काठमाडौं । २०७९ सालको निर्वाचनमा अप्रत्यासित नतिजा हात पारेको नागरिक उन्मुक्ति पार्टीमा अहिले विवाद उत्कर्षमा पुगेको छ । कुनै पनि बेला दल विभाजन हुने जोखिममा छ ।

नाउपाले अध्यक्ष रञ्जिता श्रेष्ठ चौधरीलाई हटाएर लालवीर चौधरीलाई अध्यक्ष बनाएको छ । तर, रञ्जिताले पार्टीको आधिकारिक अध्यक्ष आफू नै रहेको दाबी गरेकी छन् ।

रञ्जिता र उनका श्रीमान् तथा पार्टी संरक्षक रेशम चौधरीबीच द्वन्द्व बढ्दा पार्टी फुटको स्थितिमा आइपुगेको हो ।

यसैबीच रञ्जिताले ‘नजिर’ शीर्षकमा एउटा कविता लेखेर फेसबूकमा पोस्ट गरेकी छन् । उनले यो कवितामा अहंकारले बनाएको दरबार चुडिँने तर्क गरेकी छन् ।

आफ्ना श्रीमान रेशम लक्षित यो कवितामा कस्तो त छ ?

‘’नजिर”

गलत नजिर बसायो जसले,

सत्यलाई कुहिरोमा लुकायो जसले —

एक दिन त्यो नाटकको पर्दा च्यातिन्छ,

र संचित पापको भारीले नै आफैँ झुकेको पाइन्छ ।

खन्दै थियो जो अरूका लागि खाल्डो,

उसैको पाइला डगमगाउँछ त्यहीँ

यो नियतिले कहिल्यै साथ दिँदैन,

अहंकारले बनाएको दरबार चुँडिन्छ, टिक्दैन ।

हामी त उभिएका छौँ विवेकको छायाँमा,

न आँधीले हल्लाउने, न लोभको मायामा ।

सत्ता त सधैं रहँदैन एउटै हातमा,

समय आफैँले लेख्छ फैसला, न्यायको रातमा ।

‘बिचरा’ भन्नुको पनि अर्थ गहिरो छ यहाँ,

त्यो शक्ति होइन, अन्तर्मनको गहिराइमा पया ।

जो पीडा बुझ्दैन, उ ठूला आसनमा भए पनि सानो छ,

तर जसले सहन गर्छ, ऊ नै असल इतिहासको गाथा बनाउने मानो हो ।

काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ चौधरी र सोही पार्टीका नेता ठाकुर शिंह थारुबीच सामाजिक संञ्जालमा जुहारी चलेको छ ।

नेता थारुले अध्यक्ष रञ्जिता मात्र खुशी रहेको तर कार्यकर्ताहरु निरास रहेको भन्दै अध्यक्षको कटाक्ष गर्नुभएको छ ।

थारुलाई सामाजिक सञ्जाल मार्फत जबाफ फर्काउँदै पार्टीलाई बेच्न मोलमोलाई गर्ने व्यापारीहरू मात्र दु:खी रहेको जनाउनु भएको छ ।

अध्यक्ष रञ्जितालाई मेन्सन गरेर थारुले लेख्नु भएको छ-

प्रिय अध्यक्ष रन्जिता जि ।
तपाई जति खुशि हुनु हुन्छ त्यति खुशि तपाईको पार्टिका कार्यकर्ता किन छैनन्  ? तपाईको मुखमा हाँसो छ तर तपाईको कर्याकर्ताको मुखमा किन निराश छ ?
थाह होस । तपाईको मुस्कान भन्दा नि निराशाले पार्टि उभो लाग्दैन ।
जय नागरिक ।

ठाकुरलाई जबाफ दिदै अध्यक्ष रञ्जिताले लेख्नु भएको छ-

ठाकूर सिंग ज्यू
तपाइले मलाई फेसबुक मा प्रश्न गर्नु भयो उत्तर यसैमा दिन उचित सम्झे
म यस कारण खुशी छु कि नागरीक उनमुक्ती पार्टि अहिले एकदम ठिक लाईनमा छ॥
पार्टीलाई आफ्नो खल्ती भर्ने व्यापार सम्झनेहरू मात्र खुशि छैनन् !
पार्टी अध्यक्षको हैसियतले भन्छु हामी सबै पार्टिमा खुशी छौं !
आफ्नो पार्टिले पाउदै गरेको मुख्यमन्त्री अर्को पार्टीलाई बेचेर खान नपाऊदा दुखीहुने हरू कदापी नागरीक ऊन्मुक्ती पार्टीका होइनन् !!
गर्वका साथ नागरीक ऊन्मुक्ती पार्टीको लागी सु।प प्रदेशको मुख्य मन्त्री लिएर जांदा अर्को पार्टीको मान्छेहरू सगं आफ्नो पार्टीलाई बेच्न मोलमोलाई गर्ने व्यापारीहरू दु:खी छन् भने हुन दिनुस ॥
अलिकती पनी पार्टी प्रती नैतिकता छ भने आफ्नो धरातल सम्झनुहोला !
जय नागरीक

काठमाडौं । नागरिक उन्मुक्ति पार्टीको विवाद उत्कर्षमा पुगेको छ । पार्टी अध्यक्ष रञ्जिता श्रेष्ठ चौधरी र रेशम चौधरी पक्षबीच हात हालाहाल भएको छ ।

पार्टी केन्द्रीय कार्यालय अनामनगरमा बैठक बसिरहेका बेला रेशम र रञ्जिता पक्षबीच कुटाकुट भएको हो । रञ्जिता सरकारमा सहभागी हुनुपर्ने पक्षमा छन् भने रेशम पक्षले प्रतिपक्षमा बस्नुपर्ने अडान लिएको छ ।

सोही क्रममा टिकापुरका मेयर रामलाल डगौरा र नेता रमेश विकमाथि हातपात भएको थियो । उनीहरु दुवै जना रञ्जिता पक्षधर हुन् ।

काठमाडौँ । नागरिक उन्मुक्ति पार्टीका अध्यक्ष रञ्जिता श्रेष्ठ चौधरीले सुदूरपश्चिम प्रदेश सरकार छाड्न संसदीय दलका नेतालाई निर्देशन दिएकी छन् ।

चौधरीले शुक्रबार प्रदेश संसदीय दलका नेता घनश्याम चौधरीलाई लिखित निर्देशन दिएकी हुन् ।

श्रेष्ठले पत्र लेख्दै १४ चैतमा टीकापुरमा बसेको पार्टी बैठकले समर्थन फिर्ता लिने निर्णय गरेको स्मरण गराउँदै सोही बमोजिम सरकारबाट बाहिर आउन निर्देशन दिएको र अन्यथा पार्टीको विधान आकर्षित गरिने उल्लेख गरेकी छन् ।

काठमाडौँ । भूमि व्यवस्था,सहकारी तथा गरिबी निवारणमन्त्री रञ्जिता श्रेष्ठ चौधरीले सरकारले ठगि गर्ने सहकारीहरुलाई कानून अनुसार कारबाही गरिने बताउनुभएको छ ।

बिहीवार राष्ट्रिय सभामा आगामी आर्थिक वर्षको विनियोजित बजेटमाथि सांसदहरुले उठाएका प्रश्नको जवाफ दिने क्रममा यस्तो बताउनुभएको हो ।

उहाँले सरकारले ठगि गर्ने सहकारीहरुको अनुगमन र जाँचबुझ गरी प्रचलित कानून अनुसार कारबाही प्रक्रिया जारी रहेको बताउनु भयो। उहाँले सरकारले ४९ जिल्लामा गरिब घरपरिवार पहिचान गरी ६ लाख १५ हजार ६१ वटा गरिब गरिब परिचय पत्र वितरण कार्य सम्पन्न भएको बताउनु भयो। उहाँले १५ वटा जिल्लामा गुनासो सुनुवाईको कार्यक्रम भइरहेको र १३ वटा जिल्लाहरुको तथ्याङक विश्लेषण गर्ने कार्य भइरहेको बताउनु भयो।

उहाँले भन्नुभयो,‘सहकारी ठगि गर्नेलाई प्रचलित कानून बमोजिम जाँचबुझ गरी कारबाहीको प्रक्रिया अघि बढाएका छौं । मन्त्रालयले हालसम्म ४९ जिल्लामा गरिब घरपरिवार पहिचान गरी ६ लाख १५ हजार ६१ वटा गरिब गरिब परिचय पत्र वितरण कार्य सम्पन्न भएको छ भने १५ वटा जिल्लामा गुनासो सुनुवाईको कार्यक्रम भइरहेको र १३ वटा जिल्लाहरुको तथ्याङ्क विश्लेषण गर्ने कार्य भइरहेको छ । आर्थिक वर्ष २०८०/८१ भित्र सबै जिल्लामा गरी गरिब घर परिवार पहिचान तथा परिचय पत्र वितरण गर्ने गरी कार्यक्रम अघि बढाउने व्यहोरा जानकारी गराउन चाहन्छु ।’

उहाँले आर्थिक वर्ष २०८०/८१ भित्र सबै जिल्लामा गरी गरिब घर परिवार पहिचान तथा परिचय पत्र वितरण गरिसक्ने बताउनु भयो।

काठमाडौं । नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीले आफूहरु सबैले सधैं प्रयोग गर्ने साधन मात्र नभएको जनाउनु भएको छ ।

सात सांसद सहित आफ्नो फोटो फेशबुकमा राख्दै उहाँले लेख्नुभएको छ झ्यालखानाको बुइँगलबाट न्यायको घाम झुल्किन्छ कि भनेर हामी सधैं नियालीरहन्छौं। न्यायको पारिलो घाम आँखाले देख्दादेख्दै पनि शासकले छानो हालेर जबरजस्ती छायाँ बनाइरहेको पनि प्रष्टै देखिन्छ ।

नागरिक उन्मुक्ति पार्टीका सांसद प्रदेश सभामा अनुपस्थित भएपछि मुख्यमन्त्री राजेन्द्र रावलले विश्वासको मत पाउन नसकेपछि पदमुक्त हुनु भएको छ ।

उहाँले लेख्नुभएको छ-

हामी विचारमा कटिबद्ध छौँ,सबैले सधैं प्रयोग गर्ने साधन होइनौं । यो देश हाम्रो पनि हो,देशको शासन प्रशासनमा हाम्रोपनी सहभागिता रहनुपर्दछ । भौगोलिक सांस्कृतिक पहिचान नेपालीको पनि सम्मान हो, मुलबासिको अपमान गरेर मुलुक कहिल्यै समृद्धिशाली हुनसक्दैन त्यसैले जनभावनाको कदर गरौँ … जनमतको कदर गरौ !
अहिलेसम्म राज्य टीकापुर घटनाप्रति अनुदार छ।

मानवअधिकारकर्मीहरुले आँखा खोलेका छैनन्। हामीलाई उचालल्नेहरुको ताँती पनि लामै छ। तर हामी न्यायको पालना गरेर जेलमा चौखुरिएर बस्न बाध्य छौं। राष्ट्रप्रति हिजो, आज र भोलि पनि उत्तिकै बफादार थारुलाई न्यायिक दृष्टिको प्रकाश किन परिरहेको छैनरु झ्यालखानाको बुइँगलबाट न्यायको घाम झुल्किन्छ कि भनेर हामी सधैं नियालीरहन्छौं। न्यायको पारिलो घाम आँखाले देख्दादेख्दै पनि शासकले छानो हालेर जबरजस्ती छायाँ बनाइरहेको पनि प्रष्टै देखिन्छ। जय नागरीक ।

काठमाडौँ । नागरिक उन्मुक्ति पार्टी (नाउपा) ले सुदूरपश्चिम प्रदेशका मुख्यमन्त्री राजेन्द्रसिंह रावललाई विश्वासको मत नदिने भएको छ । नाउपा अध्यक्ष रञ्जिता श्रेष्ठ चौधरीले आफूहरुको माग सम्बोधन नहुने भएपछि विश्वासको मत नदिने निर्णय गरिएको बताउनुभयो ।

मुख्यमन्त्री रावलले आज प्रदेशसभाको बैठकमा विश्वासको मत लिने कार्यक्रम छ । सरकार गठन गर्नेबेला अन्तिम समयमा सहयोग गरेको नाउपाले विश्वासको मत भने नदिने बताएको छ ।

मुख्यमन्त्री रावलले बुधबार नै विश्वासको मत लिने कार्यसूची थियो तर नाउपाले विश्वासको मत नदिने बताएपछि प्रदेशसभाको बैठक स्थगित गरेर नेकपा (एमाले) का नेताहरुले नाउपाका नेताहरुसँग छलफल गरेका थिए । बुधबार पनि कुनै सहमति हुनसकेको थिएन ।

मुख्यमन्त्री रावलले प्रदेशसभाबाट विश्वासको मत हासिल गर्न नसकेको अवस्थामा उहाँ स्वतः पदमुक्त हुनुहुनेछ । उहाँ पदमुक्त भएसँगै संविधानको धारा ६८ (३) अनुसार प्रदेशसभामा सबैभन्दा ठूलो दलको हैसियतमा नेपाली कांग्रेसको नेतृत्वमा सरकार गठन गर्ने मार्ग प्रशस्त हुनेछ ।

काठमाडौं ।  नागरिक उन्मुक्ति पार्टीकी अध्यक्ष रञ्जिता श्रेष्ठ (चौधरी)ले आफ्नो पार्टीको माग सम्बोधन नभएसम्म संघ वा प्रदेशको कुनै पनि सरकारमा सहभागी नहुने अडान राख्नु भएको छ ।

सरकारलाई समर्थन गरेको नागरिक उन्मुक्ति पार्टीका अध्यक्ष श्रेष्ठले रेशम चौंधरीलगायतका टीकापुर घटनाका बन्दीहरुलाई रिहाई नगरेसम्म संघ र प्रदेशको कुनै पनि सरकारमा आफ्नो पार्टी सहभागी नहुने अडान कायमै रहेको बताउनु भएको हो ।

शनिबार बुटवलमा आयोजित एक कार्यक्रमपछि सञ्चारकर्मीहरुले राखेका जिज्ञासाको जवाफ दिने क्रममा उहाँले सरकारले आफूहरुको माग सम्बोधन गर्ने भनेकाले त्यो पूरा भएपछि मात्रै सरकारमा जान आफूहरु प्रतिवद्ध रहेको बताउनु भयो । आफ्नो पार्टीको माग र मुद्धा सम्बोधन नभएसम्म सुदूरपश्चिम प्रदेश सरकारलाई विश्वासको मत दिने पक्षमा आफ्नो पार्टी नरहेको पनि अध्यक्ष श्रेष्ठको प्रष्टिकरण थियो । उहाँले भन्नु भयो, ‘जबसम्म नागरिक उन्मुक्ति पार्टीको माग, मुद्धा सरकारले सम्बोधन गर्दैन । तवसम्म हामी प्रतिपक्ष बेञ्चमै बस्नेछौं । सुदूरपश्चिम प्रदेशमा हामीले मुख्यमन्त्रीलाई चाँही समर्थन गरेका छाैं । र, विश्वासको मत दिनुभन्दा अगाडि सरकारले हाम्रो माग, मुद्धा सम्बोधन गरोस भन्ने हाम्रो पार्टीको चाहना पनि रहेको छ ।

हाम्रा मागहरु टिकापुरका राजबन्दीहरुलाई रिहाई गर्ने सरकारले भनिरहेको छ । र, हामीले पनि यही कुरामा अडान लिएका छौं । टिकापुरका निर्दोष थारुहरुलाई रिहाई गर्नुस् । हामी सरकारमा जान्छौं भनिरहेका छौं । सुदूरपश्चिम सरकारलाई पनि हाम्रो माग मुद्दा सम्बोधन भएपछि मात्रै विश्वासको मत दिन्छौं भन्ने हाम्रो कुरा हो । त्यसो भएन भने हामी बैठक बसेर आवश्यक निर्णय गर्छौं । आफूहरुको माग सम्बोधन नभई हामी संघ र प्रदेश कुनै पनि ठाउँमा सरकारमा जाने पक्षमा छैनौं ।’

अध्यक्ष श्रेष्ठले टिकापुर घटनामा निर्दोष रहेका आफ्ना पार्टीका नेता, कार्यकर्ताहरुलाई जेलमुक्त गर्ने काममा ढिलाई नगर्न पनि सरकारलाई दवाव दिनु भयो ।

काठमाडौं । नागरिक उन्मुक्ति पार्टीको संसदीय दलको नेतामा अध्यक्ष रञ्जिता श्रेष्ठ चौधरी चयन हुनुभएको छ । उक्त दलको काठमाडौँमा यही पुस ८ र ९ गते बसेको केन्द्रीय कार्यसमितिको बैठकले अध्यक्ष श्रेष्ठलाई दलको नेता चयन गर्ने निर्णय गरेको हो ।

त्यस्तै, दलको प्रमुख सचेतकमा गङ्गाराम चौधरी र सचेतकमा अरुणकुमार चौधरीलाई चयन गरेको सो पार्टीले आज पत्रकार सम्मेलनमार्फत जानकारी दिएको छ । केन्द्रीय समितिको निर्णयअनुसार सुदूरपश्चिम प्रदेशसभामा संसदीय दलको नेतामा रामेश्वर चौधरीलाई चयन गरिएको छ भने प्रमुख सचेतकमा लक्ष्मणकिशोर चौधरी र सचेतकमा घनश्याम चौधरीलाई चयन गरिएको छ ।

त्यसैगरी, लुम्बिनी प्रदेशसभामा दलको नेतामा धर्मबहादुर चौधरी, प्रमुख सचेतक राजकुमार चौधरी र सचेतकमा नरमाया ढकाललाई चयन गरिएको छ । मधेस प्रदेशसभामा उर्मिला सिंहलाई संसदीय दलको नेतामा छनोट गरिएको छ । नागरिक उन्मुक्ति पार्टीले आगामी २०८० साल वैशाख ४ गतेदेखि ६ गतेसम्म कैलालीको टीकापुरमा महाधिवेशन गर्ने निर्णयसमेत गरेको छ । रासस

टीकापुर । नागरिक उन्मुक्ति पार्टीका केन्द्रीय अध्यक्ष रञ्जिता श्रेष्ठ चौधरीले कैलालीको टीकापुर घटना राजनीतिक प्रकृतिको रहेकाले यसका आरोपीहरुलाई मुक्त गर्ने आश्वासन यसअघिका सरकारहरुले पनि पटक पटक दिएका तर न्याय भने नपाइएको गुनासो गर्नुभएको छ ।

हालै सम्पन्न प्रतिनिधिसभा सदस्य निर्वाचनमा कैलाली क्षेत्र नं १ बाट विजयी उहाँले भन्नुभयो ‘‘हाम्रो पार्टीका संस्थापक रेशम चौधरीलगायत टीकापुर घट्नाका आरोपीहरु निर्दोष रहेकाले तिनको रिहाइका लागि यसअघिका सरकारहरुले पटक पटक लिखित एवं मौखिक प्रतिबद्धता गरेपनि कार्यान्वयन भने गरेनन् । ’’

अध्यक्ष चौधरीले उहाँहरु निर्दोष हुँदाहुँदै पनि जेल जीवन बिताउन बाध्य हुनुपरेको जिकीर गर्नुभयो । नेता तथा मन्त्रीहरुले यो राजनीतिक प्रकृतिको घटना हो, त्यसैले उहाँहरु रिहा हुनुपर्छ भनिरहेका तर रिहाइको पहल भने नगरेको उहाँको गुनासो थियो ।

उहाँले भन्नुभयो ‘‘यसअघिका सरकारले पनि छुटाउने आश्वासन दिएका थिए । अघिल्लो सरकारका प्रधानमन्त्री केपी ओलीका पालामा त सरकार र हामीबीच लिखित सम्झौता नै भएको हो, त्यो सार्वजनिक नै छ सबैले हेर्दा पनि हुन्छ । माओवादी अध्यक्ष प्रचण्ड सरकारमा हुँदा पनि छुटाउने आश्वासन दिनुभएको थियो । हाम्रो भेटमा उहाँले यो राजनीतिक प्रकृतिको मुद्दा भएकाले रेशमलाई न्याय हुन्छ भन्नुभएको थियो । तर सबै सरकारले आश्वासन मात्र दिए, काम कसैले गरेनन् ।’’

सरकारले मुलुकी फौजदारी कार्यविधि संहिता (पहिलो संशोधन) अध्यादेश २०७९ जारी गर्ने निर्णय गरेकाले राजनीतिक क्षेत्रमा यसको पक्ष र विपक्षमा विभिन्न धारणाहरु आइरहेका बेला नागरिक उन्मुक्ति पार्टीका केन्द्रीय अध्यक्ष चौधरीको यो भनाई आएको हो । अघिल्लो अर्थात् केपी ओलीको सरकारका पालामा विसं २०७७ फागुन २० गते तत्कालीन गृहमन्त्री रामबहादुर थापा र विप्लव नेतृत्वको नेकपाबीच तथा विसं २०७८ जेठ १८ गते नेपाल सरकारका तर्फबाट कानुन न्याय तथा संसदीय मामिलामन्त्री लिलानाथ श्रेष्ठ र थारु कल्याणकारिणी सभा थारुवान संघर्ष समितिका प्रमुख रुकमिणी चौधरीसहितको टोलीबीच टीकापुर घटनाका आरोपीहरुलाई रिहा गर्ने विषयमा लिखित सम्झौता भएको थियो ।

आफूहरुले निर्वाचन अघि पनि यस क्षेत्रका सबै दलका नेताहरुले प्रधानमन्त्रीलाई भेटेर टीकापुर घटना राजनीतिक घटना भएकाले निर्दोषलाई न्याय दिन आग्रह गरेको अध्यक्ष चौधरीले बताउनुभयो । रेशमलगायतकाको रिहाइको पहलमा प्रधानमन्त्री सकारात्मक देखिनुभएको उहाँले बताउनुभयो । बोल्ने बेलामा सबै नेताहरुले रेशमसहित जेलमा रहेकाहरु निर्दोष छन् भन्ने गरेका तर पनि उनीहरुलाई न्याय दिने काममा भने कोही पनि अग्रसर नभएको देखिएको उहाँको गुनासो छ ।

उहाँको जिज्ञासा थियो ‘‘यसपटक पनि सरकारले न्याय दिन्छु भनेको छ, सरकारले अध्यादेश जारी गरेको हामीले सुनेका छौँ, पहिलेजस्तै आश्वासन मात्र हो कि वास्तवमै सरकारले न्याय दिन्छ हेरौँ ।’’ उहाँले आफू र आफ्नो पार्टीले अरु केही नमागेर निर्दोषहरुलाई जेलबाट रिहाइ मात्र मागेको बताउनुुहुन्छ । जनताले भने आफू र रेशम चौधरीलाई न्याय दिएको उहाँको भनाईछ । आफ्नो निर्वाचन प्रचारप्रसारका क्रममा पनि नागरिकले रेशम निर्दोष रहेको र यसका लागि आवश्यक परे आफूहरुले आन्दोलन पनि सुरु गर्ने बताएका उहाँले सुनाउनुभयो ।

चौधरीले भन्नुभयो ‘‘कैलालीका जनताले अन्यायका विरुद्धमा मतदान गर्नुभएको छ, सबैले रेशमलाल चौधरीसहित जेलमा रहनुभएका निर्दोष युवाको रिहाइका लागि जनमत प्रकट गर्नुभएको छ । मत माग्दै जाँदा मलाई लाग्छ सबैको चासो पनि यही थियो । उहाँहरुले यो अन्यायका विरुद्धमा मत प्रकट गरेर मतमार्फत् रेशमलगायतका बन्दीहरुको रिहाइको अपिल गर्नुभएको छ ।’’

उहाँले अघिल्लो निर्वाचनमा पनि नागरिकले रेशम जीलाई न्याय गरेको प्रसंग उल्लेख गर्नुभयो । तर पनि उहाँलाई जेलमुक्त गरिएन र यसका कारण कैलालीको यो क्षेत्र पाँच वर्ष नै जनप्रतिनिधिविहीन भयो । रेशमलाई जस्तै नागरिकले आफूलाई पनि न्याय दिएको उहाँको भनाई छ । यहाँका सबै नागरिक रेशमलाल चौधरीसहितका बन्दी जीवन बिताइरहेकाहरु निर्दोष हुन् भनेर आवाज उठाएको र मत माग्दै जाँदा सबैले रेशमको रिहाइको अपिल गरेको उहाँले सुनाउनुभयो । अघिल्लो निर्वाचनमा पनि नागरिकले रेशम जीलाई न्याय गरेका उहाँको अनुभव छ । उहाँ भन्नुहुन्छ ‘‘यहाँका नागरिकले रेशमजीलाई मत दिएर जिताएकै हुन् । नागरिकले रेशम चौधरीलाई सांसद विजयी गराउनुको अर्थ उहाँ निर्दोष हो रिहाइ गर्नुपर्छ भन्ने होइन र रु तर पनि सरकारले गरेको छैन ।’’

आफूले निर्वाचनका क्रममा मतदाताहरुबाट सकारात्मक प्रतिक्रिया पाएको उहाँको अनुभव छ । धेरै माया र उत्साह आफूलाई मतदाताले दिएको उहाँले बताउनुभयो । सबैको चाहना परिवर्तन र न्याय चाहिन्छ भन्ने रहेको तथा यहाँका नागरिकले आफूलाई मत दिनु भनेकै न्याय र परिवर्तनका लागि हो भनेर बुझेको उहाँले बताउनुभयो । आफ्नो क्षेत्रमा शान्ति, अमनचयन, विकास र समृद्धिका लागि आफु लाग्ने पनि उहाँले प्रण गर्नुभयो ।

निर्वाचित भएपछिका दिनहरु उहाँले आफ्ना मतदातालाई धन्यवाद दिएर बिताइरहनुभएको छ । यसअघिको प्रतिनिधिसभा निर्वाचनमा टीकापुर घटनाका मुख्य आरोपी रेशमलाल चौधरी निर्वाचित हुनुभएको थियो । निर्वाचित भएपछि कैलालीमा आत्मसर्मपण गरेका चौधरी हाल जेल जीवन बिताइरहनु भएको छ । उहाँ जेलमा रहेकाले यस क्षेत्र पाँच वर्षसम्म नेतृत्वविहीन भयो । यसपटक भने रेशमकै धर्मपत्नी रञ्जिता श्रेष्ठ यसै क्षेत्रबाट भारी मतान्तरले विजयी हुनुभयो ।

गत सातामात्रै नागरिक उन्मुक्ति पार्टीले टीकापुरमा पत्रकार सम्मेलन गरी टीकापुर घटनाको मुद्दा सरकारले फिर्ता लिनुपर्ने प्रमुख माग राखेको छ । नागरिक उन्मुक्तिले कैलालीका एक, दुई र तीनगरी तीन क्षेत्रमा प्रतिनिधिसभा सदस्य निर्वाचन जितको छ ।

आफ्नो निर्वाचन क्षेत्रबारे उहाँ भन्नुहुन्छ ‘‘मेरो निर्वाचन क्षेत्रमा धेरै समस्याको चाङ छ । म निर्वाचनका बेला जहाँ पुगे समस्या मात्रै देखेका छु । यहाँ अभाव, गरिबी, समस्या धेरै छन् । यी सबै कुरा पाँच वर्षमा एकएक गर्दै सुधार्नु छ । जहाँ जहाँ पुगे त्यहाँ स्वास्थ, बाल शिक्षा, शुद्ध खानेपानीको अभाव, रोजÞगारीका अवसरको कमी, विपद्को जोखिम, बाढीको पीडा, सडक विस्तार नभएका जस्ता विविध समस्या छन् । यी धेरै समस्यालाई पाँच वर्षमा विस्तारै पूरा गर्दै जाने योजना छ ।’’ रासस

काठमाडौं, १२ असार । थरुहट थारुवान राष्ट्रिय मोर्चाका केन्द्रीय संयोजक लक्ष्मण थारु रेशम चौधरीकी श्रीमती रञ्जिता श्रेष्ठ चौधरी नेतृत्वको नागरिक उन्मुक्ति पार्टी प्रवेश गरेका छन् । देशको भाग्य र भविष्य अब यही पार्टीले बनाउने भन्दै उनीहरु उक्त पार्टीमा प्रवेश गरेका हुन् ।

रिपोर्टर्स क्लब नेपालमा आज (आइतबार) पत्रकार सम्मेलन गर्दै थारुसहित थरुहट थारुवान राष्ट्रिय मोर्चा दाङका केन्द्रीय सल्लाहकार सुरेन्द्र चौधरीसहित ५० जनाभन्दा बढी आज नागरिक उन्मुक्ति पार्टीमा प्रवेश गरेका हुन् ।

यसरी पार्टी प्रवेश गर्नेहरुमा रामकुमार चौधरी, मोहनलाल चौधरी, बिन्दु चौधरी, सीताराम चौधरी, गणेश चौधरी, रन्जित चौधरी, बासुदेव चौधरी, लोकबहादुर लौहार, राजीब कार्की, रामलाल थारु, मोतीलाल चौधरी, जगत चौधरी, शिवलाल चौधरी, दीपक चौधरी, सकुन्तला विक, भरत विकलगायत रहेका छन् । रौतहटबाट मनोज चौधरी र कृष्णकान्त चौधरी पनि पार्टी प्रवेश गरेका छन् ।

पत्रकार सम्मेलनमा बोल्दै केन्द्रीय सदस्य रामलाल दमला थारुले हिमाल, पहाड र तराईका सबै नेपालीहरुको अधिकार प्राप्तिकोलागि स्थापना भएको स्पष्ट पारे । पछिल्लो समय पार्टीप्रति ठूलो आकर्षण देखिएको पनि उनको भनाई छ ।

नागरिक उन्मुक्ति पार्टी जन्मिएपछि शासक वर्गहरुको मनमुटुमा धक्का पुगेको उनको भनाई थियो । उनले आफ्नो पार्टीले गत बैशाख ३० गते भएको स्थानीय तहको निर्वाचनमा ऐतिहासिक सफलता हासिल गरेको सुनाए । उनले निर्वाचनमा पार्टीले पाएको सफलतालाई युगान्तकारी इतिहास कोर्न सफल भएको रुपमा दर्ज गरे ।

उनले सबै युवाको भविष्यका केन्द्रविन्दु भएकै कारण नागरिक उन्मुक्ति पार्टी प्रवेशमा लहर बढेको दाबी गरे । थारुले शोषण, दमन, अत्याचारमा परेका हजारौ व्यक्तिहरुको नजरमा आफ्नो पार्टी प्रिय भएको समेत जिकिर गरे ।

त्यस्तै, नवप्रवेशी सुरेन्द्र चौधरीले नागरिक उन्मुक्ति पार्टी राज्यले गरेको उत्पीडनको बिरुद्धमा स्थापना भएको भएको बताए । चौधरीले नेपालका नेताको कारण निर्दोष नेता रेशम चौधरी जेलमा बस्न बाध्य भएकोे पनि टिप्पणी गरे ।

उनले राज्यले सुनियोजित रुप्मा फसाएका राम्रा व्यक्तिहरु रेशम चौधरी र लक्ष्मण थारु आज एकै ठाउँमा जोडिएकोमा खुशी लागेको प्रतिक्रिया दिए । टिकापुर घट्नाको स्मरण गराउँदै उनले शान्तिपुर्ण आन्दोलनको क्रममा गैरराजनीतिक रुपले अनागरिकजस्ता विभिन्न ट्याग लगाएर, राज्य शक्तिको दुरुपयोग गरेर रेशम चौधरीलाई थुनाएको टिप्पणी गरे ।

उनले रेशम चौधरीजस्तो निर्दोष र ईमानदार व्यक्तिलाई फसाउने नेताहरुलाई चुनौती दिन आफ्नो पार्टी तयार रहेको पनि बताए । उनले भने,‘अब हामी अभियान लिएर देशको यात्रामा हिँडेका छौं । राष्ट्र निर्माणको लागि जनजातीको भूमिका देखाउन आज नागरिक उन्मुक्ति पार्टी प्रवेश गरियो ।’

हिमाल, पहाड र तराईलाई नजोडिकन देशको विकास नहुने भन्दै उनले भने,‘हिमाल भनेको सम्पत्ति हो, तराई–मधेश खाद्यान्नको भण्डार हो। पहाड नगद हो । यी तीनकुरा नजोडिकन देश समृद्धिको यात्रामा जान सक्दैन् ।’

त्यस्तै, नवप्रवेशी लक्ष्मण थारुले कुनै अपराध नगरी आफुमाथि पनि सरकारले जन्मकैदको फैसला सुनाएको टिप्पणी गरे । उनले रेशम चौधरी निर्दोष भएको दाबी गरे ।

उनले टिकापुर घट्नामा थारुहरुले बच्चा र प्रहरी मारेको प्रमाण नभएको भन्दै वास्तविक दोषीलाई जोगाएर निर्दोष रेशम चौधरीलाई फसाएको बताए । उनले भने,‘टिकापुर घटनाको वास्तविक दोषीलाई कारबाही गर्नुपर्छ, रेशम चौधरीसँग घटनाको समयमा कुनै हतियार थिएन । राज्यले झुट्टा मुद्दा लगाएर फसायो, थारुले राजनीति गर्न नपाउने हो ?’ उनले रेशमसँगै जेलमा रहेका सात जना आन्दोलनकारी भएपनि हत्यारा नभएको दाबी गरे ।

आफु बदलाको भावको रुपमा नभई न्याय, समानता र अधिकारका लागि नागरिक उन्मुक्ति पार्टी प्रवेश गरेको जानकारी दिए । थारुले न्याय माग्दै जादाँ नागरिक उन्मुक्ति पार्टीमा निशर्त प्रवेश गरेको र कुनै पनि जिम्मेवारी दाबी नगरेको समेत स्पष्ट पारे । उनले थरुहट र मधेश जस्ता विभिन्न आन्दोलनलाई बचाउने हो भने सबैले नागरिक उन्मुक्ति पार्टी प्रवेश गर्नुपर्ने धारणा राखे ।

नवप्रवेशी नेत्र जैशीले नागरिक उन्मुक्ति पार्टीले राष्ट्रिय स्वरुप लिन लागेको बताए । उनले न्यायको लागि सबै आफ्नो पार्टीमा गोलबद्ध हुन्पर्नेमा जोड दिए ।
उनले रेशम चौधरीलाई राज्यले निकास दिनुपर्ने बताए । जैशीले उपेक्षित समुदाय, व्यक्ति र पछि परेका सबैलाई समेट्नेगरि अघि बढ्ने विचारसहित आफु पार्टी प्रवेश गरेको सुनाए ।

पार्टी प्रवक्ता दामोदर पण्डितले गत स्थानीय चुनावमा पार्टीको चिन्ह लिएर फिल्डमा खटिँदा निकै गाह्रो भएको सुनाए । उनले भने,‘न्यायको एजेण्डा र विचार बोेकेर अघि बढेपछि अलिकति भएपनि सफलता पाइयो ।’

उनले गत बैशाख ३० गते सम्पन्न स्थानीय तहको चुनावमा सात पालिकामा मेयर÷उपमेयरसहित विभिन्न पदमा ९९ जना पार्टीबाट निर्वाचित भएको जानकारी दिए । उनले भजनीमा प्रमुख, टिकापुर नगरपालिकामा प्रमुख, जानकी गाउँपालिका अध्यक्ष, उपाध्यक्ष, ज्योतीपुर गाउँपालिका अध्यक्ष, उपाध्यक्ष विजयी भएको सनाए । अब आउने संघीय र प्रदेशको चुनावमा पनि धेरै स्थानमा पार्टीले जित हासिल गर्ने उनले विश्वास व्यक्त गरे ।

पण्डितले रेशम चौधरी आज व्यक्ति नभई मुद्दा, माग र पहिचान भएको टिप्पणी गरे । राज्यले गरेको विभेदविरुद्ध जन्मिएको पार्टीको स्थापना भएको सुुनाउदै रेशम चौधरी थारु भएकै कारणले अन्यायमा परेको बताए ।

उनले रेशमको न्यायको लागि आफ्नो पार्टीलाई आगामी चुनावमा मतदान गर्न पनि आग्रह गरे । उनले भने,‘संघको निर्वाचनमा सबै आदिवासी, उपेक्षित, जनजातीहरुले मतदान गर्नुहोस्, आज निर्दोष व्यक्ति जेलमा छ ।’ टिकापुर घटना आफुले प्रत्यक्ष देखेको भन्दै उनले रेशम चौधरी निर्दोष रहेको पनि दाबी गरे । उनले ०७२ सालको उक्त आन्दोलन विशुद्ध राजनीतिक आन्दोलन भएको स्पष्ट पारे । उनले रेशम चौधरीलाई बहुमुखी प्रतिभाको धनी व्यक्तिको रुपमा चित्रण गरेका थिए ।

पार्टी अध्यक्ष रञ्जिता चौधरी श्रेष्ठले टिकापुर घटना राजनीतिक घट्ना भएको उल्लेख गर्दै रेशम चौधरी निर्दोष हुँदाहुँदैपनि जेलमा राखिएकोमा गुनासो पोखिन् । उनले यो घट्नाका दोषीहरुलाई राज्यले जोगाएको आरोप लर्गान् ।

उनले देशका नागरिकहरुमाथि राज्यबाट गरिएको थिचोमिचोले मुलुक अघि नबढ्ने पनि बताईन् । लक्ष्मण थारु र सुरेन्द्र थारु आज सदस्यको रुपमा प्रवेश गरेपनि पार्टीको बैठकले उपयुक्त जिम्मेवारी दिनेपनि उनले स्पष्ट पारिन् । उनले पार्टी प्रवेश गर्ने सबैलाई एकमुष्ट रुपमा धन्यवाद ज्ञापन गरेकी थिईन् ।