ठाउँमा चिहानको जग्गा मिचिरहेको अवस्था छ । स्थानीय निकायले समेत मिचिरहेको छ ।’

‘यस्ता समस्याहरु छन् । काठमाडौंमा पहिलादेखिको चिहान एउटा छ, स्वयम्भूमा । विद्युत प्राधिकरण भएको ठाउँमा रत्नपार्कमा पहिला चिहान थियो । त्यो ठाउँमा सरकारले सट्टापट्टा गरेर स्वयम्भूमा दियो । त्यो अलि सानो ठाउँ दिएकाले पुरेर पनि हामीले चार, पाँच वर्ष अघिदेखि फेरि प्रयोग गर्ने कार्य भइरहेको छ । भोलिको दिनमा भरिसकेपछि पुर्ने ठाउँ पनि रहँदैन । त्यसकारणले वैकल्पिक कब्रस्तान काठमाडौंको हकमा आवश्यक छ भनेका हौँ । यस्ता समस्या जुन छन्, ति समस्या समाधान गर्न भूमिसुधारमन्त्रीलाई बोलाएर कुरा राख्यौँ । उहाँले बोल्ने क्रममा आफूबाट हुने समाधान गर्ने प्रतिवद्धता गर्नुभयो । अहिलेको सरकारको भावना पिछडीएका वर्गलाई सम्बोधन गर्ने छ ।’

अध्यक्ष अन्सारीले मुस्लिम समुदायको हक, अधिकार, उत्थानका लागि सरकारले आवश्यक काम गर्नेमा विश्वस्त रहेको बताउनु भयो ।

काठमाडौँ । नेपालीहरुको महान चाड विजया दशमी एवं शुभ दीपावलीको अवसरमा मुस्लिम आयोगले सम्पूर्णमा शुभकामना प्रदान गरेको छ ।

बुधवार ललितपुरमा एक कार्यक्रमको आयोजना गरी आयोगले विजया दशमी, शुभ दीपावली, नेपाल संवत, छठ लगायतका पर्वहरुको शुभकामना आदानप्रदान कार्यक्रम गरी शुभकामना दिएको हो ।

कार्यक्रममा बोल्दै राष्ट्रिय मानव अधिकार आयोगका अध्यक्ष तपबहादुर मगरले दशैँ सबै नेपालीको चाड भएकाले उत्सवका साथ मननाउनुपर्ने बताउनु भयो । उहाँले नेपालीहरु शान्तिप्रिय भएकाले कुनै धर्मधर्म बीचमा झैझगडा र द्वन्द्व गर्न नहुने बताउनु भयो । उहाँले सबै धर्मावलम्वीहरु एक आपसमा मिलेर बस्न आग्रह गर्नुभयो । उहाँले पछिल्लो समय केही छिटपुट घटना भइरहेको भन्दै यसलाई समाधान गरेर अघि बढ्न जरुरी रहेको बताउनु भयो । उहाँले बाहिरबाट आएका व्यक्तिको उक्सावटमा साम्प्रदायिक द्वन्द्व हुने गरेको बताउनु भयो । धर्मको नाममा द्वन्द्व पैदा हुन नहुने बताउनु भयो ।

कार्यक्रममा नेपालीहरुको महान चाड बडा दशैँको शुभकामना दिँदै मुस्लिम आयोगका अध्यक्ष समिम मिया अन्सारीले लामो समयदेखि हिन्दु, मुस्लिम, इसाइ, किराँत लगायतका धर्मावलम्वी र समुदाय एक आपसमा मिलेर बसिरहेकाले अहिले पनि सोही कुरालाई निरन्तरता दिनुुपर्ने बताउनु भयो । पछिल्लो केही समय यता केही असामाजिक र अराजक तत्त्वहरुले नेपालमा रहेका धर्मावलम्वीहरुको बीचमा खेल्ने र धार्मिक सहिष्णुतालाई खल्बल्याउने प्रयास गर्ने र भाइचारा सम्बन्ध डग्मगाउने प्रयास गर्ने काम भइरहेको बताउनु भयो । उहाँले हिन्दु र मुस्लिम, बौद्धिष्ट र किराँतको नाममा असामाजिक कार्य गर्नेहरुलाई असफल बनाउनुपर्ने बताउनु भयो ।

अध्यक्ष अन्सारीले मुस्लिम समुदायले देशको भाइचारा सम्बन्ध बिथोल्न नसक्ने बताउनु भयो । उहाँले कुनैपनि अपराध गर्ने व्यक्ति कुनै धर्मको नहुने र अपराधि हुने भएकाले त्यस्ता व्यक्तिलाई कारबाही गरी समुदायलाई बीचमा ल्याउन नहुने बताउनु भयो । मुस्लिम आयोगले आयोजना गरेको शुभकामना आदानप्रदान कार्यक्रममा नेपाल प्रहरीका प्रहरी महानिरीक्षक वसन्तबहादुर कुँवर, राष्ट्रिय मानव अधिकार आयोग, महिला आयोग, आदिवासी जनजाति आयोग, थारु आयोग, राष्ट्रिय अनुसन्धान आयोगका प्रमुख लगायतको उपस्थिति रहेको थियो ।

काठमाडौ । राष्ट्रपति रामचन्द्र पौडेललेसमक्ष मुस्लिम आयोगको वार्षिक प्रतिवेदन पेश गरिएको छ । राष्ट्रपति भवन शीतल निवासमा सोमबार आयोजित एक कार्यक्रमका बीच आयोगका अध्यक्ष समीम मियाँ अन्सारीले सो प्रतिवेदन पेश गर्नुभएको हो ।

सो अवसरमा राष्ट्रपति पौडेलले नेपाल बहुजातीय, बहुभाषिक तथा बहुसांंस्कृतिक मुलुक भएकाले सबै जाति, भाषा, संस्कृति र समुदायका बीचमा सहअस्तित्वका आधारमा आपसी सदभाव कायम राख्न मुस्लिम आयोग जस्ता आयोगको भूमिका महत्वपूर्ण हुने बताउनुभयो ।

आयोगको मुस्लिम समुदायको हक अधिकार संरक्षणमा गहन र महत्वपूर्ण दायित्व रहेको पनि राष्ट्रपति पौडेलले स्पष्ट पार्नुभयो ।

उहाँले आयोगले आफ्नो संवैधानिक र कानुनी दायित्व पूरा गर्ने सन्दर्भमा आफूले गरेका काम र क्रियाकलापहरु समेटेर जुन प्रतिवेदन पेश गरेको छ, यसमा उठाइएका महत्वपूर्ण विषयहरुलाई नेपाल सरकारले प्रभावकारी रुपमा सम्बोधन गर्नेछ भन्ने विश्वास व्यक्त गर्नुभयो ।

प्रतिवेदन बुझाउदै आयोगका अध्यक्ष समिम मियाँ अन्सारीले आयोगले गरेका काम कार्वाहीको बारेमा संक्षिप्त जानकारी गराउनुभयो । उहाँले मुस्लिम समुदायको हक अधिकारको संरक्षणलाई प्राथमिकता दिएर आयोगले काम गरीरहेको बताउनुभयो ।

काठमाडौँ । मुस्लिम र थारुलाई मधेशीको सूचीबाट हटाइएको छ । सरोकारवालाहरुले नै आफूलाई मधेशी होइनौँ भनेपछि सूचीबाट हटाइएको मधेशी आयोगले जनाएको छ । यसअघि ‘नेपालमा मधेशी समुदायको थर सूचीकरण–२०७८’ मा मेधशी आयोगले उपसमूह–१ मा थारु र २ मा मुस्लिमलाई राखेको थियो ।

मधेशी आयोगले सोही आधारमा मुस्लिम र थारु समुदायलाई पनि मधेशीका रुपमा परिभाषित गर्न सरकारसँग आग्रह गरेको थियो । गत असोज ३१ गते राष्ट्रपति विद्यादेवी भण्डारीलाई बुझाएको चौथो वार्षिक प्रतिवेदनमा आयोगले थारु र मुस्लिमसहित १४९ जातिलाई मधेशीमा परिभाषित गर्न सिफारिस गरेको सार्वजनिक भएसँगै मुस्लिम र थारु समुदायबाट विरोध भएको थियो ।

उनीहरुको आयोगले नै मधेशीको सूचीबाट हटाउन मधेशी आयोगमा निवेदन दिएका थिए । मधेशी आयोगका उपसचिव सविता डंगोलले विरोधपछि मधेशी आयोगले थारु र मुस्लिमलाई मधेशीको सूचीबाट हटाएको जानकारी दिनुभएको छ । सूचीबाट हटाएको निर्णय कार्यान्वयन गर्न प्रधानमन्त्री तथा मन्त्रिपरिषद्को कार्यालयलाई पत्र पठाइएको उहाँले जानकारी दिनुभयो ।

थारु र मुस्लिम आयोगका अध्यक्षसहितका पदाधिकारीहरुले थारु र मुस्लिम समुदायको अलग्गै पहिचान र सभ्यता रहेको र मधेशी समुदायसँग मेल नखाने भएकाले मधेशीको सूचीमा राख्नु गलत भएको भन्दै विज्ञप्ति जारी गरेका थिए ।

काठमाडौँ । ठगी आरोपमा प्रहरीको खोजीको सूचिमा रहेका एक व्यक्ति त्रिभुवन अन्तर्राष्ट्रिय विमानस्थलको बिशिष्टकक्ष प्रयोग गर्दे फरार भएका छन् ।

बैदेशिक रोजगारी र दुबईमा पाइलट कोर्स गराईदिने भन्दै बिभिन्न युवा संग रकम लिएको तर काम नगरिदिएपछि ठगिको आरोपमा मुद्दा परेका सुनसरीका ३० वर्षीय रिजवान आलम शुक्रबार भीआईपी कक्षबाटै भागेका हुन् । मुस्लिम आयोगको निमन्त्रणामा मा नेपाल आएको संयुक्त अरब इमिरेट्स (यूएई) संसदका उपाध्यक्ष आएको बिमानमा आलम आएका थिए ।

सो टोली संगै उनले बिमानस्थलको बिशिष्टकक्ष प्रयोग गरेका थिए । आलम बिशिष्ट कक्ष बाट  बेपत्ता भएका थिए ।

बिमानस्थल सुरक्षा प्रमुख एसपी श्याम ज्ञावलीले न्युजपोलारसंग भन्नुभयो ‘फरार  व्यक्ति छन् भन्ने सुचनाका आधारमा अध्यागमन र अपराध महाशाखासंग समन्वय गरेका थियौ । उहाँहरुले के गर्नुभयो थाहा भएन । ‘

यसै बिच कान्तिपुर दैनिकका अनुसार दुबईबाट आएका आलमलाई लिन मुस्लिम आयोगका अध्यक्ष समिम मियाँ अन्सारी भीआईपी कक्ष गएका थिए । तर, आलमको राहदानी कालोसूचीमा परेको भेटिएपछि अध्यागमनले प्रहरीलाई खबर गर्‍यो । सुरक्षाकर्मीले नियन्त्रण लिन नपाउँदै भीआईपी कक्षको ढोकाबाटै भागेर उनी सम्पर्कविहीन भएका हुन् ।

अन्सारीसँगै राहदानी जाँच नगराई आलम भीआईपी कक्षमा प्रवेश गरेका थिए । विमानस्थलका प्रमुख अध्यागमन अधिकृत पुष्पराज शाहीले आलम भीआईपी कक्षबाट भागेर सम्पर्कविहीन भएको पुष्टि गरे । ‘अध्यागमन कक्षमा अन्सारीसँगै आएका रिजवान आलमको रेकर्ड हेर्दा कालोसूचीमा परेको भेटिएपछि हामी उनको खोजीमा जुट्यौं तर त्यसअगावै उनी भीआईपी कक्षबाट भागे, उनको खोजी भइरहेको छ,’ उनले भने ।

आलमको खोजी गर्न त्रिभुवन अन्तर्राष्ट्रिय विमानस्थल अध्यागमन कार्यालयले काठमाडौं उपत्यका अपराध अनुसन्धान कार्यालयलाई पत्राचार गरेको छ ।